រដ្ឋផ្លរីដា៖ ស្លាប់យ៉ាងហោច៣នាក់ ដោយអំពើបាញ់រះបែបរើសអើងពូជសាសន៍
កាលពីល្ងាចថ្ងៃសៅរ៍ ទី២៦សីហា អំពើបាញ់រះសម្លាប់មនុស្សមួយករណីទៀត បានកើតឡើងនៅសហរដ្ឋអាមេរិក ក្នុងទីក្រុង Jacksonville រដ្ឋផ្លរីដា។ ជនដៃដល់ភេទប្រុស អាយុជាង២០ឆ្នាំ ស្បែកស បានប្រើកាំភ្លើងបាញ់រះនៅក្នុងហាងលក់ទំនិញមួយ បណ្តាលឲ្យស្លាប់មនុស្ស៣នាក់ ដែលសុទ្ធតែជាជនជាតិអាមេរិកស្បែកខ្មៅ។ នៅក្នុងសន្និសីទកាសែត លោកអគ្គស្នងការនគរបាលប្រចាំតំបន់ បានអះអាងថា វាប្រាកដណាស់ ដែលអំពើបាញ់រះនេះមានចរិកលក្ខណៈបែបរើសអើងពូជសាសន៍ ស្អប់ខ្ពើមទៅលើជនស្បែកខ្មៅ។
ចុះផ្សាយនៅថ្ងៃ៖
ស្តាប់ - ០២:៤១
ជនដៃដល់ ដែលបានបាញ់សម្លាប់ខ្លួនឯង មុនពេលសមត្ថកិច្ចចាប់ខ្លួន ត្រូវគេដឹងថា បានសរសេរសារ និងលិខិតជាច្រើន ដែលបង្ហាញអំពីទឹកចិត្តស្អប់ខ្ពើមរបស់ខ្លួន ទៅលើជនស្បែកខ្មៅ។ នៅលើកាំភ្លើងពាក់កណ្តាលស្វ័យប្រវត្តិ AR-15 ដែលជននេះបានប្រើដើម្បីបាញ់រះ គឺមានគូសគំនូរសញ្ញាខ្វែង ដែលជានិម្មិតរូបនៃក្រុមស្តាំនិយមជ្រុលអ៊ីទ្លែណាហ្ស៊ី។
គួរបញ្ជាក់ថា មុននឹងចូលទៅក្នុងហាងលក់ទំនិញ Dollar General ដែលជាទីកើតហេតុ ជនដៃដល់ប៉ុនប៉ងចូលសកលវិទ្យាល័យ Edward Waters University ដែលជាសកលវិទ្យាល័យឯកជនដំបូងគេបង្អស់ ស្ថាបនាឡើង ដោយសហគមជនជាតិអាមេរិកស្បែកខ្មៅ។ ដោយគ្មានភារកិច្ច ជនដៃដល់ ត្រូវបានឆ្មាំសន្តិសុខ រារាំងមិនឲ្យចូលទៅក្នុងបរិវេនសកលវិទ្យាល័យ។
សមត្ថកិច្ចFBI បានបញ្ជាក់ថា គេនឹងបើកការស៊ើបអង្កេត អំពីករណីឃាតកម្ម បែបរើសអើងពូជសាសន៍ បង្កឡើងដោយជនដៃដល់ខាងលើ។ លោក Ron Desantis អភិបាលរដ្ឋផ្លរីដានិងជាបេក្ខជនប្រធានាធិបតីម្នាក់ នៃបក្សសាធារណរដ្ឋ បានលើកឡើងដោយបានចាត់ទុកជនដៃដល់ ជាជនថោកទាប និងកំសាកបំផុត ដែលបានធ្វើអំពើយង់ឃ្នងបាញ់សំលាប់មនុស្សដោយផ្អែកលើពណ៌សំបុរ តែបែរជាសម្លាប់ខ្លួនឯង មិនហ៊ានប្រឈមមុខនឹងការពិត។
គួររំលឹកថា ករណីឃាតកម្មដោយប្រើកាំភ្លើង និងករណីបាញ់រះ តែងកើតឡើងយ៉ាងញឹកញាប់បំផុត នៅសហរដ្ឋអាមេរិក ដោយសារតែច្បាប់បើកយ៉ាងធូររលុង ក្នុងការទិញលក់ ប្រើប្រាស់កាំភ្លើង។ នៅសហរដ្ឋអាមេរិក មនុស្សម្នាក់ក្នុងចំណោម៣នាក់ មានអាវុធយ៉ាងហោច១ដើម។ យ៉ាងណាមិញ នៅថ្ងៃសៅរ៍ទី២៦សីហាដែរ មានករណីបាញ់រះមួយ នៅក្នុងកម្មវិធីបុណ្យប្រពៃណីតំបន់សមុទ្រការីបៀន នៅទីក្រុងបូស្តុន ដែលបានបណ្តាលឲ្យរបួសមនុស្ស៧នាក់។ ហើយកាលពីថ្ងៃសុក្រ ស្ត្រី២នាក់ បានរងរបួសដោយគ្រាប់កាំភ្លើង នៅក្នុងពេលទៅមើលការប្រកួតកីឡាបេសបល នៅឈីកាហ្គោ។ ហើយនៅយប់ថ្ងៃសុក្រដដែល សិស្សសាលាអាយុ១៦ឆ្នាំម្នាក់ បានត្រូវគ្រាប់កាំភ្លើងស្លាប់ នៅក្នុងហេតុការណ៍ឈ្លោះប្រកែកគ្នាមួយ ក្រោយការប្រកួតបាល់បោះ នៅរដ្ឋអូក្លាហូម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ