អាមេរិកនិងអឺរ៉ុប ថ្កោលទោសអ៊ីរ៉ង់ រឿងកាំជ្រួចបាលីស្ទីក ខណៈអ៊ីរ៉ង់ប្តេជ្ញា ថាមិនរាថយ
សហរដ្ឋអាមេរិក នឹងប្រទេសមហាអំណាចនៅអឺរ៉ុប បាននាំគ្នា ប្រកាសថ្កោលទោសអ៊ីរ៉ង់ នៅក្រោយពេលដែលអ៊ីរ៉ង់ បានធ្វើការបាញ់សាកល្បង កាលពីថ្ងៃព្រហស្បតិ៍កន្លងទៅ នូវកាំជ្រួញបញ្ជូនផ្កាយរណប។ កាំជ្រួចបញ្ជូនផ្កាយរណប ដែលគេសង្ស័យថា អ៊ីរ៉ង់ បានប្រើប្រព័ន្ធបាលីស្ទីក។ ទោះបីជាមានការថ្កោលទោស រដ្ឋាភិបាលអ៊ីរ៉ង់ អះអាងថាវាគឺជាសិទ្ធិពេញទី របស់អ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
កាលពីថ្ងៃព្រហស្បតិ៍ ទី ២៧ កក្កដា អ៊ីរ៉ង់ បានបាញ់សាកនូវប្រព័ន្ធកាំជ្រួច បញ្ជូនផ្កាយរណប ដែលគេសង្ស័យថាជាកាំជ្រួចបាលីស្ទិក ចំងាយឆ្ងាយ។ ការបាញ់សាកល្បងនេះ បានធ្វើឲ្យសហគមអន្តរជាតិ ក្តៅក្រហាយជាខ្លាំង ជាពិសេស រដ្ឋាភិបាលលោកដូណាល់ ត្រាំ ដែលកន្លងមក តែងតែតម្លើងសរសៃក ដាក់អ៊ីរ៉ង់។
សហរដ្ឋអាមេរិក បារាំង អង់គ្លេស អាល្លឺម៉ង់ បានផ្ញើរលិខិត រួមគ្នាមួយទៅកាន់ អគ្គលេខាធិការអង្គការសហប្រជាជាតិ ដើម្បីសំដែងពីការព្រួយបារម្ភ និងថ្កោលទោសអ៊ីរ៉ង់។ ប្រទេសមហាអំណាចទាំង៤ លើកឡើងថា អ៊ីរ៉ង់ កំពុងតែធ្វើបំពាន ទៅលើស្មារតី នៃសេចក្តីសម្រេចចិត្តលេខ ២២៣១ នៃក្រុមប្រឹក្សាសន្តិសុខ ដែលមានខ្លឹមសារថា អ៊ីរ៉ង់ មានករណីយកិច្ច បញ្ឈប់រាល់សកម្មភាពអភិវឌ្ឍន៍ប្រព័ន្ធមីស៊ីលបាលីស្ទីក ឬប្រព័ន្ធមីស៊ីលទាំងឡាយណា ដែលអាចមានលទ្ធភាពបំពាក់ក្បាលគ្រាប់នុយក្លេអ៊ែរ។
លោកស្រី នីគី ហាឡី អគ្គរដ្ឋទូតអាមេរិកប្រចាំអង្គការសហប្រជាជាតិ បានថ្លែងថា សកម្មភាពបំពានរបស់អ៊ីរ៉ង់ នៅពេលនេះ គឺបង្ហាញឲ្យឃើញច្បាស់ថា សហគមន៍អន្តរជាតិ មិនអាចទុកចិត្តប្រទេសនេះបានទេ។ ភ្លាមៗនៅថ្ងៃសុក្រ ក្រសួងហិរញ្ញវត្ថុអាមេរិក បានចេញវិធានការ ដាក់ទណ្ឌកម្មទៅលើក្រុមហ៊ុនដែលរកស៊ីជាមួយអ៊ីរ៉ង់ ចំនួន៦ បន្ថែមទៀត។
រដ្ឋាភិបាលអ៊ីរ៉ង បានឆ្លើយតបមកវិញថា ការបាញ់សាកល្បងប្រព័ន្ធបាញ់បង្ហោះផ្កាយរណប គឺជាសិទ្ធិពេញទីរបស់អ៊ីរ៉ង់ ក្នុងការអភិវឌ្ឍន៍បច្ចេកវិទ្យារបស់អ៊ីរ៉ង់។ ដូចគ្នាដែរ អ្នកនាំពាក្យក្រសួងការបរទេសអ៊ីរ៉ង់ បានបញ្ជាក់ថា គេនឹងប្តេជ្ញាបន្តអភិវឌ្ឍន៍បច្ចេកវិទ្យាបាលីស្ទិក ដោយមិនរាថយ នឹងទណ្ឌកម្មអ្វីទាំងអស់។
គួររំលឹកថា សហគមអន្តរជាតិ មានការព្រួយបារម្ភថា បច្ចេកវិទ្យាបាញ់បង្ហោះផ្កាយរណប ព្រមទាំងបច្ចេកវិទ្យាបាលីស្ទិក របស់អ៊ីរ៉ង់ គឺគ្រាន់តែជាលេសបាំងមុខរបស់អ៊ីរ៉ង់ ដើម្បីឈានទៅអភិវឌ្ឍន៍ប្រព័ន្ធកាំជ្រួចបំពាក់ក្បាលគ្រាប់នុយក្លេអ៊ែរ តែប៉ុណ្ណោះ។ តែយ៉ាងណា មហាអំណាចនៅអឺរ៉ុប មានគោលជំហរខុសពីសហរដ្ឋអាមេរិកបន្តិច ដោយពួកគេ យល់ថា សំណុំរឿងកម្មវិធីប្រព័ន្ធបាលីស្ទិក ត្រូវយកមកដោះស្រាយដោយឡែក ឲ្យដាច់ពីសំណុំរឿងនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ