លោកចូ បៃដិន ចង់ធ្វើកំណែទម្រង់នីតិវិធីព្រឹទ្ធសភា ដើម្បីជំរុញការអនុម័តច្បាប់ការពារសិទ្ធិបោះឆ្នោត របស់ពលរដ្ឋអាមេរិកស្បែកខ្មៅ
កាលពីថ្ងៃអង្គារ ទី១១មករា លោកចូ បៃដិន បានទៅដល់ទីក្រុងអាត្លង់តា រដ្ឋហ្សកហ្ស៊ី ដែលជាដែនដីប្រវត្តិសាស្ត្រ នៃការតស៊ូរើសបំរះ ប្រឆាំងនឹងការរើសអើងប្រកាន់ពូជសាសន៍ ទៅលើជនស្បែកខ្មៅ។ លោកប្រធានាធិបតីប្រជាធិបតេយ្យរូបនេះ បានអំពាវនាវ ជំរុញឲ្យព្រឹទ្ធសភាអាមេរិក បោះឆ្នោតអនុម័តលើច្បាប់ថ្មីមួយ ដើម្បីការពារសិទ្ធិបោះឆ្នោតរបស់ពលរដ្ឋអាមេរិកទាំងអស់ ដោយមិនរើសអើងពណ៌សំបុរស្បែកស ឬស្បែកខ្មៅ។
ចុះផ្សាយនៅថ្ងៃ៖
សូមរំលឹកថា នៅក្រោយការបោះឆ្នោតប្រធានាធិបតីកន្លងទៅ ក្រុមលោកដូណាល់ ត្រាំ បានតវ៉ា បំផុសបំផុលថាមានការក្លែងបន្លំសន្លឹកឆ្នោត។ ប្រការនេះបានជំរុញឲ្យរដ្ឋមួយចំនួនធំនៅភាគខាងត្បូង ដែលស្ថិតក្នុងដៃបក្សសាធារណរដ្ឋ ជាក់ស្តែងរដ្ឋហ្សកហ្ស៊ីនេះតែម្តង បានសម្រេចធ្វើកំណែទម្រង់ច្បាប់បោះឆ្នោត ដែលគេអះអាងថាដើម្បីធានាការពារ កុំឲ្យមានការក្លែងបន្លំ។ តែសម្រាប់ក្រុមប្រជាធិបតេយ្យ ធាតុពិតកំណែទម្រង់ច្បាប់ថ្មីទាំងនោះ គឺបក្សសាធារណរដ្ឋមានចេតនារារាំងពលរដ្ឋអាមេរិកស្បែកខ្មៅ មិនឲ្យទៅបោះឆ្នោត ព្រោះថាជាទូទៅពលរដ្ឋអាមេរិកស្បែកខ្មៅ បោះឆ្នោតគាំទ្របក្សប្រជាធិបតេយ្យ។
ហេតុដូច្នេះហើយ បានជាលោក ចូ បៃដិន ចង់ឲ្យសភាខុនហ្ក្រេស អនុម័តច្បាប់កំពូលមួយ ដើម្បីការពារសិទ្ធិបោះឆ្នោតរបស់ពលរដ្ឋទាំងអស់ ឲ្យស្មើភាពគ្នា។ ក៏ប៉ុន្តែ សំណើរច្បាប់នេះ បានជាប់គាំងជាច្រើនខែមកហើយ នៅព្រឹទ្ធសភា ដោយសារតែមិនគ្រប់សំឡេង៦០ លើ១០០ ដើម្បីអាចលើកវា យកមកពិភាក្សា និងបោះឆ្នោតបាន។ ប្រឈមនឹងឧបសគ្គនេះ លោកចូ បៃដិន បានប្រកាសថា លោកនឹងប្តេជ្ញាធ្វើកំណែទម្រង់នីតិវិធីនៅព្រឹទ្ធសភា លប់ចោលលក្ខខណ្ឌ៦០លើ១០០នេះ ហើយងាកមកប្រើសំឡេងភាគច្រើនសាមញ្ញ ៥០+១ វិញ ដើម្បីកុំឲ្យក្រុមសមាជិកបក្សសាធារណៈរដ្ឋ អាចរារាំងការពិភាក្សា ឬការបោះឆ្នោតណាមួយនៅក្នុងព្រឹទ្ធសភាបានតទៅទៀត។
សម្រង់ប្រសាសន៍ លោក ចូ បៃដិន នៅទីក្រុងអាត្លង់តា ថ្ងៃទី១១មករា២០២២
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ