កីឡាការីនីខ្មែរ លោកស្រី អ៊ុក ស្រីមុំ ឈ្នះមេដាយមាសក្នុងការប្រកួតកីឡាប៉េតង់ពិភពលោកក្នុងប្រទេសអេស្ប៉ាញ
កីឡាការីនីខ្មែរ លោកស្រី អ៊ុក ស្រីមុំ បានឈ្នះមេដាយមាសក្នុងព្រឹត្តិការណ៍ប្រកួតកីឡាប៉េតង់ជ្រើសរើសជើងឯកពិភពលោក ឆ្នាំ២០២១ នៅទីក្រុង Santa Susanna ប្រទេសអេស៉្បាញ។ សម្រាប់ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មេដាយមាសដែលកម្ពុជាទទួលបានតាមរយៈជ័យជម្នះនេះ គឺបង្ហាញពីភាពប្រឹងប្រែងគ្រប់កាលៈទេសៈរបស់កីឡាករ កីឡាការីនីប៉េតង់កម្ពុជាគ្រប់រូប នាពេលកន្លងមក។ និងជាក្តីសង្ឃឹមមួយខ្ពស់បន្ថែមទៀត ដើម្បីឆ្ពោះទៅដណ្តើមមេដាយមាស ក្នុងព្រឹត្តិការណ៍ស៊ីហ្គេមឆ្នាំ២០២៣ខាងមុខ។
ចុះផ្សាយនៅថ្ងៃ៖
ស្តាប់ - ០២:២២
កាលពីថ្ងៃទី ១៣ វិច្ឆិកា កីឡាការីនីខ្មែរ គឺលោកស្រី អ៊ុក ស្រីមុំ បានទទួលមេដាយមាសក្នុងការប្រកួតកីឡាប៉េតង់ជ្រើសរើសជើងឯកពិភពលោកឆ្នាំ២០២១ បន្ទាប់ពីបានយកឈ្នះកីឡាការីជនជាតិថៃ ក្នុងវគ្គផ្តាច់ព្រ័ត្រ ដោយលទ្ធផល ៣៧ទល់២៩។ ការប្រកួតកីឡាប៉េតង់ក្នុងកម្រិតពិភពលោកនេះ រៀបចំធ្វើនៅក្នុងទីក្រុង Santa Susanna ប្រទេសអេស្ប៉ាញ។
បើយោងតាមការបញ្ជាក់ពីគណៈកម្មាធិការជាតិអូឡាំពិកកម្ពុជា មុនពេលកីឡាការីនី អ៊ុក ស្រីមុំ ដណ្តើមបានមេដាយមាស ជើងឯកពិភពលោក លោកស្រីបានយកឈ្នះកីឡាការិនីកាណាដា នៅវគ្គ១ដែលមាន៤វគ្គ ក្នុងលទ្ធផល ២៩ទល់២។ និងបន្តយកឈ្នះកីឡាការិនីន័រវេស នៅវគ្គពាក់កណ្តាលផ្តាច់ព្រ័ត្រ ក្នុងលទ្ធផល ២៥ទល់១៨ រហូតបានឈានទៅវគ្គផ្តាច់ព្រ័ត្រ បន្តឈ្នះកីឡាការិនីថៃ ក្នុងលទ្ធផល ៣៧ទល់២៩។
ក្រោយកីឡាការីនីខ្មែរដណ្តើមបានមេដាយមាសពិភពលោក លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់វិទ្យុបារាំងអន្តរជាតិ នាថ្ងៃអាទិត្យ ទី១៤ វិច្ឆិកាថា ជ័យជម្នះនេះ សរបញ្ជាក់ពីភាពជោគជ័យគួរឱ្យកោតសរសើរមួយខ្ពស់ចំពោះកីឡាការី អ៊ុក ស្រីមុំ។ ហើយភាពជោគជ័យនេះ ក៏បានបង្ហាញពីភាពកិច្ចខិតខំប្រឹងប្រែងរបស់កីឡាករ និងកីឡាការីនីប៉េតង់កម្ពុជាគ្រប់រូប ក្នុងការហ្វឹកហាត់លុតដំខ្លួនជាប្រចាំ បើទោះស្ថិតក្នុងស្ថានភាពជំងឺកូវីដ១៩កំពុងរីករាលដាលយ៉ាងណាក្តី។
បើតាមអគ្គលេខាធិការូបនេះ មេដាយមាសដែលកម្ពុជាទទួលបានពីការប្រកួតកីឡាប៉េតង់ជើងឯកពិភពលោកឆ្នាំ២០២១នៅពេលនេះ គឺជាផលវិជ្ជមាន និងជាសារក្រើនរំឭកដល់កីឡាករ កីឡាការីនីកម្ពុជាគ្រប់រូប ឱ្យត្រៀមខ្លួនបូករួមនឹងកម្លាំងចិត្ត សម្រាប់ដំណើរឆ្ពោះទៅកាន់ព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ក្នុងនោះ លោក វ៉ាត់ ចំរើន បានគូសបញ្ជាក់ផងដែរថា កម្ពុជាក៏បានត្រៀមយុទ្ធសាស្ត្រ និងដាក់គោលដៅយ៉ាងម៉ឺងម៉ាត់ហើយថា នឹងដណ្តើមយកមេដាយមាសក្នុងព្រឹត្តិការណ៍ស៊ីហ្គេមឆ្នាំ២០២៣ឱ្យបានច្រើនជូនជាតិ។
សូមរំឭកថា ម្ចាស់ជើងឯកមេដាយមាសកម្រិតពិភពលោកឆ្នាំ២០២១ លោកស្រី អ៊ុក ស្រីមុំ ក៏ធ្លាប់ជាម្ចាស់មេដាយមាសក្នុងវិញ្ញាសាឯកត្តជននាឆ្នាំ២០១៧កន្លងទៅផងដែរ។ នៅពេលនោះ លោកស្រីបានយកឈ្នះកីឡាការីនីទុយណេស៊ី ក្រោមលទ្ធផល១៣-៧ពិន្ទុ ក្នុងការប្រកួតកីឡាប៉េតង់ពិភពលោក នៅប្រទេសប៊ែលហ្ស៊ិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ