អាមេរិក៖លោកដូណាល់ ត្រាំបន្តសង្រ្គាមពាណិជ្ជកម្មដោយចង់ដំឡើងពន្ធលើរថយន្តដែលនាំចូលអាមេរិក
នៅសហរដ្ឋអាមេរិក លោកដូណាល់ ត្រាំបានប្រកាសឲ្យដឹងពីបំណងចង់ដំឡើងពន្ធចំនួន ២៥% លើរថយន្តដែលនាំចូលអាមេរិក។ តាមរយៈសារជាច្រើននៅក្នុងបណ្តាញសង្គម Tweeter នាថ្ងៃពុធ ទី២៨ វិច្ឆិកា លោកត្រាំបានបញ្ជាក់ពីហេតុផលចង់ការពារឧស្សាហកម្មរថយន្តរបស់អាមេរិកក្នុងពេលដែលក្រុមហ៊ុន General Motors ប្រកាសពីគម្រោងកាត់បន្ថយបុគ្គលិក។ ឧស្សាហកម្មរថយន្តអឺរ៉ុបត្រូវបានគេមើលឃើញថា ជាផ្ទាំងស៊ីបនៃការវាយប្រហាររបស់លោកត្រាំ ពិសេសប្រទេសអាល្លឺម៉ង់ដែលឧស្សាហកម្មរថយន្តជាដង្ហើមសេដ្ឋកិច្ចមួយយ៉ាងសំខាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ផែនការរបស់លោកដូណាល់ ត្រាំដែលចង់ដំឡើងពន្ធ ២៥% លើរថយន្តនាំចូលអាមេរិកមិនមែនជារឿងថ្មីទេ។ មិនមែនជារឿងថ្មីព្រោះនៅដំណាច់ខែឧសភាកន្លងទៅ សេតវិមានធ្លាប់បានបញ្ជាក់ពីជំហរដូចគ្នានេះម្តងហើយដើម្បីការពារឧស្សាហកម្មរថយន្តរបស់អាមេរិក។ តែផែនការមួយនេះត្រូវបានផ្អាកវិញ បន្ទាប់ពីមានកិច្ចព្រមព្រៀងរវាងលោកដូណាល់ ត្រាំ និងលោកប្រធានគណៈកម្មការអឺរ៉ុប Jean-Claude Juncker ក្នុងខែកក្កដា។ តែអ្វីជាការកត់សម្គាល់ ការដែលលោកត្រាំបានត្រឡប់មកនិយាយជាថ្មីពីបញ្ហានេះក៏ដោយសារថា ក្រុមហ៊ុនផលិតរថយន្តអាមេរិក General Motors កំពុងជួបវិបត្តិ និងគ្រោងលុបចោល ១៥ ០០០ការងារនៅអាមេរិក។
ព័ត៌មានមួយនេះបានបញ្ឆេះកំហឹងលោកដូណាល់ ត្រាំដោយលោកបានសរសេរច្បាស់ៗនៅក្នុងបណ្តាញសង្គម Tweeter នាថ្ងៃពុធ ទី២៨ វិច្ឆិកាថា បើរថយន្តនាំចូលអាមេរិកនឹងត្រូវដំឡើងពន្ធ ២៥% នោះក្រុមហ៊ុនផលិតរថយន្តអាមេរិក General Motors នឹងមិនបិទទ្វារទេ។ គួររម្លឹកថាក្នុងឆ្នាំ ២០១៧ មានរថយន្តជាង ៨លានគ្រឿងក្នុងចំណោមរថយន្តប្រមាណ ១៧លានគ្រឿងបាននាំចូលពីបរទេស។ ទន្ទឹមនឹងចង់ដំឡើងពន្ធលើរថយន្តនាំចូលអាមេរិក លោកត្រាំក៏ឆ្លៀតបរិហារចិនដែលបានយកពន្ធលើរថយន្តអាមេរិកនាំចូលចិនដល់ទៅ ៤០% ហើយបែរជាយកពីអ្នកផ្សេងតែ ១៥% ប៉ុណ្ណោះ។
បើតាមកាសែតអាល្លឺម៉ង់ សហភាពអឺរ៉ុបអាចនឹងក្លាយជាផ្ទាំងស៊ីបនៃការដំឡើងពន្ធលើរថយន្តនាំចូលអាមេរិករបស់លោកត្រាំ ហលយវិធានការមួយនេះនឹងអាចប្រកាសនៅសប្តាហ៍ក្រោយ ពោលបន្ទាប់ពីជំនួបកំពូល G២០ ក្នុងប្រទេសអាហ្សង់ទីន។ ប្រតិកម្មពីសហភាពអឺរ៉ុប ស្នងការទទួលបន្ទុកពាណិជ្ជកម្មលោកស្រី Cecilia Malmström បានថ្លែងនាឱកាសទស្សនកិច្ចនៅអាមេរិកថា អឺរ៉ុបបានត្រៀមបញ្ជីឈ្មោះផលិតផលដែលត្រូវដំឡើងពន្ធវិញ បើអាមេរិកហ៊ានដំឡើងពន្ធលើរថយន្តអឺរ៉ុបនាំចូលអាមេរិកនោះ។ ស្របគ្នានេះ លោកស្រី Malmström ក៏ឆ្លៀតរម្លឹកពីកិច្ចព្រមព្រៀងក្នុងខែកក្កដារវាងលោកដូណាល់ ត្រាំ និងលោក Jean-Claude Juncker។
លោកត្រាំ និងលោក Juncker ដែលត្រូវចូលរួមនៅក្នុងជំនួបកំពូល G២០ នៅប្រទេសអាហ្សង់ទីនដូចគ្នា តែឥស្សរជនទាំងពីរគ្មានគម្រោងនឹងជួបគ្នាជាលក្ខណៈទ្វេភាគីទេនៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ