ក្រុមហ៊ុន Apple កំពុងស្ថិតក្រោមការស៊ើបអង្កេតរបស់សហគមន៍អ៊ឺរ៉ុប និងព្រឹទ្ធសភាអាមេរិក
ចុះផ្សាយនៅថ្ងៃ៖
ស្តាប់ - ០៤:៣៨
នាថ្ងៃព្រហស្បតិ៍ទី ១៦ ខែតុលាខាងមុខនេះ ក្រុមហ៊ុន Apple នឹងបង្ហាញផលិតផលថ្មីរបស់ខ្លួន គឺ iPad Pro និង iPad Air 2 បន្ទាប់ពីបានជោគជ័យលក់ iPhone 6 និង iPhone 6 Plus អស់ចំនួន ១០ លានគ្រឿង ក្នុងរយៈតែបីថ្ងៃប៉ុណ្ណោះ កាលពីប៉ុន្មានសប្តាហ៍មុន។ កាលពីចុងខែកញ្ញាកន្លងទៅនេះ គណៈកម្មការផែ្នកប្រកួតប្រជែងពាណិជ្ជកម្ម របស់សហភាពអ៊ឺរ៉ុប បានប្រកាសបើកការសង្កេតលើក្រុមហ៊ុនអាមេរិក Apple ដែលមានរោងចក្រនៅក្នុងប្រទេសអៀរឡង់។ ប្រទេសសមាជិកសហភាពអ៊ឺរ៉ុបមួយនេះ ត្រូវបានគេសង្ស័យ ថាបានជួយសំរួលដល់អាជីវកម្មរបស់ក្រុមហ៊ុន Apple ដោយបានបន្ធូរបន្ថយអត្រាពន្ធលើប្រាក់ចំណេញ ក្នុងអត្រាទាបបំផុត។ ទន្ទឹមគ្នានោះដែរ ក្រុមហ៊ុន Apple កំពុងរងសម្ពាធ ពីព្រឹទ្ធសភាសហរដ្ឋអាមេរិក ជុំវិញការគេចវេស មិនបង់ពន្ធលើប្រាក់ចំណេញ ចំពោះអាជីវកម្មរបស់ខ្លួននៅបរទេស ដោយទុកលុយទាំងនោះនៅតាមបណ្តាដែនដីស្ថានសួគ៌សំរាប់អ្នកគេចពន្ធ (paradis fiscaux)។ សំណុំរឿងដ៏ស្មុគស្មាញមួយនេះ កំពុងបន្តអូសបន្លាយ ដោយគ្មានដំណោះស្រាយពិតប្រាកដឡើយ។ ប្រសិនបើគេរកឃើញកំហុស ក្រុមហ៊ុន Apple អាចត្រូវបង់ប្រាក់ពិន័យ្យ រាប់ពាន់លានដុល្លារ។
យោងតាមអត្ថបទចុះផ្សាយរបស់កាសែត Financial Times និងកាសែត Wall Street Journalកាលពីចុងខែកញ្ញាកន្លងទៅនេះ បាន អោយដឹងថា ផែ្នកស៊ើបអង្កេតរបស់គណៈកម្មការប្រកួតប្រជែងអាជីវកម្មសហភាពអ៊ឺរ៉ុប បានធ្វើការលើសុំណុំរឿងរបស់ក្រុមហ៊ុន Apple អស់រយៈពេល ជាច្រើនខែកន្លងមកហើយ។ ការស៊ើបអង្កេតដ៏ស៊ីជំរៅនេះគឺ ផ្តោតលើការធ្វើអាជីវកម្មរបស់ក្រុមហ៊ុនអាមេរិកមួយនេះ នៅក្នុងប្រទេសអៀរឡង់។ បើតាមលោក Joaquin Almunia ប្រធានផែ្នកស៊ើបអង្កេតនេះ បានអោយដឹងថា ចន្លោះពីឆ្នាំ ១៩៩១ ដល់ឆ្នាំ ២០០៧ ក្រុមហ៊ុនអាមេរិក ដែលមានស្លាកសញ្ញាផែ្លប៉ោមមួយនេះ បានចរចារជាមួយរដ្ឋាភិបាលប្រទេសអៀរឡង់ ធ្វើយ៉ាងណាអោយខ្លួនទទួលបានភាពអនុគ្រោះ បង់ពន្ធតិចបំផុតលើប្រាក់ចំណេញរបស់ខ្លួន។ ជាថ្នូរមកវិញ ក្រុមហ៊ុន Apple សន្យាបង្កើតការងារចំនួន ៤ ពាន់កន្លែងនៅការិយាល័យរបស់ខ្លួន ក្នុងទីក្រុង Cork ប្រទេសអៀរឡង់។
តាមពិតទៅ ក្រុមហ៊ុន Apple បានបោះទីតាំងក្នុងប្រទេសអៀរឡង់ តាំងពីឆ្នាំ ១៩៨០ មកម្ល៉េះ។ប៉ុន្តែ ក្រុមហ៊ុននេះ ទទួលបានការអនុគ្រោះ ដោយពុំបង់ពន្ធអស់រយៈពេល ១១ ឆ្នាំ។ ចន្លោះពីឆ្នាំ ១៩៩១ ដល់ឆ្នាំ ២០០៧ ក្រុមហ៊ុននេះបានចរចារជាមួយរដ្ឋាភិបាលប្រទេសអៀរឡង់ ដោយកំណត់អត្រាពន្ធត្រឹមតែ ២% ប៉ុណ្ណោះ ដែលខ្លួនត្រូវបង់លើប្រាក់ចំណេញពីការលក់ផលិតផលរបស់ខ្លួន។ អ្វីដែលគណៈកម្មការស៊ើបអង្កេតរបស់សហគមន៍អ៊ឺរ៉ុប កំពុងស្តីបន្ទោសក្រុមហ៊ុន Apple និងប្រទេសអៀរឡង់នោះ គឺការត្រូវរ៉ូវគ្នាតាមរយៈជំនួយរដ្ឋ មិនស្របច្បាប់ ដោយកំណត់អត្រាពន្ធដ៏ទាបបំផុត ដែលនេះបង្ហាញពីការប្រកួតប្រជែងមិនស្មោះត្រង់។
ទង្វើរបស់ក្រុមហ៊ុន Apple ក៏បានធ្វើអោយសហរដ្ឋអាមេរិចក មិនសប្បាយចិត្តផងដែរ ព្រោះក្រុមហ៊ុនយក្សមួយនេះ បានបង្កើតវិធីសាស្ត្រដ៏ស្មុគស្មាញមួយចំនួន ធ្វើយ៉ាងណាមិនអោយបង់ពន្ធច្រើនហួសហេតុ តាមការតម្រូវរបស់ច្បាប់ស្តីពីចំណូលពន្ធអាមេរិច។ សូមបញ្ជាក់ថាអត្រាពន្ធលើប្រាក់ចំណេញរបស់សហគ្រាសនៅសហរដ្ឋអាមេរិក មានកំរិត ៣៥%។ អាជីវកម្មរបស់ Apple នៅសហរដ្ឋអាមេរិច មិនត្រូវបានគេស្តីបន្ទោសទេ ព្រោះក្រុមហ៊ុននេះ បានបង់ពន្ធត្រឹមត្រូវជូនរដ្ឋ។ ប៉ុន្តែ អ្វីដែលគេស្តីបន្ទោសនោះគឺ ប្រាក់ចំណេញអាជីវកម្មនៅបរទេស។ កាលពីពាក់កណ្តាលឆ្នាំ ២០១៣ កន្លងទៅនេះ សមាជិកព្រឹទ្ធសភាអាមេរិកពីររូប គឺលោក Carl Levin មកពីគណៈបក្សប្រជាធិបតេយ្យ និងលោក John McCain មកពីគណៈបក្សសាធារណៈរដ្ឋ បានដឹកនាំគណៈកម្មាធិការមួយ ស៊ើបអង្កេតលើក្រុមហ៊ុន Apple។ នៅក្នុងសេចក្តីសន្និដ្ឋានរបស់របាយការណ៍នោះ បានអោយដឹងថា ក្រុមហ៊ុន Apple មានសាច់បា្រក់ប្រមាណ ១០២ ទៅ ១៤៥ ពាន់លានដុល្លារក្នុងគណនី នៅធនាគារបរទេស តួយ៉ាងដូចជានៅកោះ Virgin និងកោះ Cayman ដែលជាដែនដីនៅឯនាយសមុទ្ររបស់ប្រទេសអង់គ្លេស។ ដែនដីកោះទាំងនោះ ត្រូវបានស្គាល់ថាជាស្ថានសួគ៌សំរាប់អ្នកគេចពន្ធ(paradis fiscaux)ដោយអាជ្ញាធរដែនដីនោះ មិនយកពន្ធ ឬក៏យកតិចតួចបំផុត លើប្រាក់ចំណេញរបស់បុគ្គល ឬសហគ្រាសដែលមានគណនីក្នុងធនាគាររបស់ខ្លួន។
របាយការណ៍របស់សមាជិកព្រឹទ្ធសភាអាមេរិកទាំងពីររូប ក៏បានអោយដឹងដែរថា ក្រុមហ៊ុន Apple មានយុទ្ធសាស្រ្តធំពីរ។ ទីមួយគឺ ក្រុមហ៊ុននេះ ធ្វើការផ្ទេរកម្មសិទ្ធិបញ្ញារបស់ខ្លួនទៅធ្វើអាជីវកម្មនៅបរទេស ដោយបង្កើតការិយាល័យក្រុមហ៊ុនគ្រប់គ្រងអាជីវកម្មរបស់ខ្លួននៅប្រទេសអៀរឡង់ ព្រោះកំរិតពន្ធនៅប្រទេសនោះទាបជាងគេនៅអ៊ឺរ៉ុប។ តាមរយៈនេះ យើងឃើញក្រុមហ៊ុន Apple បានបង្កើតក្រុមហ៊ុនបុត្រសម្ព័ន្ធបី ដែលបានចុះបញ្ជីអាជីវកម្មនៅប្រទេសអៀរឡង់គឺ ក្រុមហ៊ុន Apple Sales International (ASI), Apple Operations International (AOI) និង Apple Operations Europe (AOE)។ ទីពីរគឺក្រុមហ៊ុននេះ យកប្រាក់ចំណេញពីអាជីវកម្មនៅបរទេសទៅទុកក្នុងគណនីរបស់ធនាគារ នៅតាមបណ្តាដែនដីស្ថានសួគ៌សំរាប់អ្នកគេចពន្ធ។
ក្នុងចំណោមក្រុមហ៊ុនទាំងបីនេះ មានតែក្រុមហ៊ុន Apple Sales International (ASI) តែមួយប៉ុណ្ណោះ បានបង់ពន្ធត្រឹមត្រូវអោយប្រទេសអៀរឡង់ ដោយកាលពីឆ្នាំ២០១១កន្លងទៅ ក្រុមហ៊ុននេះរកចំណូលបាន ២២ ពាន់លានដុល្លារ ពីការលក់ iPhone, iPad និងផលិតផលផ្សេងៗទៀតនៅអ៊ឺរ៉ុប អាហ្វ្រិក និងអាស៊ី។ ប៉ុន្តែ ក្រុមហ៊ុននេះបានបង់ពន្ធតែ ១០ លានដុល្លារប៉ុណ្ណោះអោយអាជ្ញាធរអៀរឡង់។ តាមការគិតជាក់ស្តែង ក្រុមហ៊ុននេះបង់ពន្ធមិនដល់ ០,៥% ផង នៃប្រាក់ចំណូលរបស់ខ្លួន។
អ្វីដែលធ្វើអោយព្រឹទ្ធសភាអាមេរិកទើសចិត្តនោះគឺ ក្រុមហ៊ុន Apple មានប្រកាសនីយប័ត្រ (brevet) និងកម្មសិទ្ធិបញ្ញា ចុះបញ្ជីនៅសហរដ្ឋអាមេរិច ហើយរាល់ការប្រជុំ និងសេចក្តីសំរេចចិត្តលើអាជីវកម្មទាំងឡាយរបស់កូនក្រុមហ៊ុនទាំងនោះគឺ ធ្វើឡើងនៅទីស្នាក់ការធំរបស់ក្រុមហ៊ុន Apple នៅរដ្ឋកាលីហ្វ័រនី។ ដូចនេះ ក្រុមហ៊ុនបុត្រសម្ព័ន្ធទាំងបីគ្រាន់តែជាក្រុមហ៊ុនស្រមោល មានតែឈ្មោះប៉ុណ្ណោះ។
ឆ្លើយតបទៅនឹងការចោទប្រកាន់នេះ ប្រធានអគ្គនាយកក្រុមហ៊ុន Apple គឺលោក Tim Cook បានឡើងធ្វើសក្ខីកម្ម នៅចំពោះមុខគណៈកម្មាធិការព្រឹទ្ធសភាអាមេរិក ដោយលោកបានអះអាងថា ក្រុមហ៊ុនរបស់ខ្លួន បានបង្កើតការងារដល់មនុស្សចំនួន ៦០ ម៉ឺននាក់នៅសហរដ្ឋអាមេរិក។ ហើយក្រុមហ៊ុនបានគោរពគោលការណ៍ច្បាប់ត្រឹមត្រូវ តួយ៉ាង ក្រុមហ៊ុនបានបង់ពន្ធជូនអាជ្ញាធរអាមេរិកចំនួន ៦ ពាន់លានដុល្លារ កាលពីឆ្នាំ ២០១២។ លោក Tim Cook ក៏បានពន្យល់ដែរថា ក្រុមហ៊ុននឹងមិនយកលុយដ៏សន្ធឹកសន្ធាប់របស់ខ្លួន នៅតាមធនាគារបរទេស ត្រលប់ចូលទឹកដីអាមេរិកឡើយ ព្រោះការធ្វើបែបនេះ នឹងធ្វើអោយក្រុមហ៊ុនខាតបង់ច្រើន ដោយសាច្បាប់ពន្ធដារអាមេរិក តម្រូវអោយបង់ ៣៥% លើប្រាក់ចំណេញរបស់ក្រុមហ៊ុន។ លោកបានធ្វើអំណះអំណាងថា មានក្រុមហ៊ុនអាមេរិកធំៗចំនួនជាង ៣០ ក៍បានធ្វើរបៀបនេះដែរ។ លោកបានស្នើអោយរដ្ឋាភិបាលអាមេរិក គិតគូរឡើងវិញលើក្រមពន្ធដារ ដោយត្រូវបញ្ចុះកំរិតពន្ធអោយនៅក្រោម ១០% ដើម្បីដើរអោយទាន់ស្ថានការណ៍ជាក់ស្តែងរបស់អាជីវកម្មផ្នែកបច្ចេកទេសព័តមានវិទ្យា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ