អ.ស.ប ស្នើឲ្យ​មានការ​ស៊ើបអង្កេត​ដោយឯករាជ្យ​អំពី​ការវាយប្រហារ​ទៅលើ​កប៉ាល់​ដឹកប្រេង​

ភ្លាមៗក្រោយមានការទាមទារពីសហរដ្ឋអាមេរិក លោកអាន់តូនីញ៉ូ ហ្គូទែរស៍ ក៏បានអំពាវនាវឲ្យមានការស៊ើបអង្កេតដោយឯករាជ្យ ដើម្បីស្វែងរកការពិត ថាតើនរណា ដែលជាអ្នកនៅពីក្រោយការវាយប្រហារ ទៅលើកប៉ាល់ដឹកប្រេងឲ្យពិតប្រាកដ។

លោកអគ្គលេខាធិការអង្គការអ.ស.ប បាននិយាយទៅកាន់ក្រុមអ្នកយកព័ត៌មាន នៅឯទីស្នាក់ការកណ្តាលរបស់អង្គការសហប្រជាជាតិនៅទីក្រុងញូវយ៉កថា វាពិតជាមានសារៈសំខាន់ខ្លាំងណាស់ ក្នុងការដឹងពីការពិត។ ហើយដើម្បីដឹងការពិតបាន លុះត្រាណាតែមានអង្គភាពឯករាជ្យមួយ ធ្វើការស៊ើបអង្កេត និងផ្ទៀងផ្ទាត់វិនិច្ឆ័យយ៉ាងសុក្រឹតជាទីបំផុត។

គួរគូសបញ្ជាក់ជូនថា ទោះបីជាប្រតិបត្តិការស៊ើបអង្កេតជាលក្ខណៈអន្តរជាតិ នៅមិនទាន់បានចាប់ផ្តើមប្រតិបត្តិការយ៉ាងណាក្តី ក៏សហរដ្ឋអាមេរិកបានទម្លាក់ការទទួលខុសត្រូវទាំងស្រុងទៅឲ្យប្រទេសអ៊ីរ៉ង់បាត់ទៅហើយ។

ជាក់ស្តែង កាលពីថ្ងៃសុក្រ ម្សិលមិញ ពោលក្រោយពីហេតុការណ៍វាយប្រហារមួយថ្ងៃ លោកប្រធានាធិបតីអាមេរិក ដូណាល់ ត្រាំ បានចេញចង្អុលចំមុខ អ៊ីរ៉ង់ ថាជាអ្នកនៅពីក្រោយរឿងនេះ។ លោកត្រាំ និយាយថា គេដឹងថានេះជាទង្វើរបស់អ៊ីរ៉ង់ ព្រោះគេឃើញមានឆ្មាំអ៊ីរ៉ង់ទៅយកគ្រាប់មីនមិនទាន់ផ្ទុះមួយគ្រាប់ នៅបាតកប៉ាល់រងគ្រោះមួយគ្រឿង។

អ៊ីរ៉ង់ ចេញមុខបដិសេធ ឯអាមេរិកនៅបន្តចោទប្រកាន់ ដូច្នោះហើយទំនាក់ទំនងរវាងប្រទេសទាំងពីរកាន់តែធ្លាក់ដុនដាបមួយកម្រិតទៀត។ តែទោះបី អ៊ីរ៉ង់ កំពុងប្រឈមមុខដាក់គ្នាជាមួយអាមេរិកខ្លាំងយ៉ាងនេះក្តី អ្នកវិភាគមួយចំនួន យល់ឃើញថា សង្គ្រាមដោយអាវុធ រវាងប្រទេសទាំងពីរទំនងជាមិនអាចកើតមានឡើងនោះទេ។ ជាពិសេស អ្នកវិភាគ បកស្រាយថា ទីក្រុងតេហរ៉ង់ ពិតជាគ្មានចេតនាណាមួយឡើយ ចង់ធ្វើសង្គ្រាមជាមួយទីក្រុងវ៉ាស៊ីនតោន។

គួរជម្រាបជូនថា ការពិត ស ខ្មៅ អ្នកណាខុស អ្នកណាត្រូវ នៅមិនទាន់ត្រូវបានគេរកឃើញនៅឡើយនោះទេ។ ដូច្នោះហើយ ការពិតជាយ៉ាងណានោះ គេមានតែរង់ចាំមើលលទ្ធផលដែលបានមកពី ការស៊ើបអង្កេតរបស់អង្គភាពអន្តរជាតិនិងឯករាជ្យ របស់អ.ស.ប តែប៉ុណ្ណោះ៕