Josephine Baker ជានរណា បានជាបារាំងផ្តល់កិត្តិយសបញ្ចុះសពលោកស្រី ក្នុងវិមានPantheon ?
ចុះផ្សាយនៅថ្ងៃ៖
ស្តាប់ - ០៤:២៥
នៅថ្ងៃអង្គារទី ៣០ វិច្ឆិកា ២០២១នេះ លោកស្រី Josephine Baker ហ្សូហ្សេហ្វីន បេកឺរ បានក្លាយជាស្ត្រីទី៦ និងជាស្ត្រីស្បែកខ្មៅដំបូងគេបង្អស់ ដែលបារាំងបានសម្រេចបញ្ចុះសពនៅវិមានប៉ង់តេអុង Pantheon។ វិមានបញ្ចុះសពឥស្សរជននិងបញ្ញាវន្តដែលបានកសាងកេរ្តិ៍ឈ្មោះឱ្យប្រទេសបារាំង។ តើលោកស្រី Josephine Baker ជានរណា? បានបញ្ចេញស្នាដៃអ្វីខ្លះសម្រាប់បារាំង ទើបមានកិត្តិយសបានចារឈ្មោះ ក្នុងវិមានប៉ង់តេអុង ?
៤៦ឆ្នាំក្រោយមរណភាព សាកសពលោកស្រី Josephine Baker ដែលជាស្ត្រីស្បែកខ្មៅ ជាតារាសម្តែង ជាអ្នកចម្រៀង ជាជនជាតិបារាំងដើមកំណើតអាមេរិក ត្រូវបានយកមកបញ្ចុះនៅថ្ងៃទី ៣០វិច្ឆិកា២០២១ នៅវិមានប៉ង់តេអុង ដោយមានការចូលរួមពីឥស្សរជន អ្នកនយោបាយ យុវជន យ៉ាងអធិកអធម និងដោយមានការចាក់បទចម្រៀងរបស់លោកស្រី ដែលមានចំណងជើងថា "Me, Voila à Paris អូខ្ញុំមកដល់ប៉ារីសហើយ" កំដរផង។ លោកប្រធានាធិបតីបារាំង លោកអេម៉ាណុយអែល ម៉ាក្រុង បានអញ្ជើញមគោរពវិញ្ញាណក្ខន្ធ ដល់ព្រលឹងសិល្បការិនី ដែលមានឈ្មោះល្បីល្បាញលើពិភពលោក ដែលបានចូលប្រលូកយ៉ាងសកម្មក្នុងចលនាតស៊ូប្រឆាំងពួកណាហ្ស៊ី ប្រឆាំងនឹងការប្រកាន់ពូជសាសន៍ និងដែលប្រឹងប្រយុទ្ធតស៊ូប្រមូលផ្តុំពលរដ្ឋមានឆន្ទៈល្អ សម្រាប់បារាំងនិងពិភពលោកទាំងមូល។
មានឈ្មោះកំណើតថា Freda Josephine Mcdonald កើតនៅMissouri សហរដ្ឋអាមេរិក ក្នុងឆ្នាំ១៩០៦ លោកស្រី បេកឺរ ជាកូនស្រីរបស់គ្រួសារដ៏ក្រីក្រមួយ និងត្រូវបានឪពុកបោះបង់ចោលតាំងពីតូច។ បង្ខំចិត្តទៅស៊ីឈ្នួលបំរើគេតាមផ្ទះ តាំងពីអាយុ៧ឆ្នាំ Josephine Baker បានបញ្ចប់ការសិក្សានៅត្រឹមអាយុ១៣ឆ្នាំដើម្បីរៀបការ។ តែមិនបានប៉ុន្មានលោកស្រីក៏លែងលះគ្នាភ្លាម ហើយផ្តើមចាប់របរជាអ្នករាំក្នុងក្រុមសិល្បៈ Jones Family Band។ ក្នុងដំណើរចេញសម្តែងជាពីរដ្ឋមួយទៅរដ្ឋមួយ ជាបន្តបន្ទាប់ នាងបានជួបលោក Willie Baker និងរៀបការជាលើកទីពីរ ហើយប្រើត្រកូល Baker ជារៀងរហូតដល់ថ្ងៃស្លាប់។
ដើម្បីសម្រេចបំណងចង់ក្លាយជាអ្នកសម្តែងល្ខោនBraodway លោកស្រីបានបង្ខំចិត្តចាកចេញពីស្រុកកំណើត និងស្វាមីទី២ នៅអាយុ១៦ឆ្នាំ។ មានស្នាដៃសម្តែងល្អ ផលិតករម្នាក់បានបបួលនាងមកបារាំង ដើម្បីថតដាក់ទស្សនាវដ្តីជនជាតិស្បែកខ្មៅ ក្នុងទម្រង់ជាការរាំស្រាតស្ទើរស្រាតននោល ដែលក្រោយមកលោកស្រីបានសរសេររិះគន់ថាចំណីអារម្មណ៍របស់ពួកអាណានិគម។ នៅឆ្នាំ ១៩២៧ នាងបានឡើងឆាកសម្តែងរាំច្រៀងក្នុងក្រុម Folies Bergeres។ សម្ជសសម្រស់និងការសម្តែងរបស់នាងបានទាក់ចិត្តទាំងមនុស្សស្រីទាំងមនុស្សប្រុស មិនយូរប៉ុន្មាននាងក៏បានក្លាយជាតារាប្រចាំកាស៊ីណូប៉ារីស និងបានជោគជ័យយ៉ាងត្រចះត្រចង់ ជាមួយបទចម្រៀង J’ai 2 amours ឬប្រែថា “ខ្ញុំមានស្នេហាពីរ” ដែលជាការឧទ្ទិសទឹកចិត្តសេ្នហារបស់នាងចំពោះប្រទេសកំណើតនិងក្រុងប៉ារីស។
នៅឆ្នាំ ១៩៣៧ នាងបានរៀបការជាលើកទីបី ជាមួយបុរសជាជាងកាត់ដេរ ជាតិជ្វីហ្វ និងបានទទួលសញ្ជាតិបារាំង។ ទន្ទឹមនឹងជោគជ័យក្នុងវិស័យសិល្បៈ លោកស្រីមានបុព្វហេតុតស៊ូប្រឆាំងនឹងពួកណាហ្ស៊ី ដើរជួរមុខ ដោយបានបន្លំខ្លួនធ្វើជាចារកិច្ចបំរើឱ្យរដ្ឋបារាំង នាំព័ត៌មានសម្ងាត់និងសំខាន់ៗជាច្រើនមកឱ្យបារាំង ឬការពារចារបុរសឱ្យបានរួចពីពួកណាហ្ស៊ីអាល្លឺម៉ង់ តាំងពីសង្គ្រាមផ្ទុះឡើងភ្លាម រហូតដល់ចប់សង្គ្រាមលោក។ លោកស្រីបានចូលបំរើការងារ និងជួយអង្គការកាកបាទក្រហម រហូតអស់ទ្រព្យពីខ្លួន។ នៅឆ្នាំ ១៩៤៩លោកស្រីបានមេដាយជាសកម្មជនតស៊ូ និងបានទទួលឥស្សរិយសពីប្រធានាធិបតីបារាំង ដឺហ្កោល នៅឆ្នាំ ១៩៥៧។ ក្រោយមរណភាពនៅថ្ងៃទី ១២មេសា១៩៧៥ លោកស្រីបានក្លាយជាស្ត្រីទីមួយដែលបានទទួលមេដាយកិត្តិយសយោធា។
ក្រោយសង្គ្រាមលោក ដោយចង់ប្រែក្លាយក្តីស្រមៃឃើញពិភពលោកមានភាតរភាពសាកល លោកស្រីបានសុំកូនចំនួន១២នាក់មកចិញ្ចឹម មានពណ៌សំបុរ ដើមកំណើត សញ្ជាតិសាសនាខុសគ្នាទាំងអស់ និងចាប់ផ្តើមសកម្មភាពគាំទ្រពលរដ្ឋអាមេរិកស្បែកខ្មៅនៅអាមេរិក តាំងពីនៅឆ្នាំ១៩៥៣មក។ នៅថ្ងៃទី ២៣សីហា ១៩៦៣ លោកស្រីបានធ្វើដំណើរឆ្លងមហាសមុទ្ទអាត្លង់ទិក ដើម្បីចូលរួមដង្ហែក្បួនបាតុកម្មជាមួយ Martin Luther King ទាមទារសិទ្ធិសេរីភាពឱ្យជនស្បែកខ្មៅនៅអាមេរិក ក្នុងឯកសណ្ឋានជាវីរនារីនៃចលនាបារាំងសេរី France Libre និងដោយបានថ្លែងថា “ថ្ងៃនេះជាថ្ងៃដ៏រីករាយបំផុតក្នុងមួយជីវិតខ្ញុំ”។ ក្នុងដំណាក់កាលចុងក្រោយនេះជីវិត លោកស្រីបានទទួលការគាំទ្រពីរាជបុត្រីម៉ូណាកូ និងលាចាកលោកក្នុងវ័យ៦៩ឆ្នាំ នៅម៉ូណាកូ។ ហើយចាប់ពីថ្ងៃទី ៣០វិច្ឆិកា២០២១ទៅ លោកស្រីបានក្លាយជាស្ត្រីទី៦ និងជាស្ត្រីស្បែកខ្មៅដំបូងគេបង្អស់ ដែលមានកិត្តិយសផ្តិតឈ្មោះកប់ផ្នូរក្នុងវិមានប៉ង់តេអុង ក្បែរឥស្សរជននិងបញ្ញាជនដ៏មានកេរ្តិ៍ឈ្មោះ ៨០រូបផ្សេងទៀតរបស់បារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ