អាមេរិកជំរុញការប្រើថាមពលព្រះអាទិត្យដើម្បីប្រឆាំងបម្រែបម្រួលអាកាសធាតុ
ចុះផ្សាយនៅថ្ងៃ៖
ស្តាប់ - ០៤:២៥
កាលពីចុងសប្តាហ៍កន្លងទៅនេះសេតវិមានបានចេញនូវសេចក្តីប្រកាសពត៌មានស្តីពីការអនុវត្តន៍សកម្មភាពនិងការប្តេជ្ញាចិត្តពីទូទាំងប្រទេសក្នុងការជំរុញការប្រើប្រាស់និងប្រសិទ្ធភាពនៃថាមពលដែលបានពីព្រះអាទិត្យ ក្នុងគោលដៅកាត់បន្ថយការបញ្ចេញឧស្ម័នកាបូនិកដើម្បីប្រយុទ្ធប្រឆាំងនឹងបម្រែបម្រួលអាកាសធាតុ។
ការជំរុញការប្រើប្រាស់ថាមពលដែលបានពីព្រះអាទិត្យនេះមិនមែនជារឿងថ្មីទេសំរាប់អាមេរិក ព្រោះចាប់តាំងពីលោកអូបាម៉ាចូលកាន់តំណែងនៅសេតវិមាន ការប្រើប្រាស់អគ្គិសនីដែលបានពីថាមពលព្រះអាទិត្យបានកើនឡើងជាង១០ដង។ ជាអាទិ៍ដោយគ្រាន់តែក្នុងឆ្នាំ២០១៣តែមួយឆ្នាំប៉ុណ្ណោះ តម្លៃឧបករណ៍ទាញយកថាមពលព្រះអាទិត្យសំរាប់គេហដ្ឋាន និងសំរាប់អាជីវកម្មបានធ្លាក់ថ្លៃជាង១២ភាគរយ ដែលជាកត្តានាំឲ្យមានប្រជាជនអាមេរិកបាននាំគ្នាដំឡើងឧបករណ៍នេះទាំង នៅតាមផ្ទះ និងតាមកន្លែងប្រកបអាជីវកម្មកាន់តែច្រើនឡើងៗ និងដែលនាំដល់ការទ្រទ្រង់លើការងារជាងមួយម៉ឺនការងារក្នុងផលិតកម្ម និងសេវាកម្មក្នុងវិស័យនេះនៅទូទាំងប្រទេស។ ជាក់ស្តែងនៅឆមាសទីមួយនៃឆ្នាំ២០១៤នេះគេសង្គេតឃើញមានគេហដ្ឋាន និងកន្លែងប្រកបអាជីវកម្មសរុបជាងកន្លះលានកន្លែងដែលបានដំឡើងប្រព័ន្ធថាមពលព្រះអាទិត្យនេះ។
យ៉ាងណាមិញកាលពីដើមឆ្នាំ២០១៤នេះក្នុងគោលនយោបាយប្រយុទ្ធប្រឆាំងនឹងបម្រែបម្រួលអាកាសធាតុ សេតវិមានក៏ធ្លាប់បានរៀបចំកិច្ចប្រជុំកំពូលស្តីពីថាមពលព្រះអាទិត្យរួចមកហើយ ដើម្បីប្រមូលផ្តុំការចូលរួមឲ្យកាន់តែច្រើនពីគ្រប់វិស័យ ដែលជាអ្នកនាំមុខគេខាងការប្រើប្រាស់ថាមពលព្រះអាទិត្យ និងដើម្បីអំពាវនាវឲ្យមានការប្តេជ្ញាចិត្តគាំទ្រលើការជំរុញ និងបង្កើនបន្ថែមលើការប្រើប្រាស់ថាមពលព្រះអាទិត្យ និងលើកស្ទួយការងារក្នុងវិស័យនេះ តាមរយៈការពង្រីកការប្រើប្រាស់ថាមពលព្រះអាទិត្យ នៅតាមផ្ទះអគារអាជីវកម្ម និងនៅតាមសាលារៀន។
ដូចនេះសេចក្តីប្រកាសពត៌មាន កាលពីថ្ងៃព្រហស្បត៍កន្លងទៅនេះជាការឆ្លុះបញ្ចាំងពីការរីកចម្រើននៃការគាំទ្ររបស់ទីក្រុងធំៗ និងក្រុមហ៊ុនអាជីវកម្មនានា លើការអនុវត្តន៍គោលនយោបាយនេះតាមការអំពាវនាវរបស់សេតវិមានកន្លងទៅ។ មកដល់ពេលនេះ ជាសរុប គឺមានការចូលរួមពីជាង៣៥០អង្គភាពសហគ្រាសគិតទាំងវិស័យឯកជននិងវិស័យសាធារណៈដែលត្រៀមនឹងដាក់ឲ្យប្រើប្រាស់នូវថាមពលបានពីព្រះអាទិត្យ ប្រមាណជាង៨៨៥ មេហ្កាវ៉ាត់ ដែលអាចបង្កើននូវប្រសិទ្ធភាពថាមពលសំរាប់អគារធំៗបានជាង១៣០លានម៉ែត្រការ៉េ។
បើផ្អែកតាមការប្តេជ្ញាចិត្ត និងការអនុវត្តន៍តាមគោលនោបាយនេះ គេអាចរំពឹងទុកថា នឹងអាចកាត់បន្ថយការបំពុលឧស្ម័នកាបូនិកដល់ទៅជាង៣០០លានតោន នៅឆ្នាំ២០៣០ ដែលស្មើនឹងការកាត់បន្ថយការបំពុលដោយ៦០លានរថយន្តបើកលើផ្លូវក្នុងមួយឆ្នាំ ហើយក៏នឹងអាចជួយបន្ធូរបន្ថយលើចំណាយក្នុងការប្រើអគ្គិសនីនៅតាមផ្ទះ និងក្រុមហ៊ុនអាជីវកម្មបានជាង១ម៉ឺនលានដុល្លាអាមេរិកផងដែរ។
ក្នងសេចក្តីប្រកាសពត៌មានដដែលនោះ សេតវិមានក៏បានប្រកាសនូវសកម្មភាពអនុវត្តន៍ដែលជាវិធានការថ្មីៗមួយចំនួនបន្ថែមទៀតដើម្បីបង្កើតការងារកាត់បន្ថយការបំពុលឧស្ម័នកាបូនិច និងការកែលម្អប្រសិទ្ធភាពថាមពលឲ្យកាន់តែប្រសើរឡើងថែមទៀត។
សកម្មភាពអនុវត្តន៍ថ្មីៗមានដូចជា៖ ការផ្តល់ឥណទាន និងជំនួយសម្រាប់ថាមពលកកើតឡើងវិញ និងការកែលម្អប្រសិទ្ធភាពថាមពល តាមរយៈក្រសួងកសិកម្មអាមេរិកដែលនឹងបណ្តាក់ទុនជាង ៦៨លានដុល្លា។ ឥណទាននិងជំនួយនេះនឹងផ្តល់ជូនតាមរយៈកម្មវិធីស្តីពីថាមពលតាមជនបទសំរាប់អាមេរិក (REAP) ដែលផ្តល់ជំនួយហិរញ្ញវត្ថុដល់កសិករ និងអាជីវកម្មខ្នាតតូចនៅតាមជនបទដើម្បីទិញ និងដំឡើងប្រព័ន្ធថាមពលកកើតឡើងវិញ និងធ្វើឱ្យប្រសើរឡើងនូវប្រសិទ្ធភាពថាមពល។ កម្មវិធីផ្សេងៗទៀតរបស់រដ្ឋសហព័ន្ធក៏ត្រូវបានដាក់ឲ្យអនុវត្តផងដែរ មានដូចជាការគាំទ្រលើថាមពលស្អាត(Clean Energy) និងមានប្រសិទ្ធភាពក្នុងតំលៃសមរម្យសំរាប់លំនៅឋាន។ល។
សហរដ្ឋអាមេរិករំពឹងទុកថា សកម្មភាពអនុវត្តន៍ដែលជាវិធានការថ្មីៗទាំងនេះនឹងរក្សា និងពង្រឹងដល់ភាពនាំមុខគេរបស់សហរដ្ឋអាមេរិកក្នុងការបង្កើតថ្មីលើការប្រើប្រាស់ថាមពលស្អាត និងការកាត់បន្ថយការខ្ជះខ្ជាយថាមពល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ