ឥណ្ឌា៖ ប្រធានាធិបតីថ្មី អាចជាមនុស្សមកពីវណ្ណៈទាបបំផុត នៃសង្គមឥណ្ឌា
ចុះផ្សាយនៅថ្ងៃ៖
ស្តាប់ - ០៦:០៧
សមាជិកសភាសហព័ន្ធ និងសភាតាមរដ្ឋ នៅប្រទេសឥណ្ឌា បានធ្វើការបោះឆ្នោត ជ្រើសរើសប្រធានាធិបតីថ្មីរបស់ឥណ្ឌា កាលពីថ្ងៃចន្ទទី១៧ កក្កដា។ មានបេក្ខជនពីររូប គឺជាមនុស្សមកពីសហគមន៍ដាលីត ឬដែលជាប្រជាជនស្ថិតក្នុងវណ្ណៈទាបជាងគេបំផុត នៅក្នុងសង្គមហិណ្ឌូឥណ្ឌា។ នេះគឺជាលើកទី២ហើយ ដែលឥណ្ឌា កំពុងឈានទៅបោះឆ្នោត ជ្រើសរើសប្រធានាធិបតី ដែលមកពីវណ្ណៈទាបជាងគេបំផុតនេះ ខណៈដែលប្រជាជនវណ្ណៈដាលីតនេះ រស់នៅក្នុងភាពក្រីក្រតោកយ៉ាក និងត្រូវបានមនុស្ស វណ្ណៈផ្សេងទៀត មើលងាយជិះជាន់ជាទីបំផុត។ តើនេះ អាចជាក្តីសង្ឃឹមថ្មី សម្រាប់ប្រជាជនដាលីត ដែរឬទេ?
ប្រព័ន្ធបោះឆ្នោតដ៏ស្មុគស្មាញ
លោកប្រាណាប់ មុឃែរជី ប្រធានាធិបតីឥណ្ឌាបច្ចុប្បន្ន នឹងត្រូវចប់អាណត្តិនៅថ្ងៃទី២៤កក្កដាខាងមុខនេះ។ សមាជិកសភាឥណ្ឌាទាំងសភានៅតាមរដ្ឋ និងសភាសហព័ន្ធ ត្រូវប្រជុំគ្នាបោះឆ្នោតរើសប្រធានាធិបតីថ្មី មកកាន់តំណែងរយៈពេល៥ឆ្នាំទៅមុខ។ ការបោះឆ្នោតបានប្រព្រឹទ្ធិធ្វើទៅ កាលពីថ្ងៃទី១៧ កក្កដា ដែលលទ្ធផល នឹងប្រកាសឲ្យដឹង នៅរវាងថ្ងៃទី២០កក្កដា។
ការបោះឆ្នោតជ្រើសរើសប្រធានាធិបតីឥណ្ឌា មានភាពស្មុគស្មាញបន្តិច ដោយសារវាមិនមែនជាការបោះឆ្នោតដោយផ្ទាល់ ជាសកលពីប្រជាពលរដ្ឋឥណ្ឌាទេ។ គឺសមាជិកសភាឥណ្ឌា ដែលបានទទួលអាណត្តិដោយការបោះឆ្នោត ចំនួន៤៨៩៦នាក់ ទើបមានសិទ្ធិចូលរួមបោះឆ្នោតជ្រើសរើសប្រធានាធិបតី។ សូម្បីតែសមាជិកសភា ដែលបានទទួលអាណត្តិដោយការតែងតាំង ក៏មិនអាចបោះឆ្នោតបានដែរ។ សម្រាប់សម្លេងឆ្នោតមួយសន្លឹកៗ ក៏មានតម្លៃពិន្ទុ មិនដូចគ្នាដែរ។ ដូចជាសម្លេងឆ្នោតសមាជិកសភាសហព័ន្ធទាំងពីរអង្គ មួយសន្លឹងមានតម្លៃ៧០៨ពិន្ទុ។ រឺឯសន្លឹកឆ្នោតសមាជិកសភាតាមរដ្ឋវិញ គឺមានពិន្ទុខុសគ្នា អាស្រ័យលើចំនួនប្រជាជនតាមរដ្ឋរៀងៗខ្លួន។
បេក្ខជនពីររូប មកពីវណ្ណៈដាលីត
ខាងលើនេះជាលក្ខណៈពិសេស នៃប្រព័ន្ធបោះឆ្នោតឥណ្ឌា តែលក្ខណៈពិសេសសម្រាប់ការបោះឆ្នោតលើកនេះវិញ គឺមានបេក្ខជនពីររូប ដែលមានដើមកំណើត ពីសហគមន៍ជនជាតិដាលីត ឬជាក្រុមមនុស្ស ស្ថិតក្នុងវណ្ណៈដែលទាបជាងគេបំផុត ក្នុងសង្គមឥណ្ឌា។ បេក្ខជនទាំងពីរនោះ គឺលោក រ៉ាម ណាត កូវីន្ទ និង លោកស្រី មីរ៉ា គុមារ។
លោករ៉ាម ណាត កូវីន្ទ អាយុ៧១ឆ្នាំ តំណាងឲ្យសម្ព័ន្ធភាព គណបក្សប្រធាធិបតេយ្យជាតិ ដែលជាក្រុមគគណបក្សអភិរក្សនិយម ដឹកនាំដោយបក្សលោក នាយករដ្ឋមន្ត្រី ណារិន្ទ្រ ម៉ូឌី។ លោក គូវីន្ទ គឺជាកូនកសិករក្នុងវណ្ណៈដាលីត មានស្រុកកំណើតនៅតំបន់កានពួរ រដ្ឋឧត្តាប្រាដេស។ លោកបានរៀនសូត្រក្លាយជាមេធាវី ហើយបានសម្រេចចូលប្រឡូកក្នុងឆាកនយោបាយ ដោយបានជាប់ឆ្នោតជាសមាជិកព្រឹទ្ធសភាចំនួន២ដង និងធ្លាប់ធ្វើជាអភិបាលរដ្ឋពិហារ នៅភាគខាងកើត ជាប់នឹងប្រទេសណេប៉ាល់។
ចំណែកលោកស្រី មីរ៉ា គុមារ វិញ មានអាយុ៧២ឆ្នាំ ជាបេក្ខជនបញ្ជូនមក ដោយសម្ព័ន្ធភាពកំណែទម្រង់និយម។ លោកស្រី ក៏ជាអ្នកច្បាប់ ហើយធ្លាប់ធ្វើជាមន្ត្រីការទូតអស់រយៈពេល១៥ឆ្នាំ មុននឹងក្លាយជាប្រធានសភាជាន់ទាបឥណ្ឌា។ លោកស្រី ក៏ធ្លាប់ធ្វើជាសមាជិកសភា និងជារដ្ឋមន្ត្រីជាច្រើនដង។ ឪពុកលោកស្រី គឺជាសកម្មជននយោបាយឥណ្ឌាមួយរូប ដែលបានតស៊ូ ការពារសិទ្ធិប្រជាជនឥណ្ឌាវណ្ណៈដាលីត។
បើតាមការប៉ាន់ស្មាន គឺលោក រ៉ាម ណាត គូវីន្ទ ដែលគេរំពឹងថា នឹងបានជោគជ័យ ក្លាយជាប្រធានាធិបតីថ្មីរបស់ឥណ្ឌា។ លោក ណារិន្ទ្រ ម៉ូឌី បានសរសេរគាំទ្របេក្ខភាពលោក គូវីន្ទ នៅលើទំព័រTwitter ថា លោក រ៉ាម ណាត គូវីន្ទ គឺជាឥស្សរៈជននយោបាយឥណ្ឌាមួយរូប ដែលបានតស៊ូ បូជាកម្លាំងកាយចិត្ត ដើម្បីប្រយោជន៍សាធារណៈ និងដើម្បីបុព្វហេតុ ជួយប្រជាជនឥណ្ឌាក្រីក្រ និងប្រជាជនដែលត្រូវសង្គមមិនយកចិត្តទុកដាក់។
ប្រជាជនវណ្ណៈដាលីត រងការជិះជាន់ខ្លាំងបំផុត
ជាការពិតណាស់ ទោះបេក្ខជនណា នឹងឈ្នះក៏ដោយចុះ តែអ្វីដែលសំខាន់ គឺឥណ្ឌា នឹងអាចមានប្រធានាធិបតី ដែលជាមនុស្សមកពីវណ្ណៈដាលីត។ សង្គមឥណ្ឌា ដែលគោរពប្រពៃណីសាសនាហិណ្ឌូយ៉ាងតឹងតែងនោះ គឺជាសង្គមដែលអយុត្តិធម៌បំផុតលើលោក។ ប្រជាជនឥណ្ឌា ត្រូវបែងចែកជាប្រាំវណ្ណៈ ទៅតាមលំដាប់ គឺទី១ វណ្ណៈព្រាហ្ម ទី២ វណ្ណៈក្សត្រ ទី៣ វណ្ណៈវៃស្យ ឬវណ្ណៈកណ្តាល ទី៤ វណ្ណសូទ្រ ដែលជាវណ្ណៈទាសករ ហើយចុងក្រោយបង្អស់ គឺក្រុមមនុស្សក្រៅវណ្ណៈ ឬគ្មានវណ្ណៈ ដែលជាទូទៅ គេហៅថាពួកមនុស្សដាលីតនេះឯង។
ប្រជាជនវណ្ណៈដាលីត គឺជាប្រជាជនដែលក្រីក្រលំបាកបំផុត។ បើទោះបី ជាភាពស្មើភាពគ្នា ត្រូវបានចែងការពារក្នុង រដ្ឋធម្មនុញ្ញឥណ្ឌា ក៏ដោយ តែការពិតជាក់ស្តែង ពួកដាលីត តែងតែត្រូវបានវណ្ណៈផ្សេងៗ មើលងាយ រើសអើង និងជិះជាន់ ក្នុងជីវភាពប្រចាំថ្ងៃ។ ឧទាហរណ៍ អ្នកភូមិដាលីត មិនត្រូវគេអនុញ្ញាតឲ្យប្រើទឹកអណ្តូង ជាមួយអ្នកភូមិវណ្ណៈផ្សេងឡើយ។ ពួកដាលីត ត្រូវគេអនុញ្ញាតឲ្យធ្វើការងារណា ដែលលំបាក និងអន់ថយបំផុត ដូចជាការងារបោសជូត កើបលាមក របស់អ្នកវណ្ណៈផ្សេងជាដើម។ ពួកដាលីត គ្មានសិទ្ធិមានដីធ្វើស្រែចំការទេ។ យ៉ាងណាមិញ ករណីរំលោភនិងសម្លាប់ លើស្ត្រីវណ្ណៈដាលីត ពីសំណាក់មនុស្សមនុស្សប្រុសវណ្ណៈ ផ្សេងទៀត តែងតែកើតមានឡើងជាញឹកញាប់ ដោយពុំមានការឈឺឆ្អាល រកយុត្តិធម៌ ពីសំណាក់អាជ្ញាធរឥណ្ឌាឡើយ។
តំណែងប្រធានាធិបតីឥណ្ឌា គ្រាន់តែជានិម្មិតរូបតែប៉ុណ្ណោះ។ អំណាចដឹកនាំប្រទេសទាំងស្រុង គឺស្ថិតក្នុងដៃនាយករដ្ឋមន្ត្រី។ លោក ណារិន្ទ្រ ម៉ូឌី ត្រូវបានគេមើលឃើញថា បានគាំទ្រ និងបញ្ជូនបេក្ខជន លោក កូវីន្ទ ដែលជាមនុស្សវណ្ណៈដាលីត គឺដោយសារហេតុផលនយោបាយច្រើនជាង។ ប្រជាជនវណ្ណៈដាលីត ដែលមានប្រមាណជា២០០លាននាក់ តំណាងឲ្យសម្លេងឆ្នោតប្រមាណ១៦% សម្រាប់ការបោះឆ្នោតសភាឥណ្ឌា។ តាមរយៈការបញ្ជូនបេក្ខជនប្រធានាធិបតីវណ្ណៈដាលីត លោកណារិន្ទ្រ ម៉ូឌី សង្ឃឹមថា នឹងបានសម្លេងឆ្នោតគាំទ្រ ពីសំណាក់ប្រជាជនដាលីត នៅក្នុងឱកាសបោះឆ្នោតសភាក្នុងឆ្នាំ២០១៩ខាងមុខ ព្រោះលោកមិនអាចរំពឹងលើ សម្លេងឆ្នោត របស់ប្រជាជនឥណ្ឌា អ្នកកាន់សាសនាអ៊ីស្លាមទេ។
កំណែទម្រង់ចាំបាច់ ដើម្បីកសាងយុត្តិធម៌សង្គម
តើការដែលឥណ្ឌា មានប្រធានាធិបតី ជាមនុស្សមកពីវណ្ណៈដាលីត អាចនឹងជួយសំរួល ការលំបាកខ្លះដល់ប្រជាជនដាលីតដែលឬទេ? ឥណ្ឌា ធ្លាប់មានប្រធានាធិបតីវណ្ណៈដាលីត ម្តងរួចមកហើយ រវាងឆ្នាំ១៩៩៧ ដល់ឆ្នាំ២០០២ គឺលោក កូចឺរីល រ៉ាម៉ាន់ ណារ៉ាយាណាន់។ លោក នាយករដ្ឋមន្ត្រី ណារិន្ទ្រ ម៉ូឌី ក៏បានប្រកាសខ្លួនឯង ថាគាត់ក៏មកពីវណ្ណៈដាលីតដែរ។
ជាការពិត ស្ថានភាពជីវភាព និងការគោរពសិទ្ធិប្រជាជនវណ្ណៈដាលីត បានប្រសើរឡើងច្រើន បើប្រៀបធៀបទៅនឹង៥០ឆ្នាំមុន។ តែយ៉ាងណា ប្រជាជនវណ្ណៈដាលីត នៅតែស្ថិតក្នុងការរើសអើង និងភាពអយុត្តិធម៌ ដដែល។ សង្គមដែលកាន់ប្រពៃណីតាមបែបសាសនាហិណ្ឌូ ដ៏ងប់ងល់ដូចឥណ្ឌា មិនអាចផ្លាស់ប្តូរមួយថ្ងៃភ្លាម បានទេ។ បើទោះបីជាមានការធានាដោយច្បាប់ តែការអនុវត្តជាក់ស្តែង នៅឆ្ងាយពីការសង្ឃឹមទុក។
គេមិនរំពឹង ថាឥណ្ឌា នឹងលប់ចោលប្រព័ន្ធសង្គម បែងចែកវណ្ណៈនោះទេ តែគេសង្ឃឹមថា រដ្ឋាភិបាលឥណ្ឌា នឹងយកចិត្តទុកដាក់ ការពារប្រជាជនខ្លួនឲ្យមានដូចៗគ្នា។ ឥណ្ឌា ដែលខឹតខំតាំងខ្លួន ជាប្រទេសមហាអំណាច ក្នុងតំបន់អាស៊ី នោះ ត្រូវតែចាប់ផ្តើមកសាងមុខមាត់ខ្លួន ឲ្យបានស្អាតផូរផង់ តាមរយៈការធ្វើកំណែទម្រង់សង្គម ផ្តល់សិទ្ធិ ការពារប្រជាជនខ្លួន ឲ្យបានស្មើភាពគ្នា ដែលនេះ គឺជាគោលការណ៍គ្រិះ នៃការគោរពសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ