លោក Emmerson Mnangagwa ស្បថចូលកាន់តំណែងជាប្រធានាធិបតីស៊ីមបាវ៉េ
លោក Emmerson Mnangagwa បានស្បថចូលកាន់តំណែងជាប្រធានាធិបតីស៊ីមបាវ៉េ ជាផ្លូវការហើយ នៅថ្ងៃសុក្រនេះ។ ការឡើងកាន់តំណែងរបស់លោក Mangagwa នាពេលនេះ ត្រូវបានគេចាត់ទុកថា ជាការបិទទំព័រប្រវត្តិសាស្ត្ររបស់លោក រ៉ូប៊ឺត មូហ្គាបេ ដែលបានលាលែងចេញពីតំណែងកាលពីថ្ងៃអង្គារដើមសប្ដាហ៍នេះ ដោយមានការដាក់គំនាបពីក្រុមយោធា និងគណបក្សរបស់លោក។ យ៉ាងណាក៏ដោយ លោក Emmerson Mnangagwa ត្រូវបានកាសែតរដ្ឋស្រង់សម្ដីថា បានសន្យាធានាសន្តិសុខនិងសុខុមាលភាពជាអតិបរមាសម្រាប់លោក មូហ្គាបេ និងគ្រួសារ ក្នុងនាមជាពលរដ្ឋស៊ីមបាវ៉េ។
ចុះផ្សាយនៅថ្ងៃ៖
ស្តាប់ - ០២:១៩
ពិធីស្បថចូលកាន់តំណែងរបស់ លោក Emmerson Mnangagwa បានរៀបចំធ្វើនៅពហុកីឡដ្ឋានជាតិ នៅជាយទីក្រុងហារ៉ារ៉េ នៅថ្ងៃសុក្រ ទី២៤វិច្ឆិកានេះ ដោយមានការចូលរួមអបអរពីសំណាក់ប្រជាពលរដ្ឋស៊ីមបាវ៉េយ៉ាងច្រើនកុះករ។ នៅក្នុងពិធីនោះ លោក Emmerson Mnangagwa ក្នុងវ័យ៧៥ឆ្នាំ បានស្បថថា លោកនឹងស្មោះត្រង់នឹងស៊ីមបាវ៉េ ហើយគោរព គាំទ្រ និងការពាររដ្ឋធម្មនុញ្ញព្រមទាំងច្បាប់ដទៃទៀតរបស់ស៊ីមបាវ៉េ។
គួររំឭកឡើងវិញបន្តិចថា ការឡើងកាន់តំណែងជាប្រធានាធិបតីស៊ីមបាវ៉េ របស់លោក Mnangagwa នាពេលនេះ ធ្វើឡើងតែប៉ុន្មានថ្ងៃប៉ុណ្ណោះ ក្រោយពេលលោក រ៉ូប៊ឺត មូហ្គាបេ លាលែងពីតំណែង។ មែនទែនទៅ លោក មូហ្គាបេ ដែលស្ថិតក្នុងស្ថានភាពសុខភាពទន់ខ្សោយ មានបំណងចង់ឲ្យភរិយារបស់លោកស្នងតំណែងជាប្រធានាធិបតីស៊ីមបាវ៉េ។ ប៉ុន្តែបំណងនេះមិនបានសម្រេច ដោយសារតែការដាក់គំនាបពីក្រុមយោធានិងគណបក្សរបស់លោក។
សារព័ត៌មានរដ្ឋរបស់ស៊ីមបាវ៉េ បានអះអាងកាលពីពេលមុននេះថា លោក មូហ្គាបេ អាចចូលរួមនៅក្នុងពិធីស្បថចូលកាន់តំណែងរបស់ប្រធានាធិបតីថ្មី។ ប៉ុន្តែក្រោយមក ព័ត៌មានឲ្យដឹងថា លោកមូហ្គាបេ និងលោក Mnangagwa បានជជែកគ្នានិងព្រមព្រៀងគ្នាថា លោកមូហ្គាបេ ត្រូវការសម្រាក។ ចំណែកប្រធានាធិបតីថ្មីស៊ីមបាវ៉េ លោក Emmerson Mnangagwa ត្រូវបានកាសែតរាយការណ៍ទៀតថា លោកបានធានាដល់លោកមូហ្គាបេ និងគ្រួសាររបស់លោកមូហ្គាបេ នូវសន្តិសុខនិងសុខុមាលភាពជាអតិបរមា ក្នុងជីវិតឯកជន ជាពលរដ្ឋស៊ីមបាវ៉េ។
ជាការពិត ការធានារបស់លោក Emmerson Mnangagwa ចំពោះលោក មូហ្គាបេ មិនមែនជារឿងគួរឲ្យភ្ញាក់ផ្អើលទេ។ គេធ្លាប់ដឹងកន្លងមកហើយថា លោក Mnangagwa មានប្រវត្តិជាមនុស្សជំនិតរបស់លោកមូហ្គាបេ ជាអតីតអនុប្រធានាធិបតីដេលត្រូវបានលោក មូហ្គាបេ បណ្ដេញចេញពីតំណែង។ ធ្លាប់ជារដ្ឋមន្ដ្រីក្រសួងការពារជាតិ មានទំនាក់ទំនងល្អជាមួយមេទ័ពឯទៀត លោក Emmerson Mnangagwa មានរហ័សនាមថា ក្រពើ ព្រោះលោកជាមនុស្សស្ងប់ស្ងាត់ មិនមាត់មិនក តែជាមនុស្សសាហាវ និងគ្រោះថ្នាក់បំផុត។ យ៉ាងណាក៏ដោយ តាមរយៈការចូលកាន់តំណែងជាប្រធានាធិបតីរបស់លោក Mnangagwa គេសង្ឃឹមថា ស៊ីមបាវ៉េ នឹងបើកចំហរជើងមេឃ ទាំងផ្នែកការទូត និងសេដ្ឋកិច្ច ដើម្បីស្ដារមុខមាត់ប្រទេសឡើងវិញ ក៏ដូចជាដើម្បីផ្ដល់ការងារធ្វើដល់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ