លោក ចូបៃដិន ប្រកាសកម្ចាត់បានមេដឹកនាំអង្គការរដ្ឋអ៊ីស្លាមនៅស៊ីរី
“កងកម្លាំងអាមេរិកកម្ទេចមេដឹកនាំអង្គការរដ្ឋអ៊ីស្លាម បាននៅនឹងកន្លែងតែម្តង” ក្នុងប្រតិបត្តិការនៅភាគពាយ័ព្យប្រទេសស៊ីរី នៅម៉ោងទៀបភ្លឺថ្ងៃព្រហស្បតិ៍ទី ៣កុម្ភៈ។ នេះគឺជាសារបញ្ជាក់របស់លោកប្រធានាធិបតីអាមេរិក ចូ បៃដិន នៅថ្ងៃព្រហស្បតិ៍ដដែល ពីសេតវិមាន។
ចុះផ្សាយនៅថ្ងៃ៖
ស្តាប់ - ០២:១២
ជាមួយនឹងការប្រកាសបញ្ជាក់ព័ត៌មានប៉ុន្មានម៉ោងក្រោយប្រតិបត្តិការ លោកប្រធានាធិបតីអាមេរិកចូបៃដិន សន្យាថ្លែងសារទៅកាន់ប្រជាជាតិដើម្បីលម្អិតអំពីប្រតិបត្តិការកម្មង់ដូអាមេរិកនៅប្រទេសស៊ីរីនេះ។ មេដឹកនាំអង្គការរដ្ឋអ៊ីស្លា Abou Ibrahim al-Hachimi al-Qourachi បានស្លាប់ក្នុងបំផ្ទុះគ្រាប់បែកដែលគេបានចុចបំផ្ទុះដោយខ្លួនឯង។ មេភេរវជនបានចុចបំផ្ទុះគ្រាប់បែក ដែលធ្វើឱ្យសមាជិកក្រុមគ្រួសារផ្ទាល់របស់ភេរវជននោះស្លាប់ភ្លាម គឺមានទាំងក្មេងនិងស្រ្តី។ ចំណែកកងកម្មង់ដូអាមេរិកបានវិលត្រលប់ពីបេសកកម្មប្រកបដោយសុវត្ថិភាពទាំងអស់គ្នា។ នេះជាប្រសាសន៍របស់លោក ចូបៃដិន ពីសេតវិមាន ដោយគូសបញ្ជាក់បន្ថែមថាតុល្យការជនរងគ្រោះនឹងផ្តល់ជូននៅពេលក្រោយ។
ប៉ុន្តែបើតាម អង្គការសង្កេតការណ៍សិទ្ធិមនុស្សស៊ីរី OSDH ដែលមានបណ្តាញច្រើនក្នុងប្រទេសស៊ីរីវិញ ប្រតិបត្តិការរបស់កងកម្លាំងពិសេសអាមេរិក តាមចាប់មេដឹកនាំអង្គការរដ្ឋអ៊ីស្លាម ប្រភេទដ៏កម្រនេះ បានបង្កឱ្យមានស្លាប់មនុស្ស១៣នាក់ ក្នុងនោះបីនាក់ជាកុមារ និងម្នាក់ជាស្ត្រី។
នេះជាប្រតិបត្តិការទ្រង់ទ្រាយធំរបស់អាមេរិកទីមួយហើយគិតចាប់តាំងពីយោធាអាមេរិក សម្លាប់មេកើយអង្គការរដ្ឋអ៊ីស្លាមជីហាត Abou Bakr al-Baghdadi បានកាលពីខែតុលា២០១៩ មក។ Qourachi បានឡើងជាមេដឹកនាំអង្គការរដ្ឋអ៊ីស្លាមបន្តពី Baghadi និងក្លាយជាមេភេរវជនដែលសហរដ្ឋអាមេរិកតាមស្វែងរកបំផុត។ អាមេរិកបានថែមទាំងសន្យាផ្តល់រង្វាន់១០លានដុល្លារប្រសិនបើនរណាអាចជួយផ្តល់ព័ត៌មានឱ្យរកជននេះឃើញ។
ដូចជាមេដឹកនាំជីហាតអ៊ីស្លាមដទៃ Abou Ibrahim al-Hachimi al-Qourachi ឬ Amir Mohammed Saïd Abdel Rahman al-Mawla មានងារជាអេមៀ ហើយមានរហ័សនាមច្រើន និងថែមទាំងត្រូវបានក្រុមអង្គការរដ្ឋអ៊ីស្លាម ចាត់ទុកជា “សាស្ត្រាចារ្យ” ឬជា “មេបំផ្លាញ”ទៀតផង។ Qourachi ជាមេដឹកនាំធ្វើភេរវកម្មជាច្រើននៅតំបន់ដើមបូព៌ា និងនៅក្នុងបណ្តាប្រទេសលោកខាងលិច ព្រមទាំងជាមេប្រព្រឹត្តអំពើឃោរឃៅ និងរំលោភបំពានយ៉ង់ឃ្នងជាច្រើន។ ប៉ុន្តែគេទើបអាចកំណត់អត្តសញ្ញាណ ជាផ្លូវការបាន បន្ទាប់ភ្នាក់ងារសម្ងាត់អាមេរិកនិងអ៊ីរ៉ាក់ ចំណាយពេលស៊ើបអង្កេតអស់ជាច្រើនខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ