នីហ្សេរីយ៉ាដែលជាមហាអំណាចសេដ្ឋកិច្ចអាហ្វ្រិកកំពុងទាក់ទាញវិនិយោគចិន
ចុះផ្សាយនៅថ្ងៃ៖
ស្តាប់ - ០៤:០៩
ប្រធានាធិបតីនីហ្សេរីយ៉ា ហ្គូដឡាក់ ចូណាថាន់ (Goodluck Jonathan) កំពុងបំពេញទស្សនកិច្ច នៅក្នុងប្រទេសចិន។ ដំណើរទស្សនកិច្ចរយៈពេល ៤ថ្ងៃ ដែលចាប់ផ្តើម កាលពីថ្ងៃអង្គារ ៩កក្កដា ធ្វើឡើងក្នុងគោលដៅពង្រឹងទំនាក់ទំនងខាងពាណិជ្ជកម្មទ្វេភាគី ដែលក្នុងនោះមានការចុះហត្ថលេខាផ្តល់ប្រាក់កម្ចីដល់នីហ្សេរីយ៉ា ចំនួន ៣ពាន់លានដុល្លារ។ នីហ្សេរីយ៉ា ដែលជាប្រទេសសម្បូរធនធានធម្មជាតិ និងជាមហាអំណាចសេដ្ឋកិច្ចលំដាប់ទី២ នៅអាហ្វ្រិក កំពុងតែទាក់ទាញវិនិយោគទុនពីចិនកាន់តែខ្លាំងឡើងពីមួយថ្ងៃទៅមួយថ្ងៃ។
នីហ្សេរីយ៉ា ដែលមានប្រជាជនសរុបចំនួនជាង ១៦០លាននាក់ គឺជាប្រទេសមានប្រជាជនច្រើនជាងគេបង្អស់នៅអាហ្វ្រិក ហើយបើនិយាយពីខាងសេដ្ឋកិច្ចវិញ នីហ្សេរីយ៉ា គឺជាមហាអំណាចសេដ្ឋកិច្ចលំដាប់ទី២ នៅអាហ្វ្រិក បន្ទាប់ពីអាហ្វ្រិកខាងត្បូង។ នីហ្សេរីយ៉ា គឺជាប្រទេសសម្បូរធនធានធម្មជាតិ ជាពិសេស ប្រេង និងឧស្ម័ន។ នីហ្សេរីយ៉ា ជាប់ចំណាត់ថ្នាក់លេខ ៨ ក្នុងចំណោមប្រទេសនាំប្រេងចេញ នៅលើពិភពលោក។ ក្រៅពីប្រេង និងឧស្ម័ន នីហ្សេរីយ៉ា មានធនធានរ៉ែជាច្រើនទៀត ដូចជា ធ្យូងថ្ម បុកស៊ីត មាស ដែក និងសង្កសី ជាដើម ហើយធនធានរ៉ែទាំងនេះនៅមិនទាន់ត្រូវបានគេធ្វើអាជីវកម្មឲ្យបានពេញលេញនៅឡើយ។
ធនធានធម្មជាតិ និងសក្តានុពលសេដ្ឋកិច្ចទាំងនេះហើយ ដែលកំពុងតែទាក់ទាញមហាអំណាចសេដ្ឋកិច្ចអាស៊ី គឺចិន ដែលកំពុងតែត្រូវការខ្លាំងនូវវត្ថុធាតុដើមផង និងទីផ្សារ ដើម្បីលក់ទំនិញផង។
នៅក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញថា ទំនាក់ទំនងពាណិជ្ជកម្ម រវាងចិន និងនីហ្សេរីយ៉ាត្រូវបានរឹតបន្តឹងឥតឈប់ឈរពីមួយថ្ងៃទៅមួយថ្ងៃ។ ក្នុងចំណោមប្រទេសនៅអាហ្វ្រិក នីហ្សេរីយ៉ាគឺជាទិសដៅវិនិយោគរបស់ចិន លំដាប់ទីពីរ បន្ទាប់ពីអាហ្វ្រិកខាងត្បូង។
បច្ចុប្បន្ននេះ ចិនបោះទុនវិនិយោគ ក្នុងប្រទេសនីហ្សេរីយ៉ា ដល់ទៅជាង ១ពាន់លានដុល្លារ។ ការវិនិយោគ ដែលពីដំបូង ធ្វើឡើងភាគច្រើនទៅលើវិស័យប្រេង និងឧស្ម័ន កំពុងតែត្រូវបានពង្រីកទៅកាន់វិស័យផ្សេងៗទៀត ជាពិសេស វិស័យទូរគមនាគមន៍ និងសំណង់។
ចិនអាចពង្រឹងឥទ្ធិពលរបស់ខ្លួន ក្នុងសេដ្ឋកិច្ចរបស់នីហ្សេរីយ៉ា តាមរយៈការប្រើលុយ ជាពិសេស គឺប្រាក់កម្ចី ក្នុងអត្រាការប្រាក់ទាប ដែលនីហ្សេរីយ៉ាកំពុងត្រូវការខ្លាំង ដើម្បីយកទៅសាងសង់ និងកែលម្អហេដ្ឋារចនាសម្ព័ន្ធរបស់ខ្លួន។ ប្រាក់កម្ចីចិននេះហើយ ដែលជាវត្ថុបំណងចម្បងបំផុត នៃដំណើរទស្សនកិច្ចរបស់ប្រធានាធិបតីនីហ្សេរីយ៉ា ទៅកាន់ប្រទេសចិន នៅពេលនេះ។
លុយ ៣ពាន់លានដុល្លារ ដែលលោកចូណាថាន់ ចុះកិច្ចព្រមព្រមព្រៀងខ្ចីពីចិន ក្នុងដំណើរទស្សនកិច្ចនេះ គឺជាផ្នែកមួយ នៃគម្រោងកម្ចីសរុប រហូតដល់ទៅ ៨ពាន់លានដុល្លារ ដើម្បីយកទៅពង្រីកព្រលានយន្តហោះ និងកំពង់ផែ ព្រមទាំងសាងសង់ទំនប់វារីអគ្គិសនី។ គឺជាហេដ្ឋារចនាសម្ព័ន្ធ ដែលនីហ្សេរីយ៉ា កំពុងតែត្រូវការចាំបាច់ ដើម្បីឆ្លើយតបនឹងតម្រូវការនៃសកម្មភាពសេដ្ឋកិច្ចរបស់ខ្លួន ដែលមានអត្រាកំណើនប្រមាណជា ៧% ក្នុងមួយឆ្នាំៗ។
បើមើលមួយភ្លែតទៅ ទំនាក់ទំនងពាណិជ្ជកម្ម រវាងនីហ្សេរីយ៉ា និងចិន គឺជាទំនាក់ទំនងឈ្នះ-ឈ្នះ៖ ចិនត្រូវការវត្ថុធាតុដើមរបស់នីហ្សេរីយ៉ា ហើយនីហ្សេរីយ៉ាត្រូវការលុយរបស់ចិន។ ក៏ប៉ុន្តែ កាលពីខែមុននេះ នៅក្នុងបទវិចារណកថា ចុះផ្សាយលើទំព័រកាសែត Financial Times អគ្គទេសាភិបាលធនាគារកណ្តាលនីហ្សេរីយ៉ា បានសរសេររិះគន់ថា ទំនាក់ទំនងពាណិជ្ជកម្ម រវាងនីហ្សេរីយ៉ា និងចិន ជាទំនាក់ទំនងដែលគ្មានសមភាព ដោយលម្អៀងខ្លាំងទៅខាងផលប្រយោជន៍ចិន។
ក្នុងរយៈពេល ៧ឆ្នាំចុងក្រោយនេះ ការដោះដូរពាណិជ្ជកម្មរវាងនីហ្សេរីយ៉ា និងចិន បានកើនឡើង ១គុណនឹង៦។ បើគិតជាទំហំទឹកប្រាក់ គឺមានរហូតដល់ទៅ ១៣ពាន់លានដុល្លារ កាលពីឆ្នាំ២០១២កន្លងទៅ។ ក៏ប៉ុន្តែ ក្នុងចំនួនទឹកប្រាក់ទាំង ១៣ពាន់លានដុល្លារនេះ មានរហូតដល់ទៅជិត ៩០% គឺជាការនាំទំនិញពីចិនមកលក់នៅនីហ្សេរីយ៉ា។
អគ្គទេសាភិបាលធនាគារកណ្តាលនីហ្សេរីយ៉ាបានរិះគន់ថា ទំនាក់ទំនងពាណិជ្ជកម្មបែបនេះមានលក្ខណៈស្រដៀងគ្នាទៅនឹងទំនាក់ទំនងបែបអាណានិគម ដោយចិនបូមយកវត្ថុធាតុដើមពីនីហ្សេរីយ៉ា ហើយនាំចូលមកនីហ្សេរីយ៉ាវិញ នូវផលិតផលឧស្សាហកម្ម។
ក៏ប៉ុន្តែ សំណួរសួរថា តើនេះបណ្តាលមកពីកំហុសរបស់ចិន ឬកំហុសរបស់នីហ្សេរីយ៉ាខ្លួនឯង? ជាទូទៅ គេសង្កេតឃើញថា នីហ្សេរីយ៉ា ក៏ដូចជាប្រទេសផ្សេងទៀតនៅអាហ្វ្រិក ច្រើនតែផ្តេកផ្តួលខ្លាំងទៅលើការលក់ធនធានធម្មជាតិរបស់ខ្លួនទៅបរទេស ជាជាងការអភិវឌ្ឍសមត្ថភាព ក្នុងការធ្វើអាជីវកម្មធនធានទាំងនេះដោយខ្លួនឯង។
នៅពេលដែលចិនបើកចំហឲ្យក្រុមហ៊ុនបរទេស ចូលមករកស៊ីនៅចិន ចិនតែងតែទាមទារឲ្យមានការផ្ទេរបច្ចេកវិទ្យា និងចំណេះដឹង។ ចុះនៅពេលចិនចូលមករកស៊ីនៅអាហ្វ្រិក ហេតុអ្វីប្រទេសទាំងនេះមិនទាមទារឲ្យចិនផ្ទេរបច្ចេកវិទ្យា និងចំណេះដឹង ដើម្បីឈានទៅធ្វើអាជីវកម្មធនធានធម្មជាតិខ្លួនឯងទៅថ្ងៃអនាគត?
បញ្ហាចម្បង ដែលចោទឡើង គឺអំពើពុករលួយ ដែលនៅមានកម្រិតខ្ពស់ ទាំងនៅក្នុងប្រទេសនីហ្សេរីយ៉ា និងនៅក្នុងប្រទេសអាហ្វ្រិកផ្សេងទៀត ដែលសម្បូរធនធានធម្មជាតិ។ មេដឹកនាំមួយចំនួនគិតតែពីផលប្រយោជន៍ផ្ទាល់ខ្លួន និងបក្សពួករបស់ខ្លួន ដោយមិនគិតគូរទាល់តែសោះពីផលប្រយោជន៍ជាតិ។ ចំណែកមេដឹកនាំខ្លះទៀត គិតពីផលប្រយោជន៍ជាតិដែរ ក៏ប៉ុន្តែ សំឡឹងឃើញតែផលប្រយោជន៍នៅនឹងមុខ ក្នុងរយៈពេលខ្លី ហើយគ្មានចក្ខុវិស័យវែងឆ្ងាយ សម្រាប់ថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ