តួកគី៖ ភេរវកម្មអត្តឃាតនៅក្រុងអង់ការ៉ា ស្លាប់យ៉ាងហោចណាស់២៨នាក់
ជាថ្មីម្តងទៀត ប្រទេសតួកគីបានរងអំពើភេរវកម្មអត្តឃាត។ ទីក្រុងអង់ការ៉ា រដ្ឋធានីតួកគីបានទទួលរងការវាយប្រហារភេរវកម្ម បំផ្ទុះគ្រាប់បែក កាលពីយប់ថ្ងៃពុធ ទី១៧កុម្ភៈ ដោយមានមនុស្សស្លាប់ យ៉ាងហោចណាស់ ២៨នាក់ និងអ្នករងរបួសជាង៦០នាក់។ អាជ្ញាធរតួកគី បានចាត់ទុកថា ទាំងនេះជាអំពើភេរវកម្ម ហើយបានដាក់ការសង្ស័យថា ជាអំពើរបស់ក្រុមកួដស៊ីរី ដែលឃុបឃិតគ្នាជាមួយគណបក្សបេកាកា ដែលជាគណបក្សនិយមកួកនៅតួកគី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣២
ហេតុការណ៍ភេរវកម្មបានកើតឡើងនៅក្រុងអង់ការ៉ា កាលពីល្ងាចថ្ងៃពុធ ទី១៧ កុម្ភៈ វេលាម៉ោងប្រហែលជា៦ និង៣០នាទី ល្ងាច នៅកណ្តាលក្រុងអង់ការ៉ាតែម្តង។ វាគឺជាភេរវកម្មអត្តឃាត ដែលជនដៃដល់បានបើករថយន្តក្រុងមួយ ផ្ទុកទៅដោយគ្រាប់រំសេវ ទៅបុកបំផ្ទុះដើម្បីសម្លាប់មនុស្ស។
ភេរវកម្មសំដៅវាយប្រហារទាហានតួកគី៖
ជនដៃដល់ បានជ្រើសរើសយកទីតាំងដ៏សំខាន់ ដើម្បីវាយប្រហារ គឺនៅទីលាន Kizilay ដែលនៅកន្លែងនោះ គឺនៅក្បែររដ្ឋសភាតួកគី មានទីស្នាក់ការក្រសួងជាច្រើនកន្លែង ព្រមទាំងមានទីបញ្ជាការកងទ័ពរបស់តួកគីទៀត។ រថយន្តផ្ទុកគ្រាប់បែករបស់ជនដៃដល់ បានបើកទៅបុក រថយន្តដឹកទាហានជាច្រើនគ្រឿង ដែលនៅចត ហើយបើតាមការស្មាន គឺជនដៃដល់ មានបំណងវាយប្រហារទាហានតួកគីតែម្តង។ គិតមកត្រឹមពេលនេះ មានអ្នកស្លាប់ក្នុងហេតុការណ៍នេះ ចំនួន២៨នាក់ និងរបួសចំនួន៦១នាក់។ ក៏ប៉ុន្តែយើងនៅមិនទាន់ដឹងថា មានទាហានតួកគីប៉ុន្មាននាក់ ដែលស្លាប់ រឺរបួសក្នុងចំណោមនេះទេ។
ដោយឡែកនៅថ្ងៃព្រហស្បតិ៍ទី ១៨កុម្ភៈនេះដែរ មានអំពើភេរវកម្មមួយទៀត នៅភាគខាងត្បូងតួកគី ដោយមានគ្រាប់បែកបំផ្ទុះបំផ្លាញ ក្បួនរថយន្តទាហានរបស់តួកគី ដោយបណ្តាលឲ្យស្លាប់ទាហានតូកគី៧នាក់។
តួកគីចោទថាជាស្នាដៃរបស់ក្រុមតស៊ូកួដស៊ីរី និងគណបក្សPKK៖
បើយោងតាមការផ្សាយរបស់ប្រព័ន្ធព័ត៌មានក្នុងស្រុករបស់តួកគី បានឲ្យដឹងថា នគរបាលតួកគី បានធ្វើកោសល្យវិច្ច័យ ពិនិត្យសាកសពជនដៃដល់ ហើយបានរកឃើញថាជនដៃដល់ជាជនជាតិស៊ីរី ឈ្មោះ Salih Necar អាយុ២៤ឆ្នាំ ដែលបានឆ្លងចូលមកតួកកី ក្នុងនាមជាជនភៀសខ្លួន ក្នុងពេលថ្មីៗនេះ។ ប្រព័ន្ធព័ត៌មានតួកគីផ្សាយទៀតថា នគរបាលបានសន្និដ្ឋានថា ជនដៃដល់គឺជាកូនចៅ ស្និទ្ធស្នាលនឹងក្រុមចលនាតស៊ូកួដ ពីរក្រុមនៅស៊ីរី មួយឈ្មោះ ក្រុមឯកភាពការពារប្រជាជនកួដ (YPG) និងមួយទៀតឈ្មោះគណបក្សសហភាពប្រជាធិបតេយ្យកួដស៊ីរី (PYD)។ ក្រុមទាំងពីរនេះ កន្លងមកត្រូវបានរដ្ឋាភិបាលតួកគី ចាត់ទុកថាជាបក្សពួកតែមួយ ជាមួយនឹងចលនាតស៊ូកួដនៅតួកគី ឈ្មោះគណបក្សពលករ កួដឌីស្ថាន ហៅកាត់ថាបេកាកា (PKK)។
នៅព្រឹកថ្ងៃព្រហស្បតិ៍នេះ លោកនាយករដ្ឋមន្រ្តីតួកគី ចេញមុខមកប្រកាសតែម្តង នៅ ចំពោះមុខអ្នកកាសែតថា អំពើភេរវកម្មនេះ គឺជាស្នាដៃរៀបចំរបស់ក្រុម បេកាកានេះឯង ដែលឃុបឃិតគ្នាជាមួយនឹងក្រុមឧទ្ទាមកួគនៅស៊ីរី។ មានមនុស្ស៩ នាក់ត្រូវបានចាប់ខ្លួនផងដែរ នៅថ្ងៃព្រហស្បតិ៍នេះ ដោយគេសង្ស័យថាសុទ្ធតែជាបណ្តាញរបស់ចលនាតស៊ូកួដ។
ក៏ប៉ុន្តែ ភ្លាមៗក្រោយការប្រកាសចោទប្រកាន់នេះ លោក Cemil Bayik ដែលជាមេដឹកនាំម្នាក់ក្នុងគណបក្សបេកាកា បានចេញមុខមកបដិសេធថា ក្រុមបេកាកា មិនបានដឹងឮ មិនបានចូលរួមក្នុងអំពើភេរវកម្មនេះទេ។ ប៉ុន្តែយ៉ាងណាក៏ដោយ លោកបានឆ្លៀតបន្ថែមថា ភេរវកម្មនេះ អាចជាលទ្ធផលសងសឹក ដោយសារតែមួយរយៈពេលចុងក្រោយនេះ ទាហានអាកាសទួកគី បានចូលទៅទម្លាក់គ្រាប់ក្នុងដីស៊ីរី នៅតាមមូលដ្ឋានក្រុមចលនាតស៊ូកួដ នៅក្បែរព្រំដែនតួកគី។
កាំបិតតួកគី កំពុងតែចិតដងឯង៖
អស់មួយសប្តាហ៍មកហើយ ដែលកងទ័ពអាកាសតួកគី បានចូលទៅទម្លាក់គ្រាប់ លើមូលដ្ឋានរបស់ក្រុមចលនាតស៊ូកួដ នៅក្នុងខេត្តអាឡិប ភាគខាងជើងស៊ីរី។ ក្រៅពីទម្លាក់គ្រាប់ តាមការឲ្យដឹងនៅថ្ងៃនេះ តួកគី បានបញ្ជូនក្រុមឧទ្ទាមស៊ីរី ដែលបានបណ្តុះបណ្តាលដោយតួកគី ចំនួន៥០០នាក់ ឲ្យចូលទៅស៊ីរីដើម្បីវាយក្រុមចលនាតស៊ូកួដ នៅខេត្តអាឡិប។ លោក ប្រធានាធិបតីតួកគីបានប្រកាសហើយ ភ្លាមៗក្រោយហេតុការណ៍ភេរវកម្មថា តួកគីមានសិទ្ធិការពារខ្លួន ដោយស្របច្បាប់ ហើយអាចធ្វើបានគ្រប់រូបភាពទាំងអស់។
បញ្ហាជនជាតិកួដនេះស្មុគស្មាញណាស់។ ជនជាតិកួដ មានច្រើនលាននាក់ ដែលរស់នៅរប៉ាត់រប៉ាយ មាននៅក្នុងស៊ីរីផង នៅអ៊ីរ៉ាក់ផង នៅអ៊ីរ៉ង់ផង និងនៅតួកគីផងដែរ។ ចលនាតស៊ូជាច្រើនក្រុមបានបង្កើតឡើង ដើម្បីប្រមូលផ្តុំគ្នា តស៊ូដើម្បីបង្កើតជារដ្ឋកួដឌីស្ថានពេញអធិបតេយ្យ។ ក៏ប៉ុន្តែនេះគ្រាន់តែជាក្តីស្រម័យរបស់ជនជាតិនេះពីមួយជំនាន់ទៅមួយជំនាន់។
ដោយឡែកជនជាតិកួដនៅស៊ីរី ជាក្រុមចលនាមួយដែលប្រឆាំងនឹងរដ្ឋាភិបាលបាស្ឆា អាល់អាសាដផង និងក្រុមជីហាដអង្គការរដ្ឋអ៊ីស្លាមផង។ សង្រ្គាមចលាចលនៅស៊ីរី និងអ៊ីរ៉ាក់ កំពុងត្រូវបានចលនាតស៊ូកួដ យកជាឱកាស ដើម្បីដណ្តើមដែនដីកាន់កាប់ផ្តាច់មុខ។ អញ្ចឹងហើយបានជាតួកគីបារម្ភ ព្រោះខ្លាចក្រុមកួដបានតំបន់កាន់តែធំនៅខាងជើងស៊ីរី ដែលជាប់ព្រំដែនតួកគី។ បើក្រុមកួដមានកម្លាំង នៅក្បែរព្រំដែនតួកគី មានន័យថាក្រុមនេះ និងជះឥទ្ធិពលទៅដល់ចលនាតស៊ូកួដបេកាកា នៅតួកគី។ ហើយស្រួលមិនស្រួល ក្រុមកួដទាំងនេះ អាចរួមកម្លាំងគ្នា ផ្អោបដែនដីភាគខាងត្បូងតួកគី ជាមួយនឹងដែនដីភាគខាងជើងស៊ីរី ឲ្យក្លាយជាដែនដីរបស់ក្រុមកួដតែមួយ តែម្តង ក៏ថាបាន។
នេះហើយជាការបារម្ភរបស់តួកគី ក៏ប៉ុន្តែ បើតាមការយល់ឃើញ របស់អ្នកវិភាគជាច្រើនគឺថា តួកគីបារម្ភជ្រុល ឈ្លក់វង្វេងជ្រុល តែនឹងរឿងខ្លាចក្រុមបេកាកា និងក្រុមកួដដណ្តើមឯករាជ្យ។ តួកគីសុខចិត្តធ្វើគ្រប់យ៉ាង ធ្វើយ៉ាងណាឲ្យតែក្រុមនេះរលាយ បើទោះបីជាត្រូវហុចផលទៅឲ្យក្រុមជីហាដអង្គការរដ្ឋអ៊ីស្លាមក៏ដោយ។ លទ្ធផលយើងឃើញហើយ គឺកាំបិតកំពុងតែចិតដងឯង។ ភេរវកម្មផ្ទួនៗ ជាស្នាដៃរបស់ក្រុមជីហាដផង របស់ក្រុមកួដផង។ តួកគីរបស់លោកអ៊ែរដូហ្កាន់ មានសត្រូវជុំទិសតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ