គណបក្សប្រជាជនប្រកាសឲ្យប្រើឡូហ្គោមានរូបលោក ហ៊ុន ម៉ាណែត សម្រាប់ថ្ងៃ៧មករា
ខុទ្ទកាល័យគណៈកម្មាធិការកណ្តាលគណបក្សប្រជាជន ដែលកំពុងកាន់អំណាចកាលពីថ្ងៃទី១៧ ខែធ្នូម្សិលមិញ បានប្រាប់ទៅថ្នាក់ដឹកនាំគណបក្សនៅតាមរាជធានី ខេត្ត ក្រសួង និងស្ថាប័ន ឲ្យប្រើប្រាស់ឡូហ្គោ ដែលមានរូបឥស្សរជនកំពូលទាំងបី ក្នុងនោះមានលោក ហ៊ុន ម៉ាណែត ផងដែរ សម្រាប់អបអរបុណ្យ៧មករាខាងមុខ។ ការរំលេចរូបលោក ហ៊ុន ម៉ាណែត នៅលើឡូហ្គោបុណ្យ៧មករា ត្រូវអ្នកវិភាគយល់ថាជាការបង្ហាញកាន់តែច្បាស់ពីយន្តការបន្តវេនទាំងនៅក្នុងបក្ស និងនៅក្នុងរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:៥៦
នៅក្នុងសេចក្តីណែនាំខ្លី ដែលខុទ្ទកាល័យគណៈកម្មាធិការកណ្តាលគណបក្សប្រជាជនកម្ពុជាបានប្រាប់ទៅប្រធានគណៈកម្មាធិការបក្សរាជធានី ខេត្ត និងក្រសួង ស្ថាប័ន នោះគឺសម្រាប់ការប្រារព្ធខួបអនុស្សាវរីយ៍លើកទី៤៥ នៃទិវាជ័យជម្នះ ៧មករាខាងមុខ គណៈអចិន្ត្រៃយ៍នៃគណៈកម្មាធិការកណ្តាលបានសម្រេចឲ្យប្រើប្រាស់ឡូហ្គោថ្មី ដែលមានរូបសម្តេចទាំងបី ដែលបានភ្ជាប់មកជាមួយសេចក្តីបង្គាប់នេះ។
ឡូហ្គោថ្មី ដែលគណបក្សកាន់អំណាចតម្រូវឲ្យប្រើប្រាស់សម្រាប់ថ្ងៃ៧មករាខាងមុខនេះ មានរំលេចរូបថតមេដឹកនាំកំពូល៣រូប គឺលោក ហេង សំរិន ប្រធានកិត្តិយស លោក ហ៊ុន សែន ប្រធានគណបក្ស និងលោក ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីបច្ចុប្បន្ន។
លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយ យល់ឃើញថាការដាក់រូបភាពមេដឹកនាំបក្សកាន់អំណាច ៣នាក់ឡើងវិញ នៅលើឡូហ្គោអបអរបុណ្យ ៧មករា គឺជាការរំលេចតួអង្គលោក ហ៊ុន ម៉ាណែត កាន់តែច្បាស់ ដែលនេះបង្ហាញថាការបន្តវេនមិនត្រឹមតែនៅក្នុងរដ្ឋាភិបាលទេ នៅក្នុងគណបក្សក៏ដូចគ្នាដែរ។
ទោះយ៉ាងណា លិខិតដែលមានចុះហត្ថលេខាដោយលោក ម៉ម សារិន ប្រធានខុទ្ទកាល័យគណបក្សប្រជាជន បានបញ្ជាក់ថាឡូហ្គោរូបសម្តេចទាំងបី ក៏ត្រូវបន្តប្រើប្រាស់ទៅមុខទៀតសម្រាប់ការឃោសនាបោះឆ្នោតទាំងសកល និងអសកលផងដែរ។
សូមរំលឹកថាកាលពីអតីតកាល ឡូហ្គោដើម្បីអបអរខួបអនុស្សាវរីយ៍ថ្ងៃជ័យជម្នះ ៧មករា ត្រូវបានរំលេចដោយរូបភាពឥស្សរជនជាន់ខ្ពស់គណបក្ស៣រូប គឺលោក ជា ស៊ីម លោក ហេង សំរិន និងលោក ហ៊ុន សែន។ ក៏ប៉ុន្តែចាប់តាំងពីលោក ជា ស៊ីម ទទួលមរណភាពនៅឆ្នាំ២០១៥មក ឡូហ្គោបុណ្យ៧មករា និងឡូហ្គោសម្រាប់ឃោសនាគណបក្សគឺមានតែរូបភាពលោក ហេង សំរិន និងលោក ហ៊ុន សែន ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ