អាមេរិក៖ បាញ់រះស្លាប់យ៉ាងហោច ១០នាក់ ភាគច្រើនសុទ្ធតែជាជនស្បែកខ្មៅ
នៅរដ្ឋញូយ៉ក សហរដ្ឋអាមេរិក មានករណីបាញ់រះមួយកាលពីថ្ងៃសៅរ៍ ទី១៤ឧសភា បង្កឡើងដោយខ្មានកាំភ្លើង អាយុ១៨ឆ្នាំ ជាជនស្បែកស។ យ៉ាងហោចណាស់មានមនុស្ស ១០នាក់បានស្លាប់ និងរបួស៣នាក់ ក្នុងនោះ១១នាក់គឺសុទ្ធតែជាជនជាតិអាមេរិកស្បែកខ្មៅ។ សមត្ថកិច្ចអាមេរិក បានសន្និដ្ឋានថា នេះគឺជាអំពើបាញ់រះសម្លាប់មនុស្ស ដែលមានលក្ខណៈរើសអើងប្រកាន់ពូជសាសន៍។
ចុះផ្សាយនៅថ្ងៃ៖
ស្តាប់ - ០២:០៤
ហេតុការណ៍បាញ់រះ បានកើតឡើងនៅទីតាំងផ្សារទំនើបមួយកន្លែង ឈ្មោះ Tops ស្ថិតក្នុងក្រុង Buffalo រដ្ឋញូយ៉ក ដែលសំបូរភាគច្រើន ជនជាតិអាមេរិកស្បែកខ្មៅរស់នៅ។ យោងតាមនាយនគរបាលក្រុង Buffalo ជនដៃដល់មានភេទប្រុស អាយុ១៨ឆ្នាំ ក្នុងសម្លៀកបំពាក់របៀបទាហាន បានកាន់កាំភ្លើងយន្ត បាញ់រះនៅទីលានចតរថយន្ត មុននឹងចូលទៅក្នុង បន្តបាញ់រះសម្លាប់មនុស្ស។
ជនដៃដល់ មានពាក់អាវការពារគ្រាប់កាំភ្លើង ហើយថែមទាំងមានពាក់កាម៉េរ៉ា ថតផ្សាយបន្តផ្ទាល់សកម្មភាពដ៏ព្រៃផ្សៃនេះ ថែមទៀតផង។ នៅពេលសមត្ថកិច្ចបានឡោមព័ទ្ធទីតាំងកើតហេតុ ជនដៃដល់បានលើកចុងកាំភ្លើងភ្ជង់កខ្លួនឯង ប្រុងនឹងសម្លាប់ខ្លួន មុននឹងប្តូរចិត្ត ព្រមប្រគល់ខ្លួនតាមសម្រួល។
លោក John Garcia មេបញ្ជាការនគរបាលតំបន់ Erié បានលើកឡើងថា អំពើបាញ់រះនេះ គឺជាអំពើឧក្រិដ្ឋ ដ៏សាហាវព្រៃផ្សៃ ដែលមានលក្ខណៈរើសអើងប្រកាន់ពូជសាសន៍។ តំណាងរដ្ឋអាជ្ញានៃក្រសួងយុត្តិធម៌អាមេរិក ប្រចាំតំបន់កើតហេតុ បានលើកឡើងថា ជនដៃដល់អាចនឹងត្រូវចោទប្រកាន់ ក្នុងក្របខណ្ឌច្បាប់សហព័ន្ធ ដែលអាចមានន័យថា ជនដៃដល់អាចទទួលទោសប្រហារជីវិត។
គួរបញ្ជាក់ថា ក្នុងពេលបាញ់រះ ជនដៃដល់បានផ្សាយផ្ទាល់រូបភាពវីដេអូ នៅលើបណ្តាញសង្គម Twitch។ ក្រោយពេលផ្សាយផ្ទាល់បាន២នាទី បណ្តាញ Twitch បានបិទការផ្សាយផ្ទាល់នេះចោល។ បណ្តាញសង្គមនេះ អះអាងទៀតថា គណនីរបស់ជនដៃដល់ត្រូវបានបិទព្យួរភ្លាមៗ ហើយគេនឹងបង្កើនការប្រុងប្រយ័ត្ន ចំពោះគណនីទាំងឡាយណា ដែលចូលរួមគាំទ្រអំពើហិង្សារើសអើងប្រកាន់ពូជសាសន៍។
ដោយឡែក កាសែត New York Times បានចុះផ្សាយ នូវអត្ថបទមួយសរសេរដោយជនដៃដល់ ដែលក្នុងខ្លឹមសារ គឺជនដៃដល់ចិត្តឆៅរូបនេះ បានទទួលឥទ្ធិពលនិងយកគម្រូតាម « ចលនាបរមានុភាពនៃពួកស្បែកស » ដែលបានធ្វើសកម្មភាពបាញ់រះកន្លងមក ជាក់ស្តែងការបាញ់រះនៅឆ្នាំ២០១៩ បណ្តាលឲ្យស្លាប់អ្នកកាន់សាសនាអ៊ីស្លាមចំនួន៥១នាក់ នៅក្រុង Christchurch ប្រទេសនូវែលសេឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ