ប្រធានាធិបតីគុយបា ៖ ថ្នាក់ដឹកនាំប្រទេសមានអាយុចាស់ជ្រុល
អនាគតថ្នាក់ដឹកនាំជាន់ខ្ពស់បក្សកុម្មុយនីស្តគុយបា ត្រូវតែចេញទៅនិវត្តន៍ នៅអាយុ៧០ឆ្នាំ យ៉ាងយូរ។ ឥស្សរជនចាស់ៗ ត្រូវដើរចេញ ដើម្បីទុកកន្លែងឱ្យក្មេងជំនាន់ក្រោយធ្វើការម្តង ! នេះជាសេចក្តីប្រកាសរបស់ប្រធានាធិបតីគុយបា លោក រ៉ាអ៊ូល កាស្ត្រូ ដែលរូបលោកផ្ទាល់មានអាយុ ៨៤ឆ្នាំទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្នុងចំណោមថ្នាក់ដឹកនាំគុយបា បច្ចុប្បន្ននេះ មានឥស្សរជនជាច្រើនរូបណាស់ ដែលមានអាយុលើស៧០ និង ៨០ឆ្នាំ។ ឥស្សរជនខ្លះ គឺជាសកម្មជនរបស់បក្សនិង បានចូលធ្វើបដិវត្ត នៅឆ្នាំ១៩៥៩ ដែលបានជំរុញឱ្យលោកហ្វីដែលកាស្ត្រូបានឡើងកាន់តំណែងជាប្រមុខដឹកនាំគុយបា។
លោកហ្វីដែល កាស្ត្រូ អាយុ៩០ឆ្នាំ នៅខែសីហា ខាងមុខ បានដកខ្លួនចេញពីឆាកនយោបាយ នៅឆ្នាំ២០០៨ បន្ទាប់ពីមានបញ្ហាសុខភាពជាទម្ងន់។ លោក រ៉ាអ៊ូល កាស្ត្រូ បានបន្តតំណែងពីបង និងបានដាក់កំហិត កំណត់អាណត្តិជាប្រធានាធិបតីត្រឹម៥ឆ្នាំ និងអាចពន្យារបានត្រឹមពីរអាណត្តិសម្រាប់ប្រមុខដឹកនាំប្រទេសម្នាក់ៗ។
នៅថ្ងៃសៅរ៍ម្សិលមិញ លោក រ៉ាអ៊ូល កាស្ត្រូ បានប្រកាសកំណត់អាយុរបស់មន្ត្រីនៃគណៈកម្មការធិការកណ្តាលបក្ស ឱ្យធ្វើការត្រឹមអាយុ៦០ឆ្នាំ និងយ៉ាងយូរបំផុតត្រូវចូលនិវត្តន៍នៅអាយុ៧០ឆ្នាំ សម្រាប់តំណែងជាមេដឹកនាំនៅក្នុងបក្ស។
សេចក្តីប្រកាសរបស់ប្រធានាធិបតីគុយបា នៅក្នុងសុន្ទរកថារយៈពេលពីរម៉ោង នាឱកាសបើកសមាជបក្សកុម្មុយនិស្ត ត្រូវបានទទួលស្វាគមន៍ ដោយភាពស្ងប់ស្ងាត់ យ៉ាងចម្លែក ! ព្រោះគណៈប្រតិភូគុយបា ភាគច្រើនទំនងជាភ្ញាក់ផ្អើលនឹងសេចក្តីសម្រេចរបស់លោក រ៉ាអ៊ូល កាស្ត្រូ ដែលបានអះអាងបន្ថែមទៀតថា “ម្តេចស្ងាត់ល្អម្ល៉េះ ?! អ្នកគិតថាគ្មានតួនាទីនៅក្នុងចំណាត់ការប្រទេស អ្នកនឹងគ្មានអ្វីធ្វើឬ ?! លោករ៉ាអ៊ូលកាស្ត្រូចង់មានន័យថា ថ្នាក់ដឹកនាំចាស់ៗអាចនៅតែជាសកម្មជនបក្សនិងចំណាយពេលមើលចៅៗ។ វិធានការថ្មី កំណត់អាយុចូលនិវត្តន៍នេះ ក៏នឹងត្រូវអនុវត្តដូចគ្នានៅក្នុងស្ថាប័នរដ្ឋនិងជួររដ្ឋាភិបាល។
នៅថ្ងៃចន្ទស្អែក សមាជបក្សកុម្មុយនិស្តគុយបា ត្រូវបោះឆ្នោតជ្រើសរើសថ្នាក់ដឹកនាំថ្មី និងទំនងជាត្រូវបោះឆ្នោតរក្សាលោក រ៉ាអ៊ូល កាស្ត្រូ អាយុ៨៤ឆ្នាំ និងបុរសខ្លាំងទីពីររបស់បក្ស អាយុ៨៥ឆ្នាំឱ្យនៅដដែល។ ច្បាប់ថ្មីនេះទំនងជាមិនត្រូវបានអនុវត្តលើឥស្សរជនកំពូលទាំងពីរនេះទេ។ ប៉ុន្តែលោក រ៉ាអ៊ូលកាស្ត្រូបាន បញ្ជាក់ថា លោកនឹងបញ្ចប់តួនាទីជាប្រធានាធិបតី នៅឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ