អង្គការអក់ស្វាម៖ មនុស្សនឹងជួបបញ្ហាខ្វះអាហាររូបត្ថម្ភ ដោយសារតែបាតុភូត អែល នីញ៉ូ
យ៉ាងហោច មនុស្ស១០លាននាក់ នៅក្នុងពិភពលោក នឹងជួបបញ្ហាខ្វះអាហាររូបត្ថម្ភ នៅឆ្នាំនេះ និងឆ្នាំក្រោយ។ នៅក្នុងសេចក្តីប្រកាសព័ត៌មានមួយ នៅថ្ងៃព្រហស្បតិ៍នេះ អង្គការអក់ស្វាម ដែលមានទីតាំងក្នុងទីក្រុងឡុងដ៍បានសរសេរថា គឺកត្តាប្រែប្រួលអាកាសធាតុ និងបាតុភូតអែល នីញ៉ូ ដែលជាដើមហេតុធ្វើឲ្យមនុស្សប្រឈមទៅនឹងការខ្វះចំណីអាហារ។
ចុះផ្សាយនៅថ្ងៃ៖
ស្តាប់ - ០២:១៤
អង្គការអក់ស្វាម ដែលធ្វើការ ដើម្បីលុបបំបាត់ចោលភាពអយុត្តិធម៌ និងភាពក្រីក្រ ក្នុងពិភពលោក បានទាញសញ្ញាអាសន្ន ក្រើនរំលឹកពីបញ្ហាកង្វះអាហាររូបត្ថម្ភ ដែលមនុស្សរាប់លាននាក់ ត្រូវប្រឈម នៅឆ្នាំនេះ និងឆ្នាំក្រោយ។ តួលេខ របស់ទីភ្នាក់ងារអង្គការសហប្រជាជាតិ បង្ហាញថា មានមនុស្សប្រមាណ ៤លាន ៥សែននាក់ នៅប្រទេសអេត្យូពី កំពុងត្រូវការជំនួយផ្នែកចំណីអាហារ។ អេត្យូពីបច្ចុប្បន្ន កំពុងរងគ្រោះដោយសារតែ បាតុភូតអែលនីញ៉ូ និងកត្តាប្រែប្រួលអាកាសធាតុ ដែលធ្វើឲ្យទឹកភ្លៀងធ្លាក់មិនទៀតទាត់។
តាមអក់ស្វាម ចាប់ពីខែតុលា នេះ រហូតដល់ខែមករាឆ្នាំក្រោយ គេនឹងជួបបាតុភូតអែលនីញ៉ូ ដែលខ្លាំងបំផុត មិនធ្លាប់មានពីមុនមក។ គួរបញ្ជាក់ថា បាតុភូតអេលនីញ៉ូគឺជា បាតុភូតធម្មជាតិមួយដែលនាំឲ្យកើតមានគ្រោះរាំងស្ងួត និងទឹកជំនន់ធ្ងន់ធ្ងរ នៅតាមតំបន់មួយចំនួន។ បាតុភូតនេះបណ្តាលមកពីការឡើងកំដៅ នៅក្នុងមហាសមុទ្រប៉ាស៊ីហ្វិច ដែលកំដៅនោះនឹងបង្កចេញជាចំហាយអណ្តែតទៅលើលំហអាកាស។ ចំហាយក្តៅទាំងនោះ នឹងបណ្តាលឲ្យមានសម្ពាធសីតុណ្ហភាពក្តៅហួតហែង នៅតាមតំបន់ដែលវាឆ្លងកាត់ ហើយអាចបង្កជាខ្យល់ព្យុះ រឺភ្លៀងធ្លាក់ជាគំហុក។ តំបន់ខ្លះអាចមានភ្លៀងធ្លាក់ខ្លាំង បង្កជាទឹកជំនន់ ចំណែកតំបន់ខ្លះទៀតត្រូវជួបគ្រោះរាំងស្ងួត។
តាម Mark Goldringប្រធានអង្គការអក់ស្វាម នៅទីក្រុងឡុងដ៍ បាតុភូតអែលនីញ៉ូនឹងប៉ះពាល់ខ្លាំង ដល់ប្រទេសក្រីក្រ ដែលពឹងអាស្រ័យទៅលើរបរកសិកម្ម។ គ្រោះរាំងស្ងួត បណ្តាលមកពី បាតុភូត អែលនីញ៉ូ កំពុងគំរាមកំហែងដល់ដំណាំស្រូវ និងពោត ដែលតាមពិត ជាអាហាររូបត្ថម្ភចំបង របស់ប្រជាជនក្រីក្រ រស់នៅតំបន់ អាហ្វ្រិកខាងត្បូង និងអាមេរិកកណ្តាល។
អង្គការFAOរបស់អង្គការសហប្រជាជាតិធ្លាប់បានបង្ហាញថា គ្រោះរាំងស្ងួត រយៈពេលវែង នៅឆ្នាំនេះ បានធ្វើដំណាំពោត និងសណ្តែក នៅអាមេរិកកណ្តាល ធ្លាក់ចុះ អស់ជាង ៦០ភាគរយ។ អាស៊ីអាគ្នេយ៍ ដែលស្ថិតនៅក្នុងមហាសមុទ្រប៉ាស៊ីហ្វិក ក៏នឹងត្រូវប្រឈមរងគ្រោះដោយសារបាតុភូតអែលនីញ៉ូ នៅចុងឆ្នាំនេះដែរ។ មួយវិញទៀត តាមរបាយការណ៍របស់អង្គការអក់ស្វាម ការឡើងកំដៅ ទឹកសមុទ្រដែលជាលទ្ធផលនៃការប្រែប្រួលអាកាសធាតុ នឹងអាចបណ្តាលឲ្យមានបាតុភូតអែលនីញ៉ូ កម្រិតខ្លាំង ឬហៅថា Superអែលនីញ៉ូនោះ កាន់តែញឹកញាប់ជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ