ដំណើរទស្សនកិច្ចដើម្បីសន្តិភាពរបស់សម្តេចប៉ាប ហ្វ្រង់ស័រ នៅប្រទេសកូឡុំប៊ី
ប្រមុខសាសនាកាតូលិក សម្តេចប៉ាប ហ្វ្រង់ស័រ តាំងពីល្ងាចថ្ងៃពុធម្សិលមិញ បានចាប់ផ្តើមធ្វើទស្សនកិច្ច នៅប្រទេសកូឡុំប៊ី។ គោលដៅនៃទស្សនកិច្ច រយៈពេល ៥ថ្ងៃ របស់ប្រមុខសាសនាកាតូលិក គឺដើម្បី ជំរុញ គាំទ្រកិច្ចព្រមព្រៀងសន្តិភាព ដ៏ផុយស្រួយ ដែលរដ្ឋាភិបាលកូឡុំប៊ី ទើបសម្រេចចុះបានជាមួយ ក្រុមឧទ្ទាមទ័ពព្រៃ ចាស់ឆ្នាំ ហ្វាក FARC កាលពីឆ្នាំទៅមិញ។
ចុះផ្សាយនៅថ្ងៃ៖
សម្តេចប៉ាប ហ្វ្រង់ស័រ មានវត្តមានក្នុងទឹកដីកូឡុំប៊ី ដើម្បី គាំទ្រនយោបាយផ្សះផ្សារជាតិ របស់ប្រទេសមួយនេះ។ នៅ កូឡុំប៊ី សម្តេចប៉ាប ហ្វ្រង់ស័រនឹងឆ្លៀតលើកឡើងផងដែររូបភាពផ្ទុយគ្នារបស់កូឡុំប៊ី ប្រទេសមួយនៃតំបន់អាមេរិកខាងត្បូង។ ផ្ទុយគ្នា ព្រោះថា ប្រជាជនរបស់កូឡុំប៊ីជឿកាន់គោរពគ្រិស្តសាសនា ប៉ុន្តែ កូឡុំប៊ីក៏ជាប្រទេសដែលហិង្សាណាស់ដែរ។ កូឡុំប៊ី ដែលសំបូរដោយការជួយដូរ គ្រប់ប្រភេទ មិនថា មនុស្ស ឬថ្នាំញៀន ត្រូវបានគេស្គាល់ផងដែរ ថាជាប្រទេសដែលសំបូរដោយចលនាទ័ពព្រៃ ប្រឆាំងរដ្ឋាភិបាល។
សម្រាប់ ប្រមុខសាសនាកាតូលិក ប៉ាប ហ្រ្វង់ស័រ ទស្សនកិច្ចទៅកូឡុំប៊ីលើកនេះ ជាទស្សនកិច្ចពិសេស ដែលនៅក្នុងនោះ ព្រះអង្គនឹងជួយជំរុញលើកទឹកចិត្តប្រជាជនកូឡុំប៊ី លះបង់ចោល អតីតកាលដ៏ហិង្សា និងយល់ព្រម ដើរទៅមុខ នៅលើផ្លូវសន្តិភាព ដែលរដ្ឋាភិបាលរបស់លោកប្រធានាធិបតីរ័ន ម៉ានុយអែល សាន់តូស ទើបតែនាំយកមកឲ្យ ប្រទេស កាលពីឆ្នាំមុន។ ជាប្រវត្តិសាស្រ្ត រដ្ឋាភិបាលកូឡុំប៊ី ដឹកនាំដោយជ័យលាភីណូបែលសន្តិភាព សម្រេចចុះបាន កិច្ចព្រមព្រៀងសន្តិភាពជាមួយពួកឧទ្ទាមទ័ពព្រៃ ហ្វាក ដើម្បីបិទបញ្ចប់ជម្លោះប្រដាប់អាវុធ ដ៏រ៉ាំរ៉ៃ ដែលបានញាំញី កូឡុំប៊ី រយៈពេល ៥២ឆ្នាំ និងដែលបានសម្លាប់មនុស្ស ជិត៣សែន (២៦០ ០០០នាក់ ស្លាប់ និងជនភៀសខ្លួនចំនួន ៧លាននាក់)។
សម្តេចប៉ាបហ្វ្រង់ស័រ ធ្វើដំណើរទៅកូឡុំប៊ី នៅក្នុងកាលៈទេសៈដែលប្រទេសនេះ ទើបបានស្គាល់ ឡើងវិញ រសជាតិសន្តិភាព គួរឲ្យជឿជាក់ ព្រោះថា ក្រៅតែពីទ័ពព្រៃ ជិត ៧ពាន់នាក់របស់ក្រុមហ្វាក យល់ព្រមទម្លាក់អាវុធ នៅឆ្នាំនេះហើយនោះ ចលនាឧទ្ទាមទ័ពព្រៃមួយទៀត ដែលតូចជាងហ្វាក ក៏ទើបចុះបានកិច្ចព្រមព្រៀង លើបទឈប់បាញ់ កាលពីថ្ងៃចន្ទ កន្លងទៅ គឺ ៣ថ្ងៃមុន ដំណើរទស្សនកិច្ចរបស់ប្រមុខសង្ឃកាតូលិក ប៉ាប ហ្វ្រង់ស័រ នៅ កូឡុំប៊ី។
វត្តមានរបស់សម្តេចប៉ាប ហ្វ្រង់ស័រ នៅបានបង្កឲ្យមានអព្ភូតហេតុដ៏អស្ចារ្យ មួយទៀត នោះ គឺសូម្បីតែមេក្រុមម៉ាហ្វីយ៉ា ដ៏ល្បីឈ្មោះរបស់កូឡុំប៊ី Dario Usuga ឈ្មោះហៅក្រៅ Otoniel ក៏បានយល់ព្រម ចេញមុខជាលើកទី១ នៅទូរទស្សន៍ និងចង់ប្រគល់ខ្លួនឲ្យអាជ្ញាធរដែរ។ លក្ខខណ្ឌអំណោយផលខាងលើ នឹងជួយឲ្យសម្តេចប៉ាបហ្រ្វង់ស័រ កាន់តែមានកម្លាំងចិត្ត ដើម្បីបញ្ចុះបញ្ចូលឲ្យកូឡុំប៊ី លះបង់ចោលទាំងស្រុង ប្រពៃណី ធ្វើសង្រ្គាមទ័ពព្រៃ និងត្រលប់មករួមគ្នា ដើម្បីទទួលយកប្រយោជន៍ពីសុខសន្តិភាពជានិរន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ