គ.ជ.ប ព្រមឲ្យបក្សឆន្ទៈខ្មែរ និងបក្សកម្លាំងជាតិចូលរួមបោះឆ្នោតព្រឹទ្ធសភាដោយរលូន
គណៈកម្មាធិការជាតិរៀបចំការបោះឆ្នោត(គ.ជ.ប) កាលពីថ្ងៃទី១១ ខែធ្នូ បានសម្រេចដំណាលគ្នាឲ្យគណបក្សឆន្ទៈខ្មែរ និងគណបក្សកម្លាំងជាតិចូលរួមបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ឆ្នាំ២០២៤។ បន្ទាប់ពីគ.ជ.ប ទទួលស្គាល់ដោយរលូន គណបក្សប្រឆាំងទាំងពីរ បានបង្កើនសកម្មភាពរារាំង និងអូសទាញអង្គបោះឆ្នោតជាង២ពាន់នាក់ ដែលជាក្រុមប្រឹក្សាឃុំ សង្កាត់របស់គណបក្សភ្លើងទៀន ខណៈគណបក្សឆន្ទៈខ្មែរ បានដើរតួនាទីជំនួសគណបក្សភ្លើងទៀន ដែលមិនមានសិទ្ធិចូលរួមបោះឆ្នោត។
ចុះផ្សាយនៅថ្ងៃ៖
ស្តាប់ - ០២:៣៨
គណៈកម្មាធិការជាតិរៀបចំការបោះឆ្នោត(គ.ជ.ប) បានសម្រេចចំនួន៣ចំណុច នៅថ្ងៃតែមួយថា ស្ថាប័នរៀបចំការបោះឆ្នោតកំពូលនេះ ទទួលស្គាល់ជាផ្លូវការលើពាក្យសុំចុះបញ្ជីរបស់គណបក្សឆន្ទៈខ្មែរ និងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ឆ្នាំ២០២៤។ ការសម្រេចដូចគ្នានេះ ក៏ គ.ជ.ប បានបញ្ជាក់សម្រាប់គណបក្សកម្លាំងជាតិដែរ គឺអនុញ្ញាតឲ្យគណបក្សប្រឆាំងទី២នេះ បានចូលរួមការបោះឆ្នោតព្រឹទ្ធសភា។
ប៉ុន្មានម៉ោងក្រោយការសម្រេចរបស់ គ.ជ.ប គណបក្សភ្លើងទៀន ក៏បានចេញលិខិតជាថ្មីម្តងទៀតប្រាប់ទៅក្រុមការងារគណបក្សថ្នាក់ក្រោមជាតិ ជាពិសេសសមាជិកក្រុមប្រឹក្សាឃុំ សង្កាត់ ទាំងជាង២ពាន់នាក់ ដែលជាប់ឆ្នោតតាមរយៈគណបក្សភ្លើងទៀន ពីការជ្រើសរើសយកគណបក្សឆន្ទៈខ្មែរ តំណាងឲ្យគណបក្សភ្លើងទៀន ក្នុងការចូលរួមការបោះឆ្នោតជ្រើសតាំងព្រឹទ្ធសភា។
ភ្លើងទៀនបញ្ជាក់ថាពុំមានគណបក្សដទៃណាអាចបង្ខំ ឬគំរាមកំហែងឲ្យសមាជិក ក្រុមប្រឹក្សាឃុំ សង្កាត់ ជាប់ឆ្នោតពីគណបក្សភ្លើងទៀនទៅបោះឆ្នោតឲ្យគណបក្សផ្សេងក្រៅពីគណបក្សឆន្ទៈខ្មែរឡើយ។ គណបក្សភ្លើងទៀន ជាគណបក្សតែមួយគត់ មានសិទ្ធិអំណាចក្នុងការគ្រប់គ្រង និងការពារសមាជិកក្រុមប្រឹក្សាឃុំ សង្កាត់ទាំង ២១៩៨រូប ដែលជាប់ឆ្នោតពីគណបក្សភ្លើងទៀន។ នេះបើតាមសេចក្តីណែនាំរបស់គណបក្សភ្លើងទៀន។
ដោយឡែក លោក ជា មុនី អ្នកនាំពាក្យគណបក្សកម្លាំងជាតិរំពឹងថា ក្រុមប្រឹក្សាឃុំ សង្កាត់របស់គណបក្សភ្លើងទៀន នឹងគាំទ្រដល់គណបក្សកម្លាំងជាតិ ក៏ព្រោះថាមេដឹកនាំគណបក្សកម្លាំងជាតិ ដែលបានបែកចេញពីគណបក្សភ្លើងទៀន ធ្លាប់បានបំពេញការងារជាមួយគ្នាកាលពីពេលកន្លងទៅ។
អ្នកតាមដានសង្គម និងនយោបាយមួយចំនួនមើលឃើញថាគណបក្សប្រឆាំងនៅតែមិនមានឥទ្ធិពលអាចធ្វើឲ្យគណបក្សកាន់អំណាចបារម្ភតាមរយៈការបោះឆ្នោតបានទេ ដរាបណាពួកគេនៅតែឈរម្ខាងម្នាក់។
សូមរំលឹកថាគណបក្សភ្លើងទៀន មិនត្រូវបានអនុញ្ញាតឲ្យចូលរួមការបោះឆ្នោតព្រឹទ្ធសភានីតិកាលទី៥ នៅថ្ងៃទី២៥ ខែកុម្ភៈ ឆ្នាំ២០២៤ទេ ដោយសារខ្វះឯកសារចុះបញ្ជីគណបក្សច្បាប់ដើម។ ដូច្នេះគណបក្សនេះ បានជ្រើសរើសគណបក្សឆន្ទៈខ្មែរ ដែលស្ថិតក្នុងសម្ព័ន្ធភាពជាមួយគ្នាឲ្យឈរឈ្មោះជំនួស ចូលរួមការបោះឆ្នោតអសកលមួយនេះ។
ក៏ប៉ុន្តែគណបក្សកម្លាំងជាតិ ដែលមេដឹកនាំបានបែកចេញពីគណបក្សភ្លើងទៀន ក៏បានដាក់ពាក្យចូលប្រកួតប្រជែងដែរ ដោយរំពឹងថានឹងអាចទាញអង្គបោះឆ្នោតពីគណបក្សភ្លើងទៀនតិច ឬច្រើន ប្រកបដោយក្តីសង្ឃឹមថានឹងទទួលបានអាសនៈក្នុងព្រឹទ្ធសភានីតិកាលថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ