លោកJean-Yves Le Drian៖"ការវាយប្រយុទ្ធដើម្បីយកក្រុងRaqa នឹងចាប់ផ្តើមធ្វើនៅថ្ងៃខាងមុខនេះ
រដ្ឋមន្ត្រីក្រសួងការពារជាតិបារាំងលោក Jean-Yves Le Drian ទើបបានថ្លែងនៅព្រឹកមិញនេះថា ការវាយប្រយុទ្ធដើម្បីដណ្តើមយកក្រុង Raqa ដែនអំណាចរបស់អង្គការរដ្ឋអ៊ីស្លាមនៅស៊ីរី នឹងចាប់ផ្តើមធ្វើនៅថ្ងៃខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
រដ្ឋមន្ត្រីក្រសួងការពារជាតិបារាំងលោក Jean-Yves Le Drian នាព្រឹកមិញនេះ តាមរយៈបណ្តាញផ្សព្វផ្សាយព័តមានបារាំងឈ្មោះ CNEWS បានថ្លែងប្រាប់ថា “ បច្ចុប្បន្ននេះគេអាចនិយាយថា ក្រុងRaqaត្រូវបានឡោមព័ទ្ធ ហើយការប្រយុទ្ធដើម្បីដណ្តើមយកRaqa មកវិញនោះនឹងត្រូវចាប់ផ្តើមនៅថ្ងៃខាងមុខនេះ។ ក្រុង Raqa របស់ស៊ីរីជាមួយក្រុង Mossoul អ៊ីរ៉ាក់ ជាតំបន់ដែលកងកម្លាំងអ៊ីរ៉ាក់ដឹកនាំការវាយប្រយុទ្ធតាំងពីពាក់កណ្តាលខែតុលាឆ្នាំមុនមកម្ល៉េះ ដើម្បីដណ្តើមយកពីការកាន់កាប់របស់អង្គការរដ្ឋអ៊ីស្លាមមកវិញ។
ការប្រយុទ្ធគ្នាដើម្បីយកក្រុង Raqa ពីអង្គការរដ្ឋអ៊ីស្លាមមកវិញ ចំពោះការកត់សម្គាល់របស់រដ្ឋមន្ត្រីក្រសួងការពារជាតិបារាំង គឺជាការប្រយុទ្ធគ្នាមួយដ៏សែនលំបាក ក៏ប៉ុន្តែ វាជាការចាំបាច់ ពីព្រោះនៅខណៈពេលដែលតំបន់ទាំងពីរនេះ ត្រូវដណ្តើមបានមកវិញម្ខាងដោយកងទ័ពអ៊ីរ៉ាក់និងម្ខាងទៀតដោយកងកម្លាំងប្រដាប់អាវុធអារ៉ាប-គួដ គឺនៅពេលនោះហើយដែលអង្គការរដ្ឋអ៊ីស្លាមពិតជានឹងជួបនូវការលំបាកជាមិនខានឡើយ។
លោក Jean-Yves Le Drian បានគូសបញ្ជាក់ទៀតថា “មេដឹកនាំអង្គការរដ្ឋអ៊ីស្លាម Abou Bakr Al-Bagdadi សព្វថ្ងៃនេះ កំពុងជួបប្រទះនឹងភាពលំបាកដូច្នេះយើងត្រូវតែបន្តដាក់សម្ពាធឲ្យកាន់តែខាំ្លងថែមទៀតទៅលើពួកជីហាត”។ រដ្ឋមន្ត្រីការពារជាតិបារាំងថែមទាំងបានបង្ហើបឲ្យដឹងជាមុនដែរថា លោកនឹងត្រូវអញ្ជើញទៅកាន់ទីក្រុងវ៉ាស៊ីនតោន ដើម្បីចូលរួមការប្រជុំមួយជាមួយសមភាគីអាមេរិកលោក James Mattis នៅថ្ងៃខាងមុខនេះ។
រដ្ឋមន្ត្រីក្រសួងការពារជាតិបារាំង ថែមទាំងថ្លែងសង្កត់ពាក្យទៀតថា” អង្គការរដ្ឋអ៊ីស្លាមនឹងត្រូវទទួលបរាជ័យ”ដោយលោកបានបញ្ជាក់បន្ថែមទៀតថា”សកម្មភាពរួមគ្នាជាមួយនឹងកងកម្លាំងអ៊ីរ៉ាក់និងកងទ័ពសម្ព័ន្ធដែលមានបារាំងចូលរួមដែរនោះ ពិតជានឹងហុចលទ្ធផលចំរើនទៅមុខជាមិនខាននៅក្នុងការវាយដណ្តើមយកទីក្រុង Mossoul។
ប្រទេសបារាំងដែលចូលរួមនៅក្នុងការប្រយុទ្ធប្រឆាំងទល់នឹងពួកអ៊ីស្លាមជីហាត មានយោធារបស់ខ្លួនចំនួន ១ ៥០០ នាក់ក្នុងនោះ គឺកងអាកាសយានិក-កងកាំភ្លើងធំ-និងទីប្រឹក្សាជំនួយកម្លាំងទ័ពអ៊ីរ៉ាក់។
នៅអ៊ីរ៉ាក់ កាំភ្លើងកាណុងរបស់បារាំងឈ្មោះ Caesar បានបាញ់ផ្លោងក្នុងមួយថ្ងៃៗជាង១០០គ្រាប់ ជួយគាំទ្រកងកម្លាំងទ័ពអ៊ីរ៉ាក់នៅក្នុងការវាយដណ្តើមយកទីក្រុងMossoul -នេះជាការលើកឡើងរបស់រដ្ឋមន្ត្រីការពារជាតិបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ