រុស្ស៊ី បានបញ្ចេញ យុទ្ធសាស្ត្រថ្មីខាងសុវត្ថិភាពពត៏មានវិទ្យា
ថ្ងៃអង្គារ ៦ធ្នូ លោកប្រធានាធិបតីពូទីន បានចេញក្រិត្យអនុម័តយុទ្ធសាស្ត្រថ្មីខាងសុវត្ថិភាពព័ត៌មានវិទ្យា ដែលឆ្ពោះទៅការពារសហព័ន្ធរុស្ស៊ី ទល់នឹងការគម្រាមវាយប្រហារ មកលើបណ្តាញកុំព្យូទ័រប្រទេស ព្រមទាំងទល់នឹង “ឥទ្ធិពល“ បរទេស ដែលសំដៅបំផ្លាញ “តម្លៃសាសនា និង តម្លៃសីលធម៌ ជាប្រពៃណីរបស់រដ្ឋរុស្ស៊ី។ យុទ្ធសាស្ត្រថ្មីនេះ តាក់តែងឡើង ដោយក្រុមប្រឹក្សាសន្តិសុខជាតិរុស្ស៊ី ចូលខ្លួនទៅជំនួសយុទ្ធសាស្ត្រឆ្នាំ២០០០ ដែលលែងមានសុពលភាពទៀតឡើយ។
ចុះផ្សាយនៅថ្ងៃ៖
ស្តាប់ - ០១:៥៧
អត្ថបទយុទ្ធសាស្ត្រថ្មី អនុម័តដោយលោកប្រធានាធិបតីរុស្ស៊ី វ៉្លាឌីមៀរ ពូទីន ដក់ជាប់ ដោយមុខព្រួញធំៗជាគោល ខាងធានាសុវត្ថិភាពព័ត៌មានវិទ្យា។ តាមធាតុពិតដែលមាន វាបង្គ្រប់ឲ្យបានពេញន័យតែម្តង យុទ្ធសាស្ត្រថ្មីនៃនយោបាយក្រៅប្រទេសរុស្ស៊ី អនុម័តក្នុងសប្តាហ៍មុន ដោយប្រមុខរដ្ឋរុស្ស៊ីដែរ។
ចាប់ពីអំណើះតទៅ គឺរដ្ឋាភិបាលនិងទីភ្នាក់ងារសហព័ន្ធនានា ជាពិសេស ខាងបញ្ហាសន្តិសុខ ដែលត្រូវប្រតិបត្តិតាមយុទ្ធសាស្ត្រនេះ។
យុទ្ធសាស្ត្រថ្មី ដែលតាក់តែងដោយក្រុមប្រឹក្សាសន្តិសុខរុស្ស៊ី តាំងគោលដៅ “ទប់ស្កាត់ជាមុន ទល់នឹងជម្លោះយោធា ដែលអាចបង្កឲ្យប្រើបច្ចេកវិជ្ជាព័ត៌មានវិទ្យា”។ យុទ្ធសាស្ត្រនេះ តម្រង់ទៅ “ការពារអធិបតេយ្យភាព ស្ថិរភាពនយោបាយនិងសង្គម បូរណភាពដែនដីរបស់រុស្ស៊ី”។
ដោយសង្កេតឃើញ ការគម្រាមមកលើរុស្ស៊ី ចេះតែកើនកម្រិត រហូតដល់ប្រមាញ់ “ទីដៅយោធានានារបស់រុស្ស៊ីទៅផង” បានជាតាមរយៈយុទ្ធសាស្ត្រនេះ កងទ័ពរុស្ស៊ី នឹងកែឲ្យប្រសើរឡើងសុវត្ថិភាពព័ត៌មានវិទ្យារបស់ខ្លួន។
ទន្ទឹមនេះ ក្រិត្យលោកពូទីន “កត់ត្រាថា ប្រព័ន្ធផ្សព្វផ្សាយបស្ចិមលោក វក់កាន់តែខ្លាំងឡើងៗ នឹងការចេញផ្សាយអត្ថបទ ពោរពេញដោយសំដីសំដៅអវិជ្ជមាន អំពីនយោបាយប្រទេសរុស្ស៊ី។ ម៉្លោះហើយបានជាយុទ្ធសាស្ត្រចែងថា “ត្រូវតែប្រឆាំងទល់នឹងការប៉ុនប៉ងណាដែលជះឥទ្ធិពលមកលើប្រជាជនរុស្ស៊ី ជាពិសេស មកលើយុវជន ប្រកបដោយចេតនា បង្ហិនបង្ហោច បន្តិចម្តងៗ តម្លៃសាសនានិងតម្លៃសីលធម៌ជាប្រពៃណីរបស់រដ្ឋរុស្ស៊ី”។
គោលដៅមួយទៀត នៃយុទ្ធសាស្ត្រ គឺ ជួយពួកអ្នកកាសែតរុស្ស៊ី ដែលរមែងរងការរើសអើង ដោយចំហត្រង់ៗ និង រាំងរាដោយឧបសគ្គមិនចេះចប់ ក្នុងការបំពេញមុខរបរអាជីពរបស់ខ្លួន។
យុទ្ធសាស្ត្រដែលមាន ក៏តាំងគោលដៅ “អភិវឌ្ឍន៍ប្រព័ន្ធជាតិខាងត្រួតពិនិត្យលើ”បណ្តាញ អ៊ិនធ័រនែតរុស្ស៊ី ខណៈដែលលោកពូទីន បន្ទាប់ពីគាត់ជាប់ឆ្នោតជា ប្រធានាធិបតីអាណត្តិថ្មី តាំងពីឆ្នាំ២០១២មក បានបង្កើនចំនួនច្បាប់ដែលរឹតបន្តឹងការត្រួតពិនិត្យរបស់រដ្ឋ លើអ៊ិនធ័រនែត ក្រោមផ្លាកប្រយុទ្ធទល់នឹងពួកជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ