ការស្ទង់មតិ៖ វេទិកាសេដ្ឋកិច្ចពិភពលោកនៅដាវ៉ូស នឹងមានភាពល្អក់កករ
នៅថ្ងៃទី ២១មករានេះ គឺជាថ្ងៃសម្រាប់កិច្ចប្រជុំប្រចាំឆ្នាំនៃវេទិកាសេដ្ឋកិច្ចពិភពលោក ដែលធ្វើឡើងនៅទីក្រុងដាវ៉ូស ប្រទេសស្វីស។ ជាកិច្ចប្រជុំ ដែលនឹងមានការចូលរួមពីមេដឹកនាំសេដ្ឋកិច្ចពិភពលោក អ្នកសេដ្ឋកិច្ច ប្រធានក្រុមហ៊ុនជំនួញ ជាច្រើនពាន់នាក់។ ប៉ុន្តែនៅមុនពេលកិច្ចប្រជុំ ចាប់ផ្តើម ការស្ទង់មតិ បានបង្ហាញទុទិដ្ឋនិយមថា សេដ្ឋកិច្ចពិភពលោក អាចប្រឈមនឹងហានិភ័យ ក្នុងឆ្នាំនេះ និងឆ្នាំក្រោយទៀត។
ចុះផ្សាយនៅថ្ងៃ៖
ស្តាប់ - ០១:៥១
មូលនិធិរូបិយវត្ថុអន្តរជាតិ ហៅកាត់ថា FMI នៅថ្ងៃអង្គារម្សិលមិញ បានចេញផ្សាយរបាយការណ៍ដ៏ខ្លីរបស់ខ្លួន ដោយបង្ហាញទុទិដ្ឋិនិយមថា មេដឹកនាំសេដ្ឋកិច្ចពិភពលោក កំពុងតែប្រឈមនឹងការធ្លាក់ចុះនៃកំណើនសេដ្ឋកិច្ច នៅឆ្នាំ២០១៥នេះ។ ជាការស្ទង់មតិវិភាគ ដែលនឹងនាំឲ្យកិច្ចប្រជុំប្រចាំឆ្នាំនៃវេទិការសេដ្ឋកិច្ចពិភពលោក ដែលធ្វើឡើង នៅទីក្រុងដាវ៉ូស ក្នុងថ្ងៃនេះ នឹងមានភាពល្អក់កករ។
FMI គ្មានសុទិដ្ឋិនិយមឡើយ ទៅលើកំណើនសេដ្ឋកិច្ចពិភពលោក សម្រាប់ឆ្នាំនេះ និងឆ្នាំក្រោយ។ FMI បានបង្ហាញថា គេបានកាត់បន្ថយអត្រាកំណើនសេដ្ឋកិច្ចពិភពលោក មកនៅត្រឹម៣,៥ភាគរយ សម្រាប់ឆ្នាំ២០១៥ គឺថយចុះបន្តិច ប្រមាណ ០,៣ភាគរយ បើប្រៀបធៀបនឹងអត្រាដែល FMI បានព្យាករទុក កាលពីខែតុលា ឆ្នាំមុន។ នៅក្នុងការព្យាករណ៍របស់ FMI មានតែមហាអំណាចអាមេរិកទេដែលមានកំណើនសេដ្ឋកិច្ចកើនឡើងជាវិជ្ជមាន។ ចំណែកប្រទេសអភិវឌ្ឍ និងប្រទេសមានសេដ្ឋកិច្ចទើបរីកលូតលាស់ដទៃទៀត ដូចជាចិនជាដើម នឹងមានផលិតផលក្នុងស្រុកសរុបធ្លាក់ចុះ។
ក្នុងនោះ ប្រទេសរុស្ស៊ីដែលគេចាត់ថ្នាក់ ជាប្រទេសទើបមានសេដ្ឋកិច្ចរីកលូតលាស់ ដូចជាចិន ឥណ្ឌា និងប្រេស៊ីលដែរនោះ ក៏នឹងមានកំណើនសេដ្ឋកិច្ច ធ្លាក់ចុះខ្លាំង ដោយសារតែ រុស្ស៊ីរងការដាក់ទណ្ឌកម្មសេដ្ឋកិច្ចពីអាមេរិក និងពីសហភាពអឺរ៉ុប។ លុយរូប របស់រុស្ស៊ីក៏ធ្លាក់ចុះខ្លាំង ចំណែកប្រេង ដែលរុស្ស៊ីពឹងផ្អែកខ្លាំងសម្រាប់ទ្រទ្រង់សេដ្ឋកិច្ច ក៏កំពុងធ្លាក់ចុះថ្លៃ យ៉ាងគំហុក នៅក្នុងទីផ្សារអន្តរជាតិ។
បញ្ហាប្រេងឆៅ ធ្លាក់ថ្លៃ និងការធ្លាក់ចុះនៃតំលៃប្រាក់អឺរូ សុទ្ធសឹងតែជាបញ្ហា ដែលនឹងត្រូវលើកជាប្រធានបទសម្រាប់វេទិការនៅថ្ងៃទី ២១មករានេះ។ សេដ្ឋវិទូជាច្រើនបារម្ភថា ការធ្លាក់ចុះនៃកំណើនសេដ្ឋកិច្ច របស់ប្រទេសកំពុងមានសេដ្ឋកិច្ច និងប្រទេសចាយប្រាក់អឺរ៉ូ នៅឆ្នាំខាងមុខ នឹងអាចប៉ះពាល់ ដល់កំណើនសេដ្ឋកិច្ចរបស់ប្រទេសដទៃទៀត ជាពិសេសប្រទេសនៅអាស៊ី ជាដើម ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ