អាមេរិកអនុញ្ញាតឲ្យហូឡង់និងដាណឺម៉ាកប្រគល់យន្តហោះចម្បាំងF-16 ទៅឲ្យអ៊ុយក្រែន
អាមេរិកបើកភ្លើងខៀវឲ្យហូឡង់ និងដាណឺម៉ាកបញ្ជូនយន្តហោះចម្បាំងដ៏ទំនើប F-16 ទៅឲ្យកងទ័ពអ៊ុយក្រែន។ តាមក្រសួងការបរទេសអាមេរិក រដ្ឋាភិបាលហូឡង់ និងដាណឺម៉ាកបានទទួលលិខិតធានាផ្លូវការរបស់អាមេរិក។ នៅថ្ងៃសុក្រទី១៨សីហា រដ្ឋមន្រ្តីការពារអ៊ុយក្រែនសរសេរសារស្វាគមការសម្រេចចិត្តរបស់រដ្ឋបាលលោកចូ បៃដិន ព្រោះថា អ៊ុយក្រែនទន្ទឹងចង់បានយន្តហោះចម្បាំងរបស់អាមេរិកជាយូរមកហើយ ដើម្បីយកទៅប្រើនៅក្នុងសមរភូមិប្រយុទ្ធតទល់នឹងកងទ័ពរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣០
ក្រសួងការបរទេសអាមេរិកបានអះអាងកាលពីថ្ងៃសុក្រថា រដ្ឋបាលលោកចូ បៃដិនបានបើកភ្លើងខៀវ អនុញ្ញាតឲ្យប្រទេសហូឡង់ និងដាណឺម៉ាកប្រគល់យន្តហោះចម្បាំង F-16ទៅឲ្យអ៊ុយក្រែន។ ដាណឺម៉ាក និងហូឡង់ដែលចង់ធ្វើទំនើបកម្មកងទ័ពរបស់ខ្លួនដោយសារសង្រ្គាមរុស្ស៊ីឈ្លានពានអ៊ុយក្រែន ធ្លាប់បង្ហាញចេតនាចង់ប្រគល់យន្តហោះចម្បាំង F-16មួយចំនួន ដែលខ្លួនទិញពីអាមេរិក ទៅឲ្យអ៊ុយក្រែន ប៉ុន្តែ ត្រង់រង់ចាំភ្លើងខៀវពីអាមេរិកដែលជាអ្នកផលិត។ អាមេរិកផ្ទាល់ដែលមានច្បាប់វិន័យតឹងរ៉ឹងក្នុងរឿងលក់ និងការផ្ទេរសព្វាវុធអាមេរិកពីសំណាក់ប្រទេសសម្ព័ន្ធមិត្តរបស់អាមេរិក ធ្លាប់រារែកមិនចង់ឲ្យមានយន្តហោះចម្បាំងរបស់ខ្លួនមានវត្តមាននៅក្នុងដែនអាកាសអ៊ុយក្រែន ដោយខ្លាចមានការប្រឈមមុខតានតឹងជាមួយរុស្ស៊ី។
នៅខែកក្កដា រដ្ឋមន្រ្តីការបរទេសរុស្ស៊ីធ្លាប់បានព្រមានរួចហើយថា ការបញ្ជូនយន្តហោះចម្បាំងអាមេរិកទៅឲ្យអ៊ុយក្រែនមានន័យស្មើនឹងការប្រកាសសង្រ្គាមនុយក្លេអ៊ែរពីក្រុមប្រទេសលោកខាងលិចដែលតម្រូវឲ្យរុស្ស៊ីត្រូវតែចាត់វិធានក្តៅតបតវិញ។
ការព្រមព្រៀងពីអាមេរិកដែលជាប្រទេសអ្នកផលិតយន្តហោះចម្បាំង F-16 ជាដំណឹងដ៏ល្អបំផុតសម្រាប់អ៊ុយក្រែន។ នៅ បណ្តាញសង្គម X រដ្ឋមន្រ្តីការពារជាតិអ៊ុយក្រែនសរសេរសារថ្លែងអំណរគុណសម្ព័ន្ធមិត្តអាមេរិក ហូឡង់ និងដាណឺម៉ាក។
គេនៅមិនទាន់ដឹងពីកាលវេលាដែលទាហានអ៊ុយក្រែនត្រូវទទួលយន្តហោះចម្បាំង F-16 ដើម្បីយកទៅប្រើក្នុងសមរភូមិប្រយុទ្ធតទល់កងទ័ពរុស្ស៊ី។ ប៉ុន្តែ អ្នកនាំពាក្យរបស់ក្រសួងការបរទេសអាមេរិកបានបញ្ជាក់ថា ការប្រគល់យន្តហោះអាមេរិកទៅឲ្យអ៊ុយក្រែនអាចធ្វើឡើង ដរាបណាកងទ័ពអ៊ុយក្រែនទទួលបានការបណ្តុះបណ្តាលគ្រប់គ្រាន់ជាមុនសិន និងត្រូវមានសមត្ថភាពបើកយន្តហោះ F-16។
រដ្ឋមន្រ្តីការពារជាតិហូឡង់ស្វាគមការអនុញ្ញាតរបស់អាមេរិកដែលនឹងបើកផ្លូវឲ្យមានការបណ្តុះបណ្តាលអ្នកបើកបរយន្តហោះអ៊ុយក្រែនជាផ្លូវការ ប៉ុន្តែ បញ្ជាក់ថា អ៊ុយក្រែនត្រូវការពេលវេលាយូរ ទម្រាំទទួលបានយន្តហោះចម្បាំងពីហូឡង់ ព្រោះថា ដើម្បីអាចបើកយន្តហោះចម្បាំងអាមេរិក គេត្រូវការពេលវេលារៀនយ៉ាងតិច ៦ខែ។
នៅខែកក្កដាកន្លងទៅ បក្សសម្ព័ន្ធចំនួន១១ប្រទេសដែលមានដូចជាអាមេរិក ហូឡង់ អង់គ្លេស ប៉ូឡូញ កាណាដា និងស៊ុយអែតជាដើមបានយល់ព្រមព្រៀង ថា នឹងទទួលបន្ទុកបង្រៀនកងទ័ពអ៊ុយក្រែនឲ្យចេះប្រើយន្តហោះចម្បាំងអាមេរិក F-16។
សម្រាប់អ្នកជំនាញ យន្តហោះចម្បាំងអាមេរិក F-16នឹងមិនធ្វើឲ្យមានការផ្លាស់ប្តូរច្រើន នៅក្នុងសង្រ្គាមអ៊ុយក្រែន នៅប៉ុន្មានខែខាងមុខ។ ដើម្បីឲ្យយន្តហោះចម្បាំងអាមេរិកអាចធ្វើប្រតិបត្តិការពេញលេញក្នុងសង្រ្គាមអ៊ុយក្រែន គេត្រូវការពេលវេលាពី ៤ ទៅ៥ឆ្នាំ។
ប៉ុន្តែ សម្រាប់កងទ័ពអ៊ុយក្រែន គេនៅតែត្រូវការយន្តហោះចម្បាំងទំនើបរបស់អាមេរិក មកជំនួសយន្តហោះចាស់ៗរបស់អ៊ុយក្រែន ផលិតនៅសម័យសហភាពសូវៀត ដូចជាMig29 និងSukoi។ ម្យ៉ាងអ៊ុយក្រែនទាមទារចង់បានយន្តហោះចម្បាំងអាមេរិក F-16ដើម្បីការពារប្រតិបត្តិការវាយប្រហារជើងគោក និងការពារដែនអាកាសរបស់អ៊ុយក្រែន ដែលកំពុងចាញ់ប្រៀប រងការបំផ្លាញធ្ងន់ធ្ងរដោយសារការវាយប្រហារផ្លូវអាកាសរបស់រុស្ស៊ី។
ជាយន្តហោះចម្បាំងដ៏ទំនើបដែលមានសមត្ថភាពបាញ់មីស៊ីល និងទម្លាក់គ្រាប់បែកចំគោលដៅ F-16 អាចបើកហោះក្នុងល្បឿនដ៏ល្បឿន ២៤០០គីឡូម៉ែត្រក្នុងមួយម៉ោង។ គេជឿថា យន្តហោះចម្បាំង F-16នឹងជួយឲ្យកងទ័ពអ៊ុយក្រែនអាចបើកការវាយប្រហារទៅលើកងទ័ពរុស្ស៊ី ទាំងនៅពេលយប់ និងនៅគ្រប់លក្ខខណ្ឌអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ