បារាំង៖នាយករដ្ឋមន្រ្តីទទួលជួបតំណាងក្រុមអាវកាក់លឿង និងមេបក្សនយោបាយមកពីគ្រប់និន្នាការ
នៅក្នុងប្រទេសបារាំង លោកនាយករដ្ឋមន្រ្តីអេឌ័រ ហ្វីលីពបានផ្តើមទទួលជួបតំណាងចលនាអាវកាក់លឿង និងមេដឹកនាំបក្សនយោបាយមកពីគ្រប់និន្នាការ។ កម្មវត្ថុនៃជំនួបក្នុងថ្ងៃចន្ទ ទី៣ ធ្នូនេះបានធ្វើឡើង បន្ទាប់ពីមានផ្ទុះអំពើហិង្សាខ្លាំងក្លានាឱកាសបាតុកម្មរបស់ចលនាអាវកាក់លឿងក្នុងទីក្រុងប៉ារីសកាលពីថ្ងៃសៅរ៍ ទី១ ធ្នូ។ អ្វីដែលរដ្ឋាភិបាលចង់បានតាមរយៈជំនួបជាមួយគ្រប់តួអង្គពេលនេះ គឺការស្វែងរកច្រកចេញមួយដើម្បីបិទបញ្ចប់វិបត្តិដែលបានអូសបន្លាយតាំងពីជាង ៣សប្តាហ៍កន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
កម្មវិធីរបស់លោកអេឌ័រ ហ្វីលីពពេញមួយថ្ងៃចន្ទ ទី៣ ធ្នូនេះ គឺទទួលជួបមេបក្សនយោបាយមកពីគ្រប់និន្នាការទាំងអស់។ ឥស្សរជនដែលលោកអេឌ័រ ហ្វីលីពបានទទួលជួបមុនគេនៅព្រឹកព្រលឹមថ្ងៃចន្ទ ទី៣ ធ្នូនេះ គឺចៅហ្វាយក្រុងប៉ារីសលោកស្រីអាន ហ៊ីដាល់ហ្គូ (Anne Hidalgo)។ ជាមួយលោកហ្វីលីព លោកស្រីអានបានធ្វើតុល្យការរួមស្តីពីអំពើហិង្សា និងការខូចខាតនៅក្នុងទីក្រុងប៉ារីស ពិសេសតំបន់ដែលបានរងគ្រោះដោយអំពើហិង្សាកាលពីថ្ងៃសៅរ៍ ទី១ធ្នូ។ ទន្ទឹមគ្នានេះ ចៅហ្វាយក្រុងប៉ារីសក៏បានលើកយកទៅនិយាយជាមួយលោកនាយករដ្ឋមន្រ្តីពីក្តីបារម្ភទាក់ទងនឹងគម្រោងបាតុកម្មរបស់ចលនាអាវកាក់លឿងនៅថ្ងៃសៅរ៍ ទី៨ ធ្នូចុងសប្តាហ៍នេះ។
បន្ទាប់ពីចៅហ្វាយក្រុងប៉ារីស លោកអេឌ័រ ហ្វីលីពបន្តទទួលជួបមេបក្សនយោបាយសំខាន់ៗ ទាំងបក្សដែលមានសម្លេងនៅក្នុងសភា និងបក្សដែលគ្មានសម្លេងនៅក្នុងសភា។ ចំណែកជំនួបជាមួយក្រុមអ្នកតំណាងឲ្យចលនាអាវកាក់លឿងនឹងត្រូវធ្វើឡើងនៅថ្ងៃអង្គារ ទី៤ ធ្នូ។ បន្ទាប់នៅថ្ងៃពុធ ទី៥ ធ្នូ វិបត្តិអាវកាក់លឿងនឹងត្រូវលើកយកទៅតស៊ូមតិនៅក្នុងរដ្ឋសភា។ ការទទួលជួបមេបក្សនយោបាយមកពីគ្រប់និន្នាការ និងក្រុមអ្នកតំណាងអាវកាក់លឿងពីសំណាក់ប្រមុខរដ្ឋាភិបាលពេលនេះបានធ្វើឡើង បន្ទាប់ពីមានអំពើហិង្សាវាយកម្ទេច និងដុតបំផ្លាញយ៉ាងហិង្សានៅក្នុងក្បួនបាតុកម្មរបស់ពួកអាវកាក់លឿងកាលពីថ្ងៃសៅរ៍ ទី១ ធ្នូចំកណ្តាលបេះដូងក្រុងប៉ារីស។
ការរៀបចំឲ្យមានជំនួបពេលនេះ គឺបន្ទាប់ពីលោកប្រធានាធិបតីម៉ាក្រុងបានកោះប្រជុំបន្ទាន់ជាមួយលោកនាយករដ្ឋមន្រ្តី និងលោករដ្ឋមន្រ្តីមហាផ្ទៃកាលពីថ្ងៃអាទិត្យ ទី២ ធ្នូ។ ឃើញថា លោកអេឌ័រ ហ្វីលីពត្រូវបានលោកម៉ាក្រុងបញ្ជូនឲ្យឈរខ្សែបន្ទាត់មុខដើម្បីស្វែងរកច្រកចេញពីវិបត្តិដែលបានអូសបន្លាយតាំងពី ៣សប្តាហ៍។ គេនៅមិនទាន់ដឹងថា តើវិបត្តិមួយនេះអាចនឹងចេញតាមច្រកណាមួយ និងថា តើរដ្ឋាភិបាលយល់ព្រមដកគម្រោងដំឡើងពន្ធលើប្រេងឥន្ធនៈដូចដែលពួកអាវកាក់លឿងបានទាមទារឬអត់ទេ។
អ្វីដែលគេដឹង បុព្វហេតុរបស់ពួកបាតុករហាក់បានឆ្លងរាលដាលលើសពីការទាមទារពីដំបូងរបស់ពួកគេទៅទៀត ពិសេសប្រឆាំងនឹងទំនិញឡើងថ្លៃ និងជីវភាពរស់នៅប្រចាំថ្ងៃលំបាកលំបិន។ នៅក្នុងន័យនេះ មានសម្រែកទាមទារពីពួកអាវកាក់លឿងឲ្យលោកម៉ាក្រុងចុះពីតំណែង ហើយមេដឹកនាំបក្សនយោបាយខ្លះបានអំពាវនាវត្រង់ៗឲ្យមានការរៀបចំបោះឆ្នោតសភាមុនការកំណត់។ កំណត់សម្គាល់មួយទៀត ចលនាអាវកាក់លឿងហាក់ទទួលបានការគាំទ្រពីពលរដ្ឋបារាំងកាន់តែច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ