ឧត្តមសេនីយ៍ ប៊ួរ៉ាន បុរសខ្លាំងថ្មីរបស់ស៊ូដង់ ជានរណា ?
លើកបម្រាមគោចរ -ដោះលែងបាតុករដែលអាជ្ញាធរបានចាប់ខ្លួនកាលពីសប្តាហ៍មុន -អ្នកដែលបានធ្វើបាតុករស្លាប់នឹងត្រូវទទួលទោសទៅតាមផ្លូវតុលាការ - បក្សពួករបស់អតីតប្រធានាធិបតីផ្តាច់ការនឹងត្រូវគាស់កាយកម្ចាត់ឱ្យដល់ឬសគល់ -យោធានឹងប្រគល់អំណាចជូនពលរដ្ឋវិញ យ៉ាងយូរបំផុតនៅពីរឆ្នាំទៀត... នេះជាពាក្យសន្យារបស់ លោកឧត្តមសេនីយ៍ អាប់ឌែល ហ្វាតាហាលប៊ួរ៉ាន Abdel Fattah al-Burhane ប្រធានក្រុមប្រឹក្សាយោធាថ្មី ដែលទើបចូលកាន់តំណែងនៅសៅរ៍ទី ១៣មេសា២០១៩នេះ។ ប្រធានក្រុមប្រឹក្សាយោធាចាស់ ដែលជាអតីតរដ្ឋមន្ត្រីក្រសួងការពារជាតិ និងជាមេដឹកនាំធ្វើរដ្ឋប្រហារ បានសុំលាលែងចេញពីតំណែង យ៉ាងទាន់ហន់គួរភ្ញាក់ផ្អើល និងបានប្រគល់ភារកិច្ចដឹកនាំប្រទេសឱ្យលោក អាប់ឌែល ហ្វាតាហាលប៊ួរ៉ាន។ តើលោក អាប់ឌែល ហ្វាតាហាលប៊ួរ៉ាន ជានរណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ឧត្តមសេនីយ៍អាប់ឌែល ហ្វាតាហាលប៊ួរ៉ាន ជាមន្ត្រីក្នុងជួរយោធាទីពីរ ក្នុងរយៈពេលតែពីរថ្ងៃ ដែលឡើងមកដឹកនាំប្រទេស ឆ្លងអន្តរកាល។ ឈ្មោះរបស់លោក ទើបត្រូវបានគេឮនិយាយ កាលពីខែកុម្ភៈកន្លងមកនេះតែប៉ុណ្ណោះ នៅពេលដែលរដ្ឋាភិបាលរបស់លោក អូមា អេលបាស្ហៀរ បានតែងតាំងលោក ជាមេអធិការ (មនុស្សសំខាន់ទីបីក្នុងជួរយោធា)។ ពីមុនមកគ្មាននរណាស្គាល់លោក អាប់ឌែល ហ្វាតាហាលប៊ួរ៉ាន ឡើយ។
គ្មានពណ៌សម្បុរនិងបក្សនយោបាយ លោក អាប់ឌែល ហ្វាតាហាលប៊ួរ៉ាន់ មិនមែនជាសកម្មជនរបស់បក្សកាន់អំណាច។ កើតនៅឆ្នាំ១៩៦០ បានទទួលការសិក្សានៅសាលាយោធាស៊ូដង់ អេហ្ស៊ីប និងហ្សកដានី លោកប៊ួរ៉ាន កាន់តួនាទីសំខាន់ក្នុងវិស័យយោធាមែន ប៉ុន្តែលោកមិនត្រូវបានគេចាត់ទុកជាសរសរទ្រូងនៃរបបដឹកនាំប្រទេស ដូចលោក ឧត្តមសេនីយ៍ Ahmed Ibn Auf ដែលទើបលាលែងចេញពីតំណែងបន្ទាប់ពីបានឡើងកាន់អំណាចជាប្រមុខដឹកនាំប្រទេសមិនបាន២៤ម៉ោងនោះទេ។
ឈ្មោះរបស់លោក ប៊ួរ៉ាន ត្រូវបានគេស្នើតាំងពីដំបូង (កាលពីថ្ងៃព្រហស្បតិ៍ ថ្ងៃធ្វើរដ្ឋប្រហារទម្លាក់អតីតប្រធានាធិបតីអូមា អេលបាស្ហៀរ) ឱ្យធ្វើជាប្រធានក្រុមប្រឹក្សាយោធាដឹកនាំប្រទេសឆ្លងអន្តរកាល។ លោកត្រូវជាអ្នកអាចសេចក្តីថ្លែងការណ៍ទម្លាក់របបដឹកនាំបាស្ហៀរ ប៉ុន្តែបែរជាអត់ទៅវិញ ដោយសារតែមានភាពប្រេះឆាក្នុងជួរថ្នាក់ដឹកនាំក្រុមប្រឹក្សាយោធា។
ជាឧត្តមសេនីយ៍មែន ប៉ុន្តែបុគ្គលិកលក្ខណៈរបស់លោក អាប់ឌែល ហ្វាតាហាលប៊ួរ៉ាន ទទួលការគោរពច្រើន។ ក្រុមបក្សប្រឆាំង ចាត់ទុកលោក ប៊ួរ៉ាន ជាមនុស្សដែលអាចនាំនូវការប្តូរផ្លាស់ដល់ប្រទេស។ លោក បានចុះកៀកនិងចូលរួមជាមួយបាតុករផង កាលពីថ្ងៃសុក្រ។ លោកបានទទួលការគោរពនិងមានទំនាក់ទំនងល្អជាគ្រប់បក្សនយោបាយ។ លោកក៏មានប្រជាប្រិយភាព និងការគោរពកោតក្រែងក្នុងរង្វង់អ្នកយោធាដូចគ្នាទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ