លោកនាយករដ្ឋមន្រ្តីមហាធៀរចង់សើរើគម្រោងវិនិយោគរបស់ចិន នៅម៉ាឡេស៊ី
លោកមហាធៀរ មហាម៉ាត់ នាយករដ្ឋមន្រ្តីថ្មីរបស់ម៉ាឡេស៊ី បាននិយាយថា លោកនឹងពិភាក្សាជាមួយរដ្ឋាភិបាលចិន ពីគម្រោងការវិនិយោគរបស់ចិន នៅប្រទេសម៉ាឡេស៊ី ដែលលោកវាយតម្លៃថា មិនយុត្តិធម៌សម្រាប់ម៉ាឡេស៊ី។ នៅថ្ងៃសុក្រម្សិលមិញ នាយករដ្ឋមន្រ្តីម៉ាឡេស៊ីបាននិយាយថា លោកនឹងធ្វើដំណើរទៅប្រទេសចិន នៅខែក្រោយ ដើម្បី និយាយពីគម្រោងការធំៗមួយចំនួន ដែលចិន ធ្លាប់បានចុះហត្ថលេខាជាមួយរដ្ឋាភិបាលរបស់លោកណាជីប រ៉ាហ្សាក់។ លោករ៉ាហ្សាក់ អតីតនាយករដ្ឋមន្រ្តី ម៉ាឡេស៊ី ដែលទើបត្រូវបានតុលាការទើបចោទប្រកាន់ជាផ្លូវការ កាលពីអង្គារ ពីប្រព្រឹត្តអំពើរឿងពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
នៅពេលឈ្នះឆ្នោត ចូលកាន់តំណែងជានាយករដ្ឋមន្រ្តីថ្មីរបស់ម៉ាឡេស៊ី លោកមហាធៀរ មហាម៉ាត់ បានសន្យាស្តារឡើងវិញ ថវិកាជាតិ ដែលលោកវាយតម្លៃថា បានធ្លាក់ចុះខ្លាំង នៅក្រោយរដ្ឋាភិបាលមុនរបស់លោកណាជីប រ៉ាហ្សាក់ ជាប់ពាក់ព័ន្ធ រឿងអាស្រូវពុករលួយ។ ជាផ្នែកមួយ នៃការស្រោចស្រង់ថវិកាជាតិ លោកមហាធៀ កាលពីចុងខែឧសភា បានប្រកាសលុបចោល គម្រោងសាងសង់ផ្លូវដែក តម្លៃ ១៥ពាន់លានដុល្លារ ដែលតភា្ជប់ពីម៉ាឡេស៊ី ទៅប្រទេសសិង្ហបុរី។
នៅសប្តាហ៍នេះ រដ្ឋាភិបាលរបស់លោកមហាធៀរ បានបែរផ្តោតវិញម្តង ទៅលើការគម្រោងការវិនិយោគរបស់ចិន ដែលត្រូវបានអនុម័ត ដោយរដ្ឋាភិបាលមុនរបស់លោកណាជីប រ៉ាហ្សាក់។ កាលពីថ្ងៃព្រហស្បតិ៍ ម៉ាឡេស៊ី បានប្រកាសផ្អាកព្យួរ គម្រោងការរបស់ចិន ចំនួន៣ ដែលនៅក្នុងនោះ មានមួយ ជាគម្រោងសាងសង់ផ្លូវដែក តភ្ជាប់ទៅប្រទេសថៃ ដែលមានតម្លៃ ២០ពាន់លានដុល្លារ។ តាមក្រសួងហិញ្ញវត្ថុម៉ាឡេស៊ី គម្រោងការសង់ផ្លូវដែក ម៉ាឡេស៊ី ដែលបានទទួល ប្រាក់កម្ចី ពីចិន ត្រូវបានផ្តល់ទៅឲ្យក្រុមហ៊ុនចិន ជាអ្នកសាងសង់។ មួយវិញទៀត នៅក្នុងគម្រោងការតភ្ជាប់បំពង់បង្ហូរប្រេងដែលមានតម្លៃ ជាង ២ពាន់លានដុល្លារ រដ្ឋាភិបាលម៉ាឡេស៊ីបានបង់ថ្លៃសងប្រមាណ ៨៨ភាគរយទៅឲ្យក្រុមហ៊ុនចិន ក្នុងពេលដែលក្រុមហ៊ុនចិន ទើបសម្រេចការងារបានប្រមាណ ១៣ភាគរយប៉ុណ្ណោះ។
នៅថ្ងៃសុក្រ លោកនាយករដ្ឋមន្រ្តីម៉ាឡេស៊ី បាននិយាយថា លោកនឹងធ្វើដំណើរទៅប្រទេសចិន នៅខែសីហាដើម្បី ពិភាក្សាអំពីគម្រោងមួយចំនួន ដែលអនុម័តដោយរដ្ឋាភិបាម៉ាឡេស៊ីមុន ប៉ុន្តែ ដែលមានលក្ខណៈអយុត្តិធម៌សម្រាប់ប្រទេសម៉ាឡេស៊ី។ “ចង់ទៅប្រទេសចិន ឲ្យបានឆាប់ ប៉ុន្តែ ប្រធានាធិបតីចិន លោកស៊ី ជីនពីងនិយាយថា លោកមិនទំនេរ នៅខែកក្កដា។ ដូច្នេះ ខ្ញុំនឹងទៅប្រទេសចិន នៅខែសីហាវិញ ដើម្បី និយាយរឿងជាច្រើន ក្នុងនោះមានផងដែរ គម្រោងការដែលមិនយុត្តិធម៌ សម្រាប់ម៉ាឡេស៊ី ហើយនិងប្រាក់កម្ចីរបស់ចិន។ អត្រាការប្រាក់ដែលចិន យកពីរដ្ឋាភិបាលម៉ាឡេស៊ី នៅពេលនេះ គឺខ្ពស់ជាងអត្រាដែលមានចែងក្នុងកិច្ចសន្យា។” នេះជាប្រសាសន៍របស់លោកមហាធៀរ នៅក្នុងសន្និសីទកាសែត កាលពីថ្ងៃសុក្រ។
នៅក្រោមការដឹកនាំរបស់លោកណាជីប រ៉ាហ្សាក់ រដ្ឋាភិបាលម៉ាឡេស៊ី បានចងសម្ព័ន្ធមិត្តភាពដ៏កក់ក្តៅជាមួយប្រទេសចិន និងបានចុះហត្ថលេខាលើគម្រោងការជាច្រើន ដែលមានចិន ម្ចាស់គម្រោង និងជាម្ចាស់បំណុល។ ប៉ុន្តែ អ្នករិះគន់ជាច្រើនលើកឡើងថា គម្រោងវិនិយោគរបស់ចិន ដែលមានមកជាមួយ នឹងប្រាក់កម្ចី បានធ្វើឲ្យប្រាក់បំណុលជាតិរបស់ម៉ាឡេស៊ីបានកើនឡើងដល់២៥១ពាន់លានដុល្លារ។ មួយវិញទៀត កិច្ចព្រមព្រៀងដែលភាគច្រើន គ្មានតម្លាភាព ត្រូវបានគេសង្ស័យថា ជារូបភាពឆ្ពិនភ្នែកមួយ ដែលណាជីប បង្កើតឡើង ដើម្បី ដោះស្រាយប្រាក់បំណុល ក្នុងរឿងអាស្រូវពុករលួយ កេងបន្លំលុយរដ្ឋ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ