ជម្លោះប្រដាប់អាវុធនៅស៊ូដង់៖ ជនសង្ស័យប្រព្រឹត្តឧក្រិដ្ឋកម្មប្រឆាំងមនុស្សជាតិនាំគ្នាហែកគុករត់
នៅស៊ូដង់ ជម្លោះប្រដាប់អាវុធដើម្បីអំណាចរវាងមេទ័ពធំទាំងពីរបានបន្តឈានចូលដល់ថ្ងៃទី ១៤ គិតត្រឹមថ្ងៃសុក្រទី ២៨ មេសា។ នៅថ្ងៃព្រហស្បតិ៍ នៅប៉ុន្មានម៉ោងមុន បទឈប់បាញ់ត្រូវចប់សុពលភាព មេដឹកនាំកងទ័ពជាតិបានប្រកាសបញ្ជូនអ្នកតំណាងទៅប្រទេសស៊ូដង់ខាងត្បូងដើម្បីចរចា ពន្យារបទឈប់បាញ់។ ទោះមានការប្រកាសបទឈប់បាញ់ដែលស្នើឡើងដោយអាមេរិក ប៉ុន្តែ ការប្រយុទ្ធគ្នា នៅតែបន្តមាន នៅរដ្ឋធានីខាទុំ។ នៅទីក្រុងដាហ្វួរភាគខាងលិចប្រទេស ជនសង្ស័យក្នុងសំណុំរឿងឧក្រិដ្ឋកម្មប្រឆាំងមនុស្សជាតិជាច្រើននាក់ បានឆ្លៀតប្រទេសកំពុងចលាចល ដើម្បីហែកគុករត់។ អង្គការសុខភាពពិភពលោកវិញព្រួយបារម្ភពីការលេចធ្លាយមេរោគ បន្ទាប់ពីមន្ទីរពិសោធន៍ជាតិស៊ូដង់ដែលមានទុកដាក់សំណាកមេរោគរបេង មេរោគកញ្ជ្រឹល និងមេរោគជំងឺអាសន្នរោគជាដើម បានធ្លាក់ក្នុងដៃកាន់កាប់របស់ក្រុមប្រដាប់អាវុធ។
ចុះផ្សាយនៅថ្ងៃ៖
សុខភាពពិភពលោក សំដែងក្តីបារម្ភពីការបែកសាយភាយមេរោគនៅប្រទេសស៊ូដង់ បន្ទាប់ពី មន្ទីរពិសោធន៍ជាតិធ្លាក់ក្រោមការគ្រប់គ្រងរបស់ក្រុមប្រដាប់អាវុធ។ នៅក្នុងសន្និសីទកាសែត នៅទីក្រុងហ្សឺណែវ ប្រធានអង្គការសុខភាពពិភពលោកមិនបានបញ្ជាក់ឈ្មោះក្រុមទាហានដែលចូលកាន់កាប់មន្ទីរពិសោធន៍ ប៉ុន្តែព្រមានថា មានសំណាកមេរោគជាច្រើន ដែលជាមេរោគឆ្លងរាតត្បាតខ្លាំង ដូចជាមេរោគកូវីដ មេរោគរបេង និងមេរោគជំងឺអាសន្នរោគ ដែលកំពុងរក្សាទុកក្នុងមន្ទីរពិសោធន៍នៅទីក្រុងខាទុំ។
មន្ទីរពិសោធន៍រក្សាទុកមេរោគធ្លាក់ក្នុងដៃរបស់ក្រុមប្រដាប់អាវុធ អាចបង្កបញ្ហាសុខភាព ដោយសារអាចមានការបែកលេចខ្ចាយមេរោគអាចរឿងមួយ។ ប៉ុន្តែ ស៊ូដង់កំពុងជួបបញ្ហាសុខភាព នៅចំពោះមុខ ព្រោះថា ប្រជាជនស៊ូដង់កំពុងខ្វះទឹក អត់អាហារ និងរងរបួស ដោយសារយន្តហោះទម្លាក់គ្រាប់ និងការប្រយុទ្ធគ្នារវាងកងទ័ពជាតិ និងកម្លាំងអាវុធហត្ថប្រតិបត្តិការរហ័ស។ តាមក្រសួងសុខាភិបាលស៊ូដង់ មានមនុស្សយ៉ាងតិច ៥១២នាក់ ស្លាប់នៅក្នុងប្រយុទ្ធគ្នារវាងក្រុមទាហានទាំងពីរក្រុម ចំណែកមនុស្សជាង ៤ពាន់នាក់រងរបួស។
ស្ថានភាពនៅទីក្រុងខាទុំកាន់តែធ្លាក់អាក្រក់។ ផ្ទះសម្បែង និងមន្ទីរពេទ្យចំនួន១៤ត្រូវបំផ្លាញដោយយន្តហោះទម្លាក់គ្រាប់បែករបស់កងទ័ពរដ្ឋាភិបាល។ ចំណែក អ្នកជំងឺនៅមន្ទីរពេទ្យចំនួន១៩ផ្សេងទៀត ត្រូវគេជម្លៀស ដើម្បីគេចចេញពីការប្រយុទ្ធគ្នារវាងកងទ័ព និងក្រុមអាវុធហត្ថ។
ឆ្លៀតពេលដែលប្រទេសកំពុងជួបចលាចល វឹកវ ដោយសារការប្រយុទ្ធដណ្តើមអំណាចគ្នារវាងភាគីកងទ័ពជាតិ និងក្រុមអាវុធហត្ថ អ្នកទោសជាច្រើនរយនាក់បាននាំគ្នាហែកគុករត់ ដែលនៅក្នុងនោះ មានផងដែរ ជនសង្ស័យដែលតុលាការព្រហ្មទណ្ឌអន្តរជាតិកំពុងតាមរកចាប់ខ្លួន នៅក្នុងរឿងប្រព្រឹត្តឧក្រិដ្ឋកម្មប្រឆាំងមនុស្សជាតិ នៅទីក្រុងដាហ្វួរ កាលពីឆ្នាំ ២០០៣។ ឆ្លើយតបនឹងក្តីបារម្ភរបស់អ្នកតំណាងអង្គការសហប្រជាជាតិ នៅប្រទេសស៊ូដង់ កងទ័ពជាតិស៊ូដង់បញ្ជាក់កាលពីថ្ងៃពុធថា អតីតមេដឹកនាំរបបផ្តាច់ការស៊ូដង់ លោកអូម៉ា អែល បាឆៀរដែលតុលាការព្រហ្មទណ្ឌកម្មអន្តរជាតិចង់ចាប់ខ្លួននៅក្នុងបទចោទប្រកាន់ឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ នៅដាហ្វួរ ត្រូវគេដឹកចេញពីពន្ធនាគារ ទៅព្យាបាលនៅមន្ទីរពេទ្យយោធា តាំងពីមុនផ្ទុះអាវុធ នៅស៊ូដង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ