លោក ហ៊ុន សែន ផ្តាំទៅកាន់អ្នកប្រឆាំង កុំឲ្យរំពឹងលើបញ្ហាសុខភាព ដើម្បីផ្តួលរំលំលោកចេញពីអំណាច
លោកនាយករដ្ឋមន្រ្តី ហ៊ុន សែន នៅថ្ងៃទី ០៨ ឧសភានេះ បានបង្ហាញមុខជាសាធារណៈជាលើកដំបូង ជាមួយនឹងសុខភាពល្អធម្មតា បន្ទាប់ពីលោកបានវិលត្រលប់មកពីពិនិត្យមើលសុខភាពនៅឯប្រទេសសិង្ហបុរី។ កាលពីសប្តាហ៍មុន លោក ហ៊ុន សែន បានសម្រេចលុបចោលកម្មវិធីជួបជុំមួយចំនួន ដោយសារតែលោកមានបញ្ហាសុខភាព។ ប៉ុន្តែនៅក្នុងទិវាកាកបាទក្រហម អឌ្ឍចន្ទក្រហមខួបលើកទី ១៥៤ នាទីក្រុងភ្នំពេញ នៅថ្ងៃនេះ លោកនាយករដ្ឋមន្រ្តី បានផ្តាំទៅកាន់អ្នកដែលប្រឆាំងនឹងរូបលោកថា សូមកុំឲ្យរំពឹងលើបញ្ហាសុខភាពរបស់លោក ដើម្បីផ្តួលរំលំលោកចេញពីអំណាច។
ចុះផ្សាយនៅថ្ងៃ៖
ស្តាប់ - ០១:៥៨
ការប្រកាសរបស់លោកនាយករដ្ឋមន្រ្តី ហ៊ុន សែន បានធ្វើឡើងនៅចំពោះមុខសមាជិក-សមាជិកាកាកបាទក្រហម អឌ្ឍចន្ទក្រហម (Red Cross) និងសមាជិករាជរដ្ឋាភិបាល រដ្ឋសភា ព្រឹទ្ធសភា អ្នកជំនួញ អ្នកឧកញ៉ា និងអ្នកមុខអ្នកការរាប់រយនាក់ នៅក្នុងពិធីអបអរសាទរទិវាកាកបាទក្រហម អឌ្ឍចន្ទក្រហម ខួបលើកទី ១៥៤ ដោយបានផ្តាំទៅកាន់អ្នកប្រឆាំងនឹងរូបលោក សូមកុំឲ្យរំពឹងលើបញ្ហាសុខភាពរបស់លោក ដើម្បីផ្តួលរំលំលោកចេញពីអំណាច។លោក ហ៊ុន សែន បានមានប្រសាសន៍ថា ទេវតាបានចារឲ្យលោកនៅទីនេះ ជាច្រើនឆ្នាំមកហើយ ហើយសូមកុំរំពឹងថា អាចផ្តួលរំលំលោកចេញពីអំណាច ដោយសារតែការរងចាំឱកាសនៃបញ្ហាសុខភាពរបស់លោក ឬការស្លាប់របស់លោកឲ្យសោះ។
គួរជំរាបជូនថា លោកនាយករដ្ឋមន្រ្តី ហ៊ុន សែន កាលពីសប្តាហ៍មុននេះ បានសម្រេចលុបចោលកម្មវិធីដែលបានគ្រោងទុកមួយចំនួន ដូចជាជំនួបជាមួយមន្ត្រីរាជការ កងកម្លាំងប្រដាប់អាវុធនៅខេត្តកំពង់ស្ពឺ កាលពីថ្ងៃទី ០៤ ឧសភា និងជំនួបជាមួយអ្នកការទូតបរទេសមួយចំនួនទៀត ដូចជា ប្រទេសជប៉ុន ឥណ្ឌា និងបារាំង ផងដោយសារតែលោកត្រូវទៅពិនិត្យសុខភាពនៅក្នុងប្រទេសសិង្ហបុរីជាបន្ទាន់។ ដំណឹងនេះ ត្រូវបានប្រកាសឲ្យដឹង បន្ទាប់ពីលោកបានសរសេរនៅលើគណនេយ្យហ្វេសបុក (Facebook) ផ្លូវការរបស់លោកដោយមានភ្ជាប់ជាមួយរូបថតនៅលើគ្រែពេទ្យ កាលពីថ្ងៃទី ០៤ ឧសភា។ ប៉ុន្តែលោកនាយករដ្ឋមន្រ្តី ហ៊ុន សែន ដែលបានដឹកនាំប្រទេសកម្ពុជាជាង ៣ទស្សវត្សន៍មកនេះ មិនបានប្រកាសថា លោកមានជម្ងឺអ្វីនោះទេ។
យ៉ាងណាក៏ដោយ នៅព្រឹកមិញនេះ លោកនាយករដ្ឋមន្រ្តី បានឆ្លៀតថ្លែងអំណរគុណចំពោះប្រជាពលរដ្ឋកម្ពុជា មន្រ្តីរាជការ និងថ្នាក់ដឹកនាំមួយចំនួនទៀត ដែលបានផ្ញើសារជូនពរលោក ឲ្យមានសុខភាពល្អ និងឆាប់ជាសះស្បើយពីជម្ងឺ។ ហើយក្នុងចំណោមអ្នកដែលបានផ្ញើសារជូនពរទាំងនោះ ក៏មានសារជូនពរពីអតីតប្រធានគណបក្សសង្រ្គោះជាតិលោក សម រង្ស៊ី ផងដែរ។
សូមបញ្ជាក់ថា លោកនាយករដ្ឋមន្រ្តី ហ៊ុន សែន ទើបតែបានវិលត្រលប់មកពីប្រទេសសិង្ហបុរីវិញ កាលពីរសៀល ថ្ងៃទី ៧ ឧសភា ម្សិលមិញនេះ។ លោកបានសរសេរនៅលើទំព័រហ្វេសបុករបស់លោកថា លោកបានវិលត្រឡប់មកដល់កម្ពុជាវិញជាមួយនឹងសុខភាពយ៉ាងល្អប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ