បារាំង៖បេះដូងក្រុងប៉ារីសបានគ្របដណ្តប់ដោយអណ្តាតភ្លើង និងផ្សែងខ្មួលខ្មាញ់
នៅក្នុងប្រទេសបារាំង ក្បួនបាតុកម្មរបស់ក្រុមអាវកាក់លឿងពេញមួយថ្ងៃសៅរ៍ ទី១ ធ្នូបានប្រែក្លាយទីក្រុងប៉ារីសជាសមរភូមិនៃការប្រឈមមុខដាក់គ្នាយ៉ាងហិង្សារវាងក្រុមអ្នកកម្ទេច បំផ្លាញ និងកម្លាំងប៉ូលិស។ ក្រុមអ្នកកម្ទេច បំផ្លាញបាននាំគ្នាដុតឡាន និងវត្ថុមួយចំនួននៅតាមមហាវិថីនានាក្បែរស៊ុមជ័យ (Arc de Triomphe) ដោយបានធ្វើឲ្យទីក្រុងប៉ារីសគ្របដណ្តប់ដោយអណ្តាតភ្លើង និងផ្សែងខ្មួលខ្មាញ់។ មានមនុស្សជាង ១៥០នាក់ត្រូវបានចាប់ខ្លួន ហើយលោកនាយករដ្ឋមន្រ្តីបារាំងអេឌ័រ ហ្វីលីពបានអះអាងពីភាពតក់ស្លុតដែលបានឃើញនិមិត្តរូបរបស់បារាំងរងការវាយប្រហារ។ ទន្ទឹមគ្នានេះ លោកហ្វីលីបបានបញ្ជាក់ច្បាស់ពីការមិនអត់ឱនឲ្យក្រុម ឬជនដែលបានបន្លំខ្លួនជាមួយហ្វូងបាតុករអហិង្សាក្នុងគោលដៅបំផ្លាញ និងបង្កភាពវឹកវរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
« ខ្ញុំចង់និយាយថា ខ្ញុំមានការរន្ធត់ខ្លាំងណាស់ចំពោះការបំផ្លាញនិមិត្តរូបដែលសុទ្ធសឹងជានិមិត្តរូបរបស់ប្រទេសបារាំង។ ដូចយ៉ាងការប្រើថ្នាំលាបបាញ់គូរនៅលើជញ្ជាំង Arc de Triomphe និងក្បួនបាតុកម្មហិង្សានៅក្បែរផ្នូរសពទាហានមិនស្គាល់អត្តសញ្ញាណ។ ខ្ញុំមិនពេញចិត្តនឹងរូបភាពទាំងអស់នេះទាល់តែសោះ រូបភាពទាំងអស់នេះបានធ្វើឲ្យខ្ញុំរន្ធត់។
ខ្ញុំចង់និយាយថាដើម្បីឲ្យមានការគោរពច្បាប់ រដ្ឋាភិបាលបានប្តេជ្ញាចិត្តនឹងធ្វើអ្វីៗគ្រប់យ៉ាងទាំងអស់ដើម្បីធ្វើយ៉ាងណាឲ្យក្បួនបាតុកម្មនេះមានលក្ខណៈអហិង្សា។ ហើយរដ្ឋាភិបាលនឹងមិនអត់ឱនឲ្យជាដាច់ខាតចំពោះក្រុមដែលបានចូលបន្លំខ្លួនក្នុងបំណងតែមួយគត់ គឺវាយកម្ទេច ដុតបំផ្លាញ ញុះញង់ជាមួយកម្លាំងប៉ូលិស ឬការប្រើភាសាបដិវត្ត។
យើងនឹងមិនលើកលែងចំពោះក្រុម ឬជនដែលបានធ្វើសកម្មភាពមួយចំនួនដោយមិនមានជាប់ទាក់ទងនឹងបញ្ហាដែលបានលើកឡើងដោយប្រធានាធិបតី និងដែលរដ្ឋាភិបាលកំពុងត្រៀមខ្លួនដើម្បីដោះស្រាយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ