ឡេតូនី ទ័លចំណេះ នៅពីមុខ ការឃោសនារុស្ស៊ី
ចុះផ្សាយនៅថ្ងៃ៖
ស្តាប់ - ០៥:១៩
ពីរសប្តាហ៍មុន រដ្ឋសភាឡេតូនី បានសារភាពថា ក្រោយពីមានសង្គ្រាមឃោសនា ប្រព្រឹត្តទៅ អស់ពីរឆ្នាំក្នុងប្រទេសខ្លួន គឺជាការឥតប្រយោជន៍សោះ បើនៅតែបន្តប្រឈមទល់ នឹងការឃោសនា ពីខាងរុស្ស៊ី ពីព្រោះអ្នកស្រុកនិយាយភាសារុស្ស៊ី ដែលមានចំនួនដល់ទៅ ៣០% នៃបណ្តាជននៅឡេតូនី ជាទូទៅ គឺមានលក្ខន្តិកៈ “មិនមែនជាពលរដ្ឋ” ឡេតូនីទេ ហើយគេ នៅតែជឿស៊ុបដដែល តាមការឃោសនារបស់រុស្ស៊ី។ នៅពីមុខស្ថានភាពនេះ ប្រធានាធិបតីឡេតូនី បានបង្ហើបឲ្យដឹងថា ក្នុង២ឆ្នាំទៀត ជាកិត្តិយសដល់ ខួប១០០ឆ្នាំ នៃឯករាជ្យរដ្ឋឡេតូនី អ្នកស្រុកបែបនេះមួយចំនួនធំ នឹងទទួលបាន ឋានៈជា “ពលរដ្ឋ” ឡេតូនី។
ទាំងអ្នកនយោបាយឡេតូនី ទាំងអ្នកស្រាវជ្រាវឡេតូនី នាំគ្នានិយាយថា ការតស៊ូដើម្បីបញ្ចុះបញ្ចូល អ្នកស្រុករុស្ស៊ីនិយម ឥតបានហុចមកនូវលទ្ធផល ដែលគេសង្ឃឹមចង់បានឡើយ។
របាយការណ៍ ចេញដោយ មជ្ឈមណ្ឌលខាងសន្តិសុខនិងខាងស្រាវជ្រាវយុទ្ធសាស្ត្រ នៃបណ្ឌិតសភាការពារជាតិឡេតូនី បង្ហាញឲ្យឃើញថា អ្នកស្រុកដែលនិយាយភាសារុស្ស៊ី រស់នៅ ឡេតូនី នៅតែចាត់ទុកខ្លួនគេ ជាពលរដ្ឋប្រទេសរុស្ស៊ី និង អតីតសហភាពសូវៀត ហើយយល់ថា ការជ្រៀតជ្រែកពីខាងរុស្ស៊ី ជារឿងចាំបាច់ត្រូវតែប្រព្រឹត្តទៅ ដើម្បីដោះស្រាយបញ្ហាសិទ្ធិ របស់បណ្តាជននិយាយភាសារុស្ស៊ី ដែលស្ថិតនៅក្រោមការជាន់ឈ្លី ហើយគេជឿថាក្នុងប្រទេសឡេតូនីបច្ចុប្បន្ន កំពុងតែងើប ក្បាលឡើងវិញ គឺរបបហ្វាស៊ីស្តនិយម របបដែលរើសអើង ចំពោះអ្នកស្រុកណាដែលមិនចេះ ភាសាឡេតូនី ជាភាសារដ្ឋ។
ប្រធាន គណៈកម្មការរដ្ឋសភាឡេតូនីខាងបញ្ហាការពារប្រទេស លោក Aynar Latkovskis បាននិយាយត្រង់ៗថា ៖ តើតាមរបៀបណា ដែលត្រូវប្រយុទ្ធទល់នឹងការឃោសនានេះ? រុស្ស៊ីធ្វើការឃោសនានេះ ដូចជំនាន់សូវៀតអញ្ចឹង។ នៅតាមប្រទេសប្រជាធិបតេយ្យ បែបយ៉ាងឡេតូនី មិនមែនជាការងាយស្រួលឡើយប្រើវិធី “លាងខួរក្បាល” មនុស្ស។ តាមខ្ញុំយល់ អាចសម្រេចបានដូចចិត្ត លុះណាតែកន្លងផុត មនុស្សប៉ុន្មានស្រករទៀត។
ការឃោសនា ពីខាងវិមានក្រេមឡាំង ពាំនាំជាគ្រោះថ្នាក់
ជាងពីរឆ្នាំមុន ក្រោយពីវិបត្តិផ្ទុះឡើងនៅអ៊ុយក្រែន ពួកអ្នកនយោបាយឡេតូនី នាំគ្នាបុកពោះ ខ្លាចក្រែងវិបត្តិបែបនេះ កើតឡើងទាំងនៅឡេតូនីដែរ ដោយមកពីមានអ្នកស្រុកនិយាយភាសា រុស្ស៊ី ស់នៅ ក្នុងចំនួនយ៉ាងច្រើន។
ប៉ូលីសសន្តិសុខឡេតូនី បានព្រមានត្រង់ៗ អំពីការគម្រាមដល់សន្តិសុខជាតិ ពីខាងប្រព័ន្ធផ្សព្វផ្សាយរុស្ស៊ី ព្រមទាំងបានអំពាវនាវ ឲ្យកម្រិតការផ្សាយជា “វិទ្ធង្សនា“ របស់ប្រព័ន្ធនេះ ហើយឲ្យបំផុសបំផុលការផ្សាយជាភាសារុស្ស៊ីដែរ ប៉ុន្តែពីខាងទូរទស្សន៍និងវិទ្យុឡេតូនីផ្ទាល់។
មូលហេតុមកពី ជនជាតិរុស្ស៊ីនៅឡេតូនី ពេលមើលទូរទស្សន៍រុស្ស៊ី គឺតែងខ្លបតាមឥទ្ធិពល នៃការឃោសនារុស្ស៊ី ហើយក្នុងករណី បើសេណារីយ៉ូគ្រីមេ កើតឡើងនៅឡេតូនី គេមុខជាស្ថិត នៅខាងវិមានក្រេមឡាំងពុំខាន។ ពិតការយល់ឃើញបែបនេះ ដែលបានបម្រើជាទឡ្ហីករណ៍ ឲ្យបក្សសម្ព័ន្ធអូតង់ ពង្រាយអង្គភាពទ័ពខ្លួន ប្រចាំការនៅឡេតូនី។
ក្នុងន័យនេះ អាជ្ញាធរឡេតូនី បានបិទការផ្សាយរបស់កាណាល់ទូរទស្សន៍រុស្ស៊ី RTR-Russia ក្នុងប្រទេសឡេតូនី ហើយរំលែកទឹកប្រាក់ទាំងលានៗដុល្លារ សម្រាប់បង្កើតឡើង កាណាល់ទូរទស្សន៍សាធារណៈឡេតូនីផ្សាយជាភាសារុស្ស៊ីដែរ និងបានអនុម័តវិសោធនកម្មមួយចំនួន ឆ្ពោះទៅប្រយុទ្ធទល់នឹងគ្រោះថ្នាក់ បណ្តាលមកពី “សង្គ្រាមឃោសនា“។
នីតិវិធីបែបនេះ ក៏កំពុងប្រព្រឹត្តទៅ ទាំង ក្នុងប្រទេសពីរផ្សេងទៀតនៅមាត់សមុទ្របាលទិក គឺ លីទុយអានី និង អេស្តូនី។
ជារឿងថ្លៃ ហើយ គ្មានប្រសិទ្ធិភាព
កន្លងផុតពីរឆ្នាំហើយ ឥឡវបក្សសម្អ័ន្ធអូតង់ បានសម្រេចពង្រាយយោធាខ្លួន ឲ្យវត្តមានជាអចិន្ត្រៃយ៍តែម្តង នៅអឺរ៉ុបខាងកើត ប៉ុន្តែគ្មាននរណាចង់ទប់ទល់នឹងការឃោសនារបស់រុស្ស៊ី ទៀតឡើយ ដ្បិតត្រូវចំណាយច្រើន ហើយបញ្ចុះបញ្ចូល អ្នកស្រុកនិយាយភាសារុស្ស៊ី មិនបានសម្រេចដូចចិត្តឯណា។
ស្របនឹងទិន្នន័យ ផ្តល់ដោយក្រុមហ៊ុនទូរទស្សន៍ឡេតូនី TNS ៖ ក្នុង២ឆ្នាំកន្លងទៅនៃការផ្សាយ របស់កាណាល់ទូរទស្សន៍រដ្ឋរុស្ស៊ី “ប៉ុស្តលេខ-១ “ ជះទៅលើ ប្រទេសឡេតូនី តាមរយៈកាណាល់បាល់ទិកទី១ ប្រជាប្រិយភាពនៃកាណាល់ទូរទស្សន៍សាធារណៈឡេតូនី LTV បានធ្លាក់ពី ២,៧% មកនៅត្រឹម ២%។
លទ្ធផលនៃការស្រាវជ្រាវ ក៏សឲ្យឃើញថា ពីក្នុងចំណោមអ្នកស្រុកឡេតូនី ដែលនិយាយភាសារុស្ស៊ី មានដល់ទៅ ៤៦% មិនខ្ចីមើល និង មិនខ្ចីស្តាប់ឡើយប្រព័ន្ធផ្សព្វផ្សាយឡេតូនី។
ដោយសិក្សា អំពីបញ្ហា តើសង្គមឡេតូនី អាចធ្លាក់ក្នុង”អស្ថិរភាព” ឬទេ បណ្ឌិតសភាការពារប្រទេសឡេតូនី បានចេញរបាយការណ៍ដែលថា ទោះបីអាជ្ញាធរឡេតូនី ខំតស៊ូអស់២ឆ្នាំក្តី ទល់នឹងការឃោសនារបស់វិមានក្រេមឡាំង ក៏បណ្តាជនឡេតូនីដែលនិយាយភាសារុស្ស៊ី ភាគច្រើន នៅតែប្រកាន់យកបន្ទាត់អែបទៅខាងរុស្ស៊ី ទាំងក្នុងរឿងជម្លោះនៅអ៊ុយក្រែន ទាំងអំពីស្ថានភាពរបស់គេផ្ទាល់ ដែលត្អូញថា ដោយកាន់ក្រដាសស្នាម ដែលថា គេ “មិនមែនជាពលរដ្ឋ” ឡេតូនី គេតែងរងនូវការរើសអើង ពីខាងរដ្ឋអំណាចឡេតូនីផ្ទាល់។ ជាក់ស្តែង ក្នុងលក្ខន្តិកៈបែបនេះ គេគ្មានសិទ្ធិបោះឆ្នោតទេ។
បន្ថយចំនួន អ្នកស្រុកដែលថា “មិនមែនជាពលរដ្ឋ “ ឡេតូនី
អាជ្ញាធរឡេតូនី គ្រោងកាត់បន្ថយចំនួនអ្នកស្រុក ដែលមានលក្ខន្តិកៈ “មិនមែនជាពលរដ្ឋ” ហើយ ដែលក្នុងនោះ ភាគច្រើនលើសលុប គឺ អ្នកដែលនិយាយភាសារុស្ស៊ី។ កាត់បន្ថយនេះ គឺតាម រយៈ ការប្រគល់ទៅអ្នកស្រុកបែបនេះមួយចំនួនធំតែម្តង នូវលក្ខន្តិកៈជា ”ពលរដ្ឋ”។ ការប្រគល់នេះ ជាភារកិច្ចនៃក្រុមប្រឹក្សា ផ្សំឡើង ពីប្រធានាធិបតីបច្ចុប្បន្ន លោក Raymond Vejonis និង បណ្តាអតីតប្រមុខរដ្ឋឡេតូនី។ ពិធីប្រគល់ នឹងប្រព្រឹត្តទៅក្នុងឆ្នាំ២០១៨ ជាឆ្នាំខួប គម្រប់ ១០០ឆ្នាំ តាំងពីរដ្ឋឡេតូនីបានឯករាជ្យ ក្នុងឆ្នាំ១៩១៨ មក។ តាមស្ថិតិចុងក្រោយ ឡេតូនី មានបណ្តាជនសរុប គឺ ប្រមាណ២លាននាក់ ដែលពីក្នុងនោះ ម្តុំ ៣០% ជា អ្នកស្រុកនិយាយ ភាសារុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ