ឡេតូនីទទួលជនភៀសខ្លួនតាមបង្គាប់ក្រុងព្រុចសែលប៉ុន្តែដោយចំណាយតិច
ចុះផ្សាយនៅថ្ងៃ៖
ស្តាប់ - ០៦:២២
ក្នុងឋានៈជាសមាជិកសហភាពអឺរ៉ុបតាំងពីឆ្នាំ២០០៤មកឡេតូនីមានភារៈចែករំលែកបន្ទុកនៃរលកជនភៀសខ្លួនហូរភ្លូកទឹកភ្លូកដីចូលសហភាពនេះក្លាយជាឆ្អឹងទទឹងកទៅហើយ។ ប៉ុន្តែឡេតូនីចេះរកឃើញស្នៀតគេចឲ្យផុតពីការស្នាក់នៅជាប់លើដីខ្លួននៃជនភៀសខ្លួនដោយព្រមជាមួយនេះបំពេញតាមកាតព្វកិច្ចខ្លួនខាងទទួលពួកគេឲ្យជ្រកកោន។ មូលហេតុ មកពីឡេតូនីបានបង្កលក្ខណៈមិនអនុគ្រោះឡើយសម្រាប់ការរស់នៅទីនោះ សូម្បីបើពួកគេចង់ណាស់ណាក្តីពីព្រោះគេមុខជាគ្មានធនធានសម្រាប់រស់ទៅកើត។
ស្របនឹងសណ្តាប់ធ្នាប់អនុម័តនៅសហភាពអឺរ៉ុប ប្រទេសនិមួយៗពីក្នុងចំណោម ២៨ ប្រទេសជាសមាជិក មានកាតព្វកិច្ចត្រូវទទួលជនភៀសខ្លួនទៅតាមកូតារបស់ខ្លួន។ សម្រាប់ឡេតូនី ដែលមានបណ្តាជនប្រមាណ២លាននាក់ កូតានេះ គឺ ៥៣១នាក់។
លទ្ធផលនៃការស្ទង់មតិ ធ្វើក្នុងខែមករាកន្លងទៅ ដោយក្រុមហ៊ុនសង្គមសាស្ត្រ SKDS សឲ្យឃើញថាអ្នកស្រុកឡេតូនីដល់ទៅ ៧៨,៣% នាំគ្នាចេញមុខប្រឆាំងនឹងការទទួលជនភៀសខ្លួននៅលើទឹកដីខ្លួន។ គ្រាន់តែក្នុងកន្លះឆ្នាំចុងក្រោយ នៅក្នុងក្រុង Riga រដ្ឋធានីប្រទេសមានប្រព្រឹត្តទៅអស់ ៦លើកហើយបាតុកម្មប្រឆាំងនឹងការត្រូវមកដល់ឡេតូនី នៃពួកជនភៀសខ្លួន។
សម្រាប់បំពេញតាមកូតា ដែលឡេតូនី បានទទួលយកមកដាក់លើខ្លួន ពួកអ្នកតំណាងនៃក្រសួងមហាផ្ទៃប្រទេសនេះ បានទៅកាន់ភូមិភាគខាងត្បូងទ្វីបអឺរ៉ុបដើម្បីធ្វើការស្រាល់ជ្រើសហើយនាំមកកាន់ដែនដីឡេតូនីគឺតែជនភៀសខ្លួនណា ដែលឆ្លើយស្របនឹងទាមទារបីចំណុចនៃច្បាប់ឡេតូនីផ្ទាល់ពោលគឺ ៖ ស្ថានភាពគ្រួសារជននោះ តើភាសាណាដែលគេចេះនិយាយនិងចេះសរសេរ, តើគេមានចំណេះដឹងក្នុងកម្រិតណា។
កាលពីដើមខែកុម្ភៈនេះ អ្នកនាំពាក្យផ្លូវការនៃក្រសួងមហាផ្ទៃឡេតូនីបានថ្លែងថា៖ក្នុងដំណាក់ឥឡូវពីក្នុងចំណោមជនភៀសខ្លួននិងជនបន្លាស់ទីដែលបានឆ្លងសមុទ្រ មកដល់ភូមិភាគខាងត្បូងទ្វីបអឺរ៉ុប គ្មាននរណាម្នាក់សុខចិត្តបន្តដំណើរ មកកាន់ឡេតូនីឡើយ។ គាត់បំភ្លឺឲ្យដឹងថាគេទាំងនោះជាទូទៅប្រាថ្នាធ្វើដំណើរទៅកាន់ប្រទេសណាដែលមានសាច់ញាតិគេស្ថិតនៅស្រាប់ទៅហើយគឺប្រទេសដែលតាំងពីយូរមកហើយ បានបើកទ្វារទទួលជនភៀសខ្លួន។
ចំណែកសម្រាប់ឡេតូនីនិងប្រទេសពីរទៀតនៅមាត់សមុទ្របាល់ទិក ពោលគឺ លីទុយអានី និងអេស្តូនី ការទទួលជនភៀសខ្លួនឲ្យជ្រកកោនជារឿងថ្មី។
ប៉ុន្តែប៉ុន្មានថ្ងៃមុន មានលេចចេញមក ដំណឹងដែលថាពីក្នុងកូតា ៥៣១នាក់នោះ មានពីរគ្រួសារគឺមួយមកពី Erythrée មួយទៀតមកពី Syrie បានមកដល់ឡេតូនីមែន។ តាមបទយកការណ៍ផ្សាយដោយអ្នកកាសែត ២០នាក់ពីកន្លែងផ្ទាល់ គឺមានអ្នកស្រុកឡេតូនី ប្រមាណ ៣០០នាក់ បាននាំគ្នាឈរសំដែងការប្រឆាំងទល់នឹងការមកដល់នៃជនភៀសខ្លួនទាំងនោះ។
ដេប៉ារតឺម៉ង់ខាងកិច្ចការសញ្ជាតិនិងជនបន្លាស់ទីឡេតូនី បានឲ្យដឹងថា ក្រោយពីមកដល់ភ្លាម ជនបន្លាស់ទីទាំងនោះ ត្រូវបានអាជ្ញាធរ ដាក់ឲ្យស្នាក់នៅក្នុងមជ្ឈមណ្ឌលពិសេស ដើម្បីរង់ចាំ សេចក្តីសម្រេចតើគេអាចទទួលឬទេ លក្ខន្តិកៈផ្លូវការជាជនភៀសខ្លួន។ ពេលស្នាក់នៅទីនេះ គេមានដំបូលជ្រកព្រមទាំងទទួលក្នុង១ថ្ងៃៗ គឺប្រាក់ ២,១៥ € សម្រាប់ទិញគ្រឿងបរិភោគនិងសម្រាប់ការចំណាយផ្សេងទៀត។ ជាការកត់សម្គាល់ ឡេតូនី បានចូលក្នុងតំបន់ចាយលុយ € គឺ កាលពីថ្ងៃ ១មករាឆ្នាំ២០១៤។
រយៈពេលដែលគេត្រូវរង់ចាំ សេចក្តីសម្រេចអំពីលក្ខន្តិកៈរបស់គេ អាចពន្យារទៅពី៣ដល់៦ខែ។ ក្នុងរយៈពេលនេះ សាមីខ្លួនរៀនភាសាឡេតូនីដោយរដ្ឋឡេតូនីជាអ្នកបង់ថ្លៃ។សម្រាប់ អនក្ខរជន ដែលមិនចេះនខ្វាក់ ការបង្រៀនគេត្រូវស៊ីពេលដល់ទៅ ៤៨០ម៉ោង ដើម្បីឲ្យគេចេះ អក្សរឡេតូនី ថ្នាក់ទាបបំផុតហៅថាថ្នាក់ A-1។ បើ សម្រាប់អ្នកដែលមានសញ្ញាប័ត្រឧត្តមសិក្សា គឺត្រូវរៀនភាសាឡេតូនីតែ ៣២០ម៉ោងប៉ុណ្ណោះ ដើម្បីចេះក្នុងកម្រិត A-2។
ទីភ្នាក់ងារភាសាឡេតូនី គូសបញ្ជាក់ថាក្នុងរយៈពេល ពី៣ទៅ៦ខែដែលសាមីជន រង់ចាំទទួល ស្ថានភាពជាជនភៀសខ្លួន គេត្រូវរៀនភាសាឡេតូនី ឲ្យចេះ យ៉ាងហាចណាស់ក្នុងកម្រិត A-1។
បើមិនចេះភាសាឡេតូនីក្នុងកម្រិតនេះទេ ជនភៀសខ្លួន មិនអាចត្រូវទទួលឲ្យធ្វើការឡើយ សូម្បីជាកសិករជាអ្នកគង្វាលចៀម ជាអ្នកសម្អាតទីធ្លា ឬជាអ្នកបោសសម្រាម។ ហើយដើម្បីធ្វើការជាអ្នកបម្រើក្នុង Bar ឬជាជាងកាត់សក់ គឺត្រូវចេះភាសាឡេតូនីចាប់ពីកម្រិត A-2 ទៅ។ បើហ៊ានធ្វើការដោយមិនចេះភាសាឡេតូនី ជាភាសារដ្ឋ នោះសាមីជនព្រមទាំងនិយោជកនឹងត្រូវរដ្ឋពិន័យជាប្រាក់យ៉ាងក្រាស់ក្រែល។
ដរាបណាមានការធ្វើហើយជនភៀសខ្លួន លែងទទួលទៀតឡើយប្រាក់អាហារ ២,១៥ € ក្នុង១ថ្ងៃ។ គេចាប់ផ្តើមជីវភាពរស់នៅដោយម្ចាស់ការណ៍ខ្លួនឯងដោយបង់ថ្លៃលំនៅខ្លួនឯង។
ប្រសិនបើជនភៀសខ្លួនចេះភាសាឡេតូនីទៅហើយ ស្រាប់តែមិនចង់ធ្វើការហើយចង់បន្ត ការសិក្សា នោះគេអាចទទួលប្រាក់ឧបត្ថម្ភពីរដ្ឋក្នុង១ខែៗ គឺ ១៣៩ €។ អាចទទួលប្រាក់ជំនួយក្នុងទំហំនេះគឺតែសមាជិកម្នាក់ប៉ុណ្ណោះនៃគ្រួសារ។ សមាជិកឯទៀតអាចទទួលម្នាក់ៗតែ ៩៧ €។ ដូច្នេះ បើគ្រួសារមានគ្នា៤នាក់ នោះគេអាចទទួលសរុបទៅ គឺតែ ៤៣០ € ក្នុង១ខែ។ ក្នុងករណី ដែលសាមីជន រកការធ្វើ បានដូចចំណូលចិត្តខ្លួន នោះគេលែងទទួលប្រាក់ឧបត្ថម្ភពីរដ្ឋទឿតឡើយ។ ចំណែកប្រាក់ ៤៣០ € នោះ គឺគេត្រូវបង់សព្វបង់គ្រប់តាំងពីថ្លៃជួលលំនៅរហូតដល់ថ្លៃអាហារ។
បើនិយាយពីថ្លៃទឹកថ្លៃភ្លើងថ្លៃទូរស័ព្ទ សម្រាប់លំនៅមានមួយបន្ទប់ក្នុងក្រុង Riga គឺម្តុំ ១០០ € ថ្លៃជួលលំនៅបែបនេះ យ៉ាងហោចណាស់ គឺ ១៥០ € ក្នុង១ខែ ថ្លៃធ្វើដំណើរមួយលើកៗ តាម យានជំនិះសាធារណៈក្នុងក្រុងគឺ ២ €។ គ្រួសារណា ដែលទទួលបានសម្រាប់សមាជិកម្នាក់ៗ ត្រឹម ១០៧,៥ € គឺត្រូវចាត់ទុកថាក្រីក្រ ហើយអាចទទួលប្រាក់ជំនួយពីរដ្ឋ ២៤១ € ក្នុង១ខែ។
ទោះមានការឧបត្ថម្ភពីរដ្ឋក្តី ក៏ខ្ទង់ចំណូលនៃគ្រួសារជនភៀសខ្លួន ស្ថិតនៅទាបនៅឡើយ តែម្តុំ ៣៣៥ € សម្រាប់មនុស្សពេញវ័យម្នាក់ៗ។ ជាការប្រៀបធៀប នៅឡេតូនី ប្រាក់ខែមធ្យម ក្នុងឆ្នាំ ២០១៤ គឺ ៥៦០ € គេជាអ្នកស្រុកមានផ្ទះខ្លួនឯងស្រាប់ មិនចាំបាច់បង់ថ្លៃជួលលំនៅឡើយ។
នៅទីបញ្ចប់ គួរនិយាយថា ជនភៀសខ្លួនដែលចេះទទួលបានសញ្ជាតិឡេតូនីមុនគេ កាលក្នុងឆ្នាំ ២០០៥ គឺមកពី ប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ