ឥណ្ឌូណេស៊ី រងគ្រោះសាជាថ្មី ដោយសារគ្រោះរញ្ជួយដី និងរលកយក្សស៊ូណាមី
គ្រោះរញ្ជួយដី និងរលកយក្សស៊ូណាមីបានវាយប្រហារ ទៅលើកោះមួយរបស់ឥណ្ឌូណេស៊ី កាលពីល្ងាចថ្ងៃសុក្រម្សិលមិញ។ តួលេខផ្តល់ដោយមន្ទីរពេទ្យ បានបង្ហាញថា ចំនួនអ្នកស្លាប់មានជិត ៤០០នាក់ ហើយនិងរបួស ជាង៥០០នាក់ ចំណែកសំណង់រាប់ពាន់កន្លែង ដូចជាផ្ទះ មន្ទីរពេទ្យ សណ្ឋាគារ ផ្សារទំនើប ហើយនិងស្ពាន បានបាក់ស្រុត ដោយសារតែគ្រោះរញ្ជួយដី ហើយនិងការបោកវាយរបស់រលកយក្សស៊ូណាមី។ អ្នកនាំពាក្យរបស់ទីភ្នាក់ងារគ្រប់គ្រងគ្រោះមហន្តរាយ បានព្រមានពីការកើនឡើងនៃតួលេខជនរងគ្រោះដោយសារគ្រោះមហន្តរាយធម្មជាតិលើកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គ្រោះរញ្ជួយដី ក្នុងកម្រិត ៧,៥មាត្រដ្ឋានរិចទែរ បានបណ្តាលឲ្យមានទឹករលកកំពស់ជិត ៦ម៉ែត្រ បោកវាយទៅលើទីក្រុងជាប់ឆ្នេរ សមុទ្រ Palu របស់កោះ ស៊ូឡាវេស៊ី Sulawesiរបស់ឥណ្ឌូណេស៊ី។ ទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី បានទទួលតួលេខពីមន្ទីរពេទ្យដែលបង្ហាញពីចំនួនអ្នកស្លាប់កើនឡើងដល់៣៨៤នាក់ និងអ្នករងរបួសធ្ងន់ ៥៤០នាក់ ដោយសារគ្រោះរញ្ជួយដី និងរលកយក្សស៊ូណាមី កាលពីថ្ងៃសុក្រ។
តាមអ្នកនាំពាក្យរបស់ទីភ្នាក់ងារគ្រប់គ្រងគ្រោះមហន្តរាយ នៅពេលគេប្រកាសព្រមានពីរលកយក្សស៊ូណាមី មនុស្សម្នារស្ថិតនៅលើឆ្នេរនៅឡើយ គឺមិនបានរត់គេចចេញភ្លាមៗនោះទេ។ នៅថ្ងៃសុក្រម្សិលមិញ មនុស្សរាប់រយនាក់បានជួបជុំគ្នា នៅលើឆ្នេរក្នុងទីក្រុងPalu ដើម្បីត្រៀមរៀបចំប្រារព្ធខួបទីក្រុង នៅយប់ថ្ងៃសុក្រ។ មន្រ្តីរដ្ឋាភិបាលឥណ្ឌូណេស៊ីព្រួយបារម្ភផងដែរពីជោគវាសនារបស់មនុស្សរាប់រយនាក់ផ្សេងទៀត ដែលអាចនៅជាប់សង្កត់ ក្រោមបំណែកថ្មបាក់បែករបស់អគារផ្សារទំនើប ហើយនិងសណ្ឋាគារ។
គ្រោះរញ្ជួយដីនិងរលកយក្សស៊ូណាមីបានបំផ្លាញផងដែរ ព្រលានយន្តហោះ និងបណ្តាញអគ្គិសនី ដែលធ្វើឲ្យអាជ្ញាធរពិបាកនឹងទាក់ទងគ្នា ដើម្បីផ្តល់ជំនួយសង្រ្គោះបន្ទាន់។ តាមក្រសួងសន្តិសុខជាតិឥណ្ឌូណេស៊ី យន្តហោះយោធា ដឹកជំនួយ មនុស្សធម៌បានហោះចេញរួចហើយពីទីក្រុងហ្សាកាតា ប៉ុន្តែ ប្រតិបត្តិការជួយសង្រ្គោះ មិនទាន់អាចធ្វើទៅបានដោយសារតែព្រលានយន្តហោះរបស់ទីក្រុងត្រូវបានបំផ្លាញ។
គ្រោះរញ្ជួយដីកាលពីថ្ងៃម្សិលមិញ ក្នុងកម្រិត ៧,៥មាត្រដ្ឋានរិចទែរ មានកម្លាំងខ្លាំងជាងគ្រោះរញ្ជួយដី ដែលបានវាយប្រហារដល់ទៅពីរដង កោះLambok កាលពីខែកក្កដា និងសីហាកន្លងទៅ និងដែលបានសម្លាប់មនុស្សសរុបជាង ៥០០នាក់។
ឥណ្ឌូណេស៊ី ដែលជាប្រជុំកោះ ស្ថិត នៅលើបណ្តោយ ខ្សែក្រវ៉ាត់ភ្នំភ្លើងរបស់មហាសមុទ្រ ប៉ាស៊ីហ្វិក ឧស្សាហ៍ជួបរងគ្រោះជាញឹកញាប់ ដោយសារគ្រោះរញ្ជួយដី និងរលកយក្សស៊ូណាមី។ គ្រោះរញ្ជួយដី ដែលកាចអាក្រក់ជាងគេ គឺគ្រោះរញ្ជួយដី កាលពីឆ្នាំ ២០០៤ ដែលមានកម្រិត៩,១មាត្រដ្ឋានរិចទែរ និងដែលបង្កជារលកយក្សស៊ូណាមី សម្លាប់មនុស្ស ២២០ ០០០នាក់ នៅអាស៊ី ដែលនៅក្នុងនោះ មានជាង ១សែន ៦ម៉ឺននាក់ នៅឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ