សហរដ្ឋអាមេរិកទទួលស្គាល់ពីកំណើនឥទ្ធិពលឡើងវិញរបស់អង្គការរដ្ឋអ៊ីស្លាមនៅស៊ីរី និងអ៊ីរ៉ាក់
ប្រមុខការទូតអាមេរិកលោកម៉ៃ ប៉ុមប៉េអូបានទទួលស្គាល់នៅថ្ងៃអង្គារ ទី២០ សីហាថា ក្រុមជីហាតអង្គការរដ្ឋអ៊ីស្លាមស្ថិតក្នុងតំបន់មួយចំនួននៅអ៊ីរ៉ាក់ និងស៊ីរីសព្វថ្ងៃហាក់កំពុងខ្លាំងជាងកាលពី ២ ឬ៣ឆ្នាំមុនទៅទៀត។ ចំណាប់អារម្មណ៍ដូចគ្នានេះក៏មានពីប្រេសិតពិសេសចិនទទួលបន្ទុកសំណុំរឿងស៊ីរីលោកស៊ី សៀវយ៉ានពីទីក្រុងហ្សឺណែវ ប្រទេសស្វ៊ីស។ តាមលោកសៀវយ៉ាន អង្គការភេរវនិយមដែលមានអង្គការរដ្ឋអ៊ីស្លាមមួយដែរកំពុងភ្ញាក់ដឹងខ្លួនឡើងវិញនៅស៊ីរីដែលបានធ្លាក់ក្នុងសង្គ្រាមហែកហួរតាំងពី ៨ឆ្នាំ។ ប្រេសិតពិសេសចិនរូបនេះដដែលបានអំពាវនាវដល់សហគមន៍អន្តរជាតិកុំឲ្យព្រងើយកន្តើយចំពោះរឿងនេះឲ្យសោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ការថ្លែងរបស់ប្រមុខការទូតអាមេរិកលោកម៉ៃ ប៉ុមប៉េអូបានធ្វើឡើងនៅលើកាណាល់ទូរទស្សន៍អាមេរិកាំង CBS ដោយបញ្ជាក់ថា ទោះបីជាអង្គការរដ្ឋអ៊ីស្លាមបានបាត់បង់ទឹកដីសឹងតែស្រុងដែលពួកគេបានក្រសោបមួយភាគនៅស៊ីរី និងមួយភាគនៅអ៊ីរ៉ាក់ចាប់ពីឆ្នាំ ២០១៤ ក៏ដោយ ក៏ក្រុមជីហាតរបស់អង្គការភេរវនិយមមួយនេះកំពុងបន្តមានសមត្ថភាព និងមានសកម្មភាពវាយប្រហារខ្លាំងនៅអ៊ីរ៉ាក់ និងស៊ីរី។ តាមលោកប៉ុមប៉េអូ នៅមានតំបន់ខ្លះក្នុងទឹកដីស៊ីរី និងអ៊ីរ៉ាក់ដែលពួកជីហាតអង្គការរដ្ឋអ៊ីស្លាមសព្វថ្ងៃហាក់កំពុងមានកម្លាំងខ្លាំងជាងកាលពី ២ ឬ៣ឆ្នាំមុនទៅទៀត។ ចំណែកក្រុមអ្នកជំនាញ និងក្រុមមន្រ្តីផ្លូវការជាច្រើនក៏បានយល់ឃើញដូចលោកប៉ុមប៉េអូដែរ។
តែស្របពេលគ្នានេះ ប្រមុខការទូតអាមេរិកក៏បានបញ្ជាក់ពីការធ្លាក់ចុះនៃការគំរាមកំហែង និងសមត្ថភាពវាយប្រហាររបស់ពួកជីហាតនៅបរទេស។ អ្វីជាការកត់សម្គាល់ ចំណាប់អារម្មណ៍របស់ប្រមុខការទូតអាមេរិកពេលនេះបានធ្វើឡើង បន្ទាប់ពីក្រសួងការពារអាមេរិកបានគូសបញ្ជាក់នៅក្នុងរបាយការណ៍របស់ខ្លួននាពេលថ្មីៗនេះថា អង្គការរដ្ឋអ៊ីស្លាមហាក់កម្រើកឡើងវិញនៅស៊ីរី បន្ទាប់ពីអាមេរិកបានដកទ័ពចេញមួយចំនួន។ គួររម្លឹកថានានិទាឃរដូវឆ្នាំ ២០១៨ កម្លាំងសម្ព័ន្ធមិត្តដឹកនាំដោយសហរដ្ឋអាមេរិកបានប្រកាសពីការបិទបញ្ចប់រចនាសម្ព័ន្ធរបស់អង្គការរដ្ឋអ៊ីស្លាមនៅស៊ីរី និងអ៊ីរ៉ាក់។ បន្ទាប់មកនៅដំណាច់ឆ្នាំ ២០១៨ ប្រធានាធិបតីសហរដ្ឋអាមេរិកលោកដូណាល់ត្រាំបានសម្រេចដកទ័ពអាមេរិកាំងមួយភាគធំចេញពីស៊ីរីដោយលើកឡើងពីបរាជ័យរបស់អង្គការរដ្ឋអ៊ីស្លាម។
ក្រៅពីសហរដ្ឋអាមេរិក កំណត់សម្គាល់ស្តីពីការស្ទុះឡើងវិញនូវឥទ្ធិពលរបស់ក្រុមអង្គការភេរវនិយមនៅស៊ីរីក៏មានពីលោកស៊ី សៀវយ៉ាន ប្រេសិតពិសេសចិនទទួលបន្ទុកសំណុំរឿងស៊ីរីដែរ។ បន្ទាប់ពីបានជួបសន្ទនាជាមួយប្រេសិតពិសេសអង្គការសហប្រជាជាតិទទួលបន្ទុកសំណុំរឿងស៊ីរីលោក Geir O. Pedersen ក្នុងទីក្រុងហ្សឺណែវ ប្រទេសស្វ៊ីសនាថ្ងៃអង្គារ ទី២០ សីហា លោកសៀវយ៉ានបានព្រមានពីការភ្ញាក់ខ្លួនឡើងវិញរបស់ក្រុមអង្គការភេរវនិយមនៅស៊ីរី និងបានអំពាវនាវដល់សហគមន៍អន្តរជាតិកុំឲ្យមើលស្រាលចំពោះរឿងនេះឲ្យសោះ។ ចំណែកលោក Geir O. Pedersen បានឆ្លៀតចាប់អារម្មណ៍លើគម្រោងវាយប្រហារលើទីក្រុងអ៊ីដលិបរបស់ប្រធានាធិបតីស៊ីរីលោកអាសាដ។
លោក Pedersen ព្រមានថា គម្រោងវាយប្រហារទៅលើទីតាំងចុងក្រោយរបស់អង្គការរដ្ឋអ៊ីស្លាមមួយនេះអាចនឹងបង្កឲ្យមានមហន្តរាយមនុស្សធម៌ចំពោះពលរដ្ឋប្រមាណជា ៣លាននាក់ដែលកំពុងរស់នៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ