អ៊ីស្រាអែលជួយក្រុមសង្គ្រោះស៊ីរី តែប្រកាន់ខ្ជាប់នយោបាយមិនជ្រៀតជ្រែក
ក្រុមអ្នកសង្គ្រោះស្ម័គ្រចិត្តស៊ីរី ឬហៅថាទាហានមួកស ដែលមានភារកិច្ចជួយជនស៊ីវិលរងគ្រោះពីការវាយប្រហាររបស់យោធាស៊ីរី និងរុស្ស៊ី ចំនួន៨០០នាក់ ត្រូវបានជម្លៀសតាមអ៊ីស្រាអែល ឆ្ពោះទៅកាន់ហ្សកដានី។ នេះបើតាមការជូនដំណឹងរបស់យោធាអ៊ីស្រាអែល ដែលបញ្ជាក់ទៀតថា ក្រុមមួកសស៊ីរី កំពុងប្រឈមខ្លាំងនឹងការចាប់ឃុំឃាំង និងប្រហារជីវិតពីសំណាក់រដ្ឋាភិបាលក្រុងដាម៉ាស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ប្រតិបត្តិការជម្លៀសក្រុមមួកស និងគ្រួសារ ចេញពីទឹកដីស៊ីរី កាត់តាមទឹកដីនិងដោយអ៊ីស្រាអែល ត្រូវបានធ្វើឡើងតាមសំណើរបស់សហរដ្ឋអាមេរិក និងក្រុមប្រទេសអឺរ៉ុប ! នេះបើតាមសេចក្តីថ្លែងការណ៍របស់យោធាអ៊ីស្រាអែល។ សម្រាប់អ៊ីស្រាអែល នេះជាប្រតិបត្តិ មនុស្សធម៌ពិតៗ និងមិនមែនជាផ្លាស់ប្តូរនយោបាយរបស់អ៊ីស្រាអែលចំពោះវិបត្តិស៊ីរីឡើយ។
អ៊ីស្រាអែលរក្សាជំហរដដែល គឺមិនទទួលជនភៀសខ្លួនស៊ីរីទេ ! ប៉ុន្តែជាញឹកញយ អ៊ីស្រាអែលបានទទួលព្យាបាលជនស៊ីវិលស៊ីរីរងរបួស នៅតាមមន្ទីរពេទ្យជាប់ព្រំដែន និងផ្តល់ជាជំនួយស្បៀងអាហារព្រមទាំងថ្នាំសង្កូវ ដល់ជនស៊ីវិលនៅជំរំភៀសខ្លួន ក្នុងតំបន់ខ្ពង់រាបហ្កូឡង់ កាន់កាប់ដោយស៊ីរី។
ចំពោះករណីក្រុមសង្គ្រោះមួកសនេះក៏ដូចគ្នា ! អ៊ីស្រាអែលបានជួយចម្លងពួកគេឱ្យទៅស្នាក់នៅ ក្នុងប្រទេសហ្សកដានី បណ្តោះអាសន្នសិន ក្នុងពេលរង់ចាំការផ្តល់សិទ្ធជ្រកកោនក្នុងប្រទេសទីបី ពោលគឺកាណាដា អាល្លឺម៉ង់ និងអង់គ្លេស។ កាណាដាបានប្រកាសភ្លាមទទួលយកទាហានមួយស ចំនួន៥០គ្រួសារ ចំណែកអាល្លឺម៉ង់សន្យាទទួលយក៥០គ្រួសារ។
សូមបញ្ជាក់ថា ក្រុមអ្នកសង្គ្រោះនេះ ជាក្រុមអ្នកស្ម័គ្រ ស៊ីវិល គ្មានអាវុធ និងធ្វើប្រតិបត្តិការសង្គ្រោះជនស៊ីវិលរងគ្រោះដូចគ្នានៅក្នុងតំបន់កាន់កាប់ដោយពួកឧទ្ទាម ដូចជាជួយសង្គ្រោះអ្នករងរបួស ជួយគាស់កាយអូសជនរងគ្រោះចេញពីគំនរថ្មអាគារបែកបាក់ ក្រោយការទម្លាក់គ្រាប់បែករបស់រុស្ស៊ីឬរបស់ទាហានលោកបាស្ហារអាល់អាសាទ។ គិតចាប់តាំងពី វិបត្តិនៅស៊ីរីបានផ្ទុះឡើង ទាហានមួកស បានសង្គ្រោះជីវិតមនុស្សបានជាច្រើនពាន់នាក់។ ប៉ុន្តែសម្រាប់រដ្ឋាភិបាលក្រុងដាម៉ាស និងម៉ូស្គូ ក្រុមទាហានមួកសនេះ គឺជាក្រុមបះបោរអ៊ីស្លាមជ្រុលនិយម និងជាឧបករណ៍ឃោសនារបស់លោកខាងលិច។
ដោយហេតុតែកងកម្លាំងយោធារដ្ឋាភិបាលក្រុងដាម៉ាស និងពួកអង្គការរដ្ឋអ៊ីស្លាមរំកិលមកកាន់តែកៀកតំបន់កាន់កាប់ដោយពួកឧទ្ទាមស៊ីរីមិនជ្រុលនិយម ប្រតិបត្តិការជម្លៀសដឹកទាហានមួកស និងក្រុមគ្រួសារបានតែប្រមាណ៤៤២នាក់ មិនមែន៨០០នាក់ដូចសេចក្តីប្រកាសរបស់ក្រសួងការបរទេសអ៊ីស្រាអែលដំបូងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ