សហរដ្ឋអាមេរិក ៖ មានឃាតកម្មបាញ់រះក្នុងសង្កាត់អាស៊ីនាថ្ងៃចូលឆ្នាំចិន
មានស្លាប់យ៉ាងហោចណាស់ ១០នាក់ និងរបួសធ្ងន់-ស្រាលចំនួន១០នាក់ផ្សេងទៀត នៅក្នុងការបាញ់រះ នាយប់ថ្ងៃបុណ្យឆ្លងចូលឆ្នាំថ្មីឆ្នាំថោះជាប្រពៃណីចិន ក្នុងរង្គសាលមួយ ជិតក្រុងLos Angeles ដែលមានប្រជាជនភាគច្រើនមានដើមកំណើតអាស៊ី។ ខ្មាញ់កាំភ្លើងបានរត់គេចខ្លួនបាត់ និងមិនទាន់រកអត្តឃើញទេ គិតមកទល់ព្រឹកថ្ងៃអាទិត្យទី ២២មករានេះ។ ប៉ូលិស កំពុងបន្តស្វែងរកចាប់ខ្លួនជនដៃដល់ នៅក្រុងMonterey Park និងក្នុងតំបន់ភាគខាងត្បូងនៃរដ្ឋកាលីហ្វ័រញ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ហេតុការណ៍បាញ់រះបានកើតឡើងនៅវេលាម៉ោង១០និង២២នាទីយប់ថ្ងៃសៅរ៍ឆ្លងមកថ្ងៃអាទិត្យ ម៉ោងនៅកាលីហ្វ័រញ៉ាអាមេរិក ពេលដែលមនុស្សជាច្រើនពាន់នាក់កំពុងជួបប្រជុំគ្នាប្រារព្ធពិធីបុណ្យឆ្លងឆ្នាំថ្មីឆ្នាំថោះ។ បើតាមសំដីសាក្សីបីនាក់ដែលរត់គេចខ្លួនទៅពួននៅក្នុងរង្គសាលមួយទៀត ខ្មាញ់កាំភ្លើងមានអាវុធពាក់កណ្តាលស្វ័យប្រវត្តិ និងបង់គ្រាប់ជាច្រើន ដែលគេបានសាកបញ្ចូលជាច្រើនលើកច្រើនសា។
ក្រោយកើតហេតុភ្លាម ប៉ូលិសមិនបានផ្តល់ព័ត៌មានលម្អិតទាក់ទងនឹងភិនភាគរបស់ជនសង្ស័យទេ ហើយក៏មិនបញ្ជាក់អំពីប្រភេទអាវុធដែលខ្មាន់កាំភ្លើងប្រើដែរ។ កាពីទែន អែនឌ្រូ មេយ៉ឺ Meyer មេប៉ូលិសLos Angeles បានពន្យល់ប្រាប់អ្នកសារព័ត៌មានថា អ្នកអង្កេតនៅមិនទាន់ដឹងនៅឡើយ ថាតើខ្មាញ់កាំភ្លើងស្គាល់ជនរងគ្រោះ ឬជាទង្វើដៅលើសហគមន៍ ក្នុងន័យស្អប់ខ្ពើមប្រកាន់ពូជសាសន៍ទេ។
អ្នកអង្កេតក៏កំពុងស្វែងរកព័ត៌មានដើម្បីផ្ទៀងផ្ទាត់រកមូលហេតុនៃបាញ់រះថាមានពាក់ព័ន្ធនឹងការប៉ុនប៉ងធ្វើឃាតកម្មបាញ់រះមួយទៀត ក្នុងពេលទន្ទឹមគ្នា នៅក្នុងរង្គសាលមួយទៀត ដែលស្ថិតនៅជាប់ក្រុងMonterey Parkនេះដែរ។
Monterey Park ជាភូមិមួយមានប្រជាជនរស់នៅប្រមាណ៦១០០០នាក់ ភាគច្រើនមានដើមកំណើតអាស៊ី ហើយស្ថិតនៅចម្ងាយប្រមាណតែ១៣គីឡូម៉ែត្រពីក្រុងLos Angeles។
ឃាតកម្មបាញ់រះសម្លាប់មនុស្សដោយមូលហេតុស្អប់ខ្ពើម មិនមែនជាករណីកម្រទេ នៅសហរដ្ឋអាមេរិក។ បើតាមក្រសួងយុត្តិធម៌ បទឧក្រិដ្ឋដោយហេតុស្អប់ខ្ពើម មានជាង៧ពាន់ករណី ប៉ះពាល់ដល់មនុស្សជាង៩ពាន់នាក់នៅឆ្នាំ២០២១ ក្នុងនោះ២ភាគបីជាការរើសអើងប្រកាន់ពូជសាសន៍។ អាមេរិកក៏រងគ្រោះធ្ងន់ខ្លាំងដែរ ពីសិទ្ធិសេរីភាពនៃការប្រើប្រាស់អាវុធ។ មានកាំភ្លើងច្រើនជាចំនួនប្រជាជនសរុប អាមេរិករាប់ឃើញមានមនុស្សស្លាប់ដោយគ្រាប់កាំភ្លើងកាន់តែច្រើនឡើងៗ ៖ ប្រមាណ៤៩០០០នាក់នៅឆ្នាំ២០២១ ទល់នឹង៤៥០០០នាក់នៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ