បារាំង និងក្រុមប្រទេសសម្ព័ន្ធមិត្តប្រារព្ធខួប ៧៥ឆ្នាំនៃការរំដោះបារាំងចេញកណ្តាប់ដៃអាល្លឺម៉ង់ណាហ្ស៊ី
៦ មិថុនា ១៩៤៤-៦ មិថុនា ២០១៩ ថ្ងៃនេះជាខួបគម្រប់ ៧៥ឆ្នាំនៃការរំដោះប្រទេសបារាំងចេញពីការឈ្លានពានរបស់អាល្លឺម៉ង់ណាហ្ស៊ី។ ក្នុងថ្ងៃទី៦ មិថុនា ឆ្នាំ ១៩៤៤ កម្លាំងសម្ព័ន្ធមិត្តដឹកនាំដោយសហរដ្ឋអាមេរិក មានកម្លាំងទ័ពជើងគោក ជើងអាកាស និងជើងទឹកសរុបជាង ១៥០ ០០០នាក់បានមកដល់ឆ្នេរសមុទ្រណរម៉ង់ឌី (Normandie) ស្ថិតប៉ែកខាងលិចប្រទេសបារាំងដើម្បីជួយគាំទ្រដល់កម្លាំងទ័ពបារាំងក្នុងការបណ្តេញទ័ពអាល្លឺម៉ង់ណាហ្ស៊ី។ តែមុននឹងរៀបចំធ្វើនៅឆ្នេរសមុទ្រណរម៉ង់ឌីចំថ្ងៃទី៦ មិថុនា ពិធីបុណ្យមួយនេះបានរៀបចំធ្វើនាថ្ងៃពុធ ទី៥ មិថុនានៅ Portsmouth ក្នុងប្រទេសអង់គ្លេស។ គឺនៅ Portsmouth ដែលជាទីកន្លែងចេញដំណើរតាមសមុទ្ររបស់កម្លាំងសម្ព័ន្ធមិត្តឆ្ពោះទៅកាន់ឆ្នេរសមុទ្រណរម៉ង់ឌី។ ពិធីរៀបចំនៅ Portmouth មានការចូលរួមប្រមាណជា ១៥ប្រទេស ព្រមទាំងប្រមុខរដ្ឋ និងប្រមុខរដ្ឋាភិបាលគ្រាក់ៗ ពិសេសប្រធានាធិបតីអាមេរិកលោកដូណាល់ ត្រាំ សមភាគីបារាំងលោកអេម៉ានុយអែល ម៉ាក្រុង មហាក្សត្រិយានីអង់គ្លេស Elizabeth ទី២ ឬប្រមុខរដ្ឋាភិបាលអង់គ្លេសលោកស្រីតេរ៉េហ្សាមេ។ បន្ទាប់ពីព្រះសុន្ទរកថារបស់មហាក្សត្រិយានីអង់គ្លេស Elizabeth ទី២ លោកម៉ាក្រុងបានអានសំបុត្រមួយរបស់អ្នកតស៊ូបារាំងម្នាក់ដែលបានសរសេរឲ្យម្តាយមុននឹងស្លាប់។ ចំណែកលោកត្រាំវិញបានអានសារមួយរបស់ប្រធានាធិបតីអាមេរិកជំនាន់នោះ គឺលោក Franklin Roosevlt។ លោក Roosevelt ដែលបានថ្លែងតាមវិទ្យុក្នុងយប់ថ្ងៃទី៦ មិថុនា ឆ្នាំ ១៩៤៤ ដោយស្នើឲ្យពលរដ្ឋអាមេរិកទាំងអស់ចូលរួមបន់ស្រន់ជាមួយលោកដើម្បីគាំទ្រដល់អ្នកដែលប្រយុទ្ធដើម្បីរំដោះមនុស្សជាតិពីក្តីឈឺចាប់។ តើខ្លឹមសារនៅក្នុងសាររបស់លោក Roosevelt មានអត្ថន័យយ៉ាងខ្លះ?។
ចុះផ្សាយនៅថ្ងៃ៖
ស្តាប់ - ០១:៣៧
« ព្រះដ៏មានមហិទ្ធិឫទ្ធិ ថ្ងៃនេះ កូនចៅរបស់ទូលព្រះបង្គំយើងបានផ្តើមបេកកម្មមួយដ៏អស្ចារ្យ នោះគឺការចេញប្រយុទ្ធដើម្បីរក្សាសាធារណរដ្ឋ សាសនា និងអារ្យធម៌ ព្រមទាំងដើម្បីរំដោះមនុស្សជាតិឲ្យរួចផុតពីការឈឺចាប់។
កូនចៅរបស់ទូលព្រះបង្គំយើងត្រូវការពរជ័យពីព្រះអង្គ ព្រោះខ្មាំងសត្រូវមានកម្លាំងខ្លាំងក្លាណាស់។ កម្លាំងរបស់ទូលព្រះបង្គំយើងអាចនឹងត្រូវខ្មាំងសត្រូវរុញថយក្រោយ តែកូនចៅរបស់ទូលព្រះបង្គំយើងនឹងរំកិលទៅមុខកាន់តែលឿនជាងមុន ហើយទូលព្រះបង្គំយើងដឹងថា ដោយសារតែព្រះគុណរបស់ព្រះអង្គ និងដោយសារភាពយុត្តិធម៌នៃបុព្វហេតុរបស់ទូលព្រះបង្គំយើង កូនចៅរបស់ទូលព្រះបង្គំយើងនឹងទទួលជ័យជំនះ។
តែទូលព្រះបង្គំយើងក៏បានដឹងថា មានកូនចៅខ្លះនឹងត្រូវបាត់បង់ជីវិតលើសមរភូមិដោយគ្មានថ្ងៃត្រឡប់មកផ្ទះវិញទេ។ សូមព្រះអង្គទទួលយកពួកគេក្នុងនាមជាអ្នកបម្រើដ៏ក្លាហាននៅក្នុងនគររបស់ព្រះអង្គ។ ឱព្រះអង្គអើយ សូមប្រទានសេចក្តីក្លាហានដល់ទូលព្រះបង្គំយើង ដល់កូនចៅរបស់ទូលព្រះបង្គំយើង។ ប្រទានឲ្យមានជំនឿទុកចិត្តលើគ្នាទៅវិញទៅមក និងនៅក្នុងរង្វង់សម្ព័ន្ធមិត្តរបស់ទូលព្រះបង្គំយើង ព្រះដ៏មានមហិទ្ធិឫទ្ធិ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ