ម៉ូស្គូ និង វ៉ាស៊ីនតោន ព្រមព្រៀងគ្នាកោះប្រជុំ "សន្និសីទអន្តរជាតិថ្មី” ស្តីអំពីស៊ីរី
ការព្រមព្រៀងគ្នានេះ ត្រូវបានប្រកាសឡើងដោយ លោកប្រមុខការទូតរុស្ស៊ី Serguei Lavrov និងសមភាគីអាមេរិកាំង លោក John Kerry ជាលទ្ធផលនៃកិច្ចចរចាទ្វេភាគី ដែលបានចប់ទៅ នាកណ្តាលអធ្រាត្រយប់មិញ នៅក្រុងម៉ូស្គូ ជុំវិញស្ថានការណ៍ក្តៅគគុក ក្នុងប្រទេសស៊ីរី។
ចុះផ្សាយនៅថ្ងៃ៖
ស្តាប់ - ០២:១៧
ដោយថ្លែងក្នុងសន្និសីទកាសែត បន្ទាប់ពីកិច្ចចរចានោះ ទាំងលោក John Kerry ទាំង លោក Serguei Lavrov សុទ្ធតែគូសបញ្ជាក់ដូចគ្នាថា គោលដៅនៃសំណើកោះប្រជុំសន្និសីទអន្តរជាតិថ្មី គឺដើម្បីប្រោះឲ្យរស់ឡើងវិញ ផែនការដែលត្រូវបានអនុម័ត កាលពីថ្ងៃទី៣០មិថុនា ឆ្នាំមុន ដោយសហគមន៍អន្តរជាតិ នៅក្រុងហ្ស៊ឺណែវ ខាងរកដំណោះស្រាយដោយសន្តិវិធីឲ្យសង្គ្រាមស៊ីវិលនៅស៊ីរី។
ជាការកត់សម្គាល់ ផែនការនោះឯង ដែលប្រមើលបង្កើតឡើងនៅស៊ីរី ជារដ្ឋាភិបាលអន្តរកាល ស្រាប់តែស្ថិតនៅងាប់ស្តូក ដោយវាមិនបានដោះស្រាយឡើយ បញ្ហាទាក់ទងនឹងវាសនា លោកប្រធានាធិបតី Bachar al-Assad។
តាមលោកប្រមុខការទូតអាមេរិកាំង John Kerry ដែលថ្លែងការពារសំណើរួមរុស្ស៊ីអាមេរិកនោះ បើមិនដោះស្រាយតាមផ្លូវនយោបាយទេ នោះស្ថានការណ៍នៅស៊ីរី អាចតែធ្លាក់ក្នុងអំពើហិង្សា កាន់តែខ្លាំងទៅទៀត ហើយច្រានប្រទេសនេះ ឲ្យខិតកាន់តែទៅជិត មាត់ជ្រោះជ្រៅនៃមហន្តរាយ រហូតដល់បំបែកបំបាក់ដែនដីស៊ីរី ឲ្យដាច់ដោចទៅ។
ម៉្លោះហើយបានជា លោករដ្ឋមន្ត្រីការបរទេសរុស្ស៊ី Serguei Lavrov បានបន្ថែមថា ៖
- ភាគីរុស្ស៊ី និង អាមេរិក ដោយបំផុសមកជាសំណើខាងលើ គឺបញ្ជាក់ពីភក្តីភាពរបស់ខ្លួន ចំពោះអធិបតេយ្យ និង បូរណភាពដែនដីប្រទេសស៊ីរី ក្នុងបរិបទនៃការបំពេញឲ្យបានទាំងស្រុង តាមកិច្ចព្រមព្រៀងក្រុងហ្ស៊ឺណែវនោះ។
- គូភាគី ចង្អុលឲ្យឃើញថា សន្និសីទអន្តរជាតិថ្មីស្តីអំពីស៊ីរី គឺជាការពង្រីកឲ្យបានផុសផុលទៅ សន្និសីទក្រុងហ្ស៊ឺណែវកាលពីមួយឆ្នាំមុន ដោយដើម្បីកោះប្រជុំវា ស.រ.អា. និង រុស្ស៊ី ឯកភាព គ្នាថា ចាំបាច់ត្រូវតែខំប្រឹងប្រែង ធ្វើយ៉ាងណា បញ្ចុះបញ្ចូល និង លើកទឹកចិត្ត ទាំង រដ្ឋាភិបាលស៊ីរី ទាំងក្រុមប្លែកៗនៃភាគីប្រឆាំងនៅស៊ីរី ឲ្យគេសុខចិត្ត ធ្វើដំណោះស្រាយតាមផ្លូវនយោបាយ ឲ្យអធិករណ៍ក្នុងប្រទេសគេទៅ។
- សន្និសីទអន្តរជាតិថ្មី តាមយោបល់រុស្ស៊ីនិងអាមេរិក គប្បីកោះប្រជុំឲ្យបានយ៉ាងឆាប់បំផុត យកល្អ គឺឲ្យបានមុនដំណាច់ខែឧសភានេះតែម្តង។
នៅមិនទាន់មានទេ ប្រតិកម្មយល់ព្រមចូលរួមក្នុងសន្និសីទថ្ងៃមុខ ទោះពីខាង រដ្ឋាភិបាល ក្រុងដាម៉ាស ដែលច្បាំងទល់នឹងពួកប្រឆាំង ក្រោមផ្លាកជា”ពួកភេរវជន” ទោះពីខាង ពួកប្រឆាំង ដែលច្បាំង ដើម្បីផ្តួលលោកប្រធានាធិបតី អាសាដ ក្តី ក្នុងសង្គ្រាមស៊ីវិល ឆាបឆេះជាង២ឆ្នាំ មកហើយ ដោយផ្តាច់ជីវិតបណ្តាជនអស់ ជាង៧ម៉ឺននាក់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ