Brexit៖ អឺរ៉ុបថាធ្វើសម្បទានអស់ត្រឹមនេះហើយ អ្វីៗទុកឲ្យភាគីអង់គ្លេសសម្រេចចុះ
នៅថ្ងៃអង្គារនេះ សភាអង់គ្លេសនឹងត្រូវបោះឆ្នោតសាជាថ្មី ដើម្បីទទួល ឬមិនទទួល លើកិច្ចព្រមព្រៀងផ្តាច់ខ្លួន ដែលរដ្ឋាភិបាលលោកស្រីតេរ៉េសា ម៉ា បានចុះជាមួយសហភាពអឺរ៉ុប។ ជាកិច្ចព្រមព្រៀងដដែល ដែលសភាអង់គ្លេស បានបដិសេធចោលម្តងមកហើយ កាលពី២ខែមុន ដោយបានរុញមកឲ្យរដ្ឋាភិបាលលោកស្រីតេរ៉េសា ម៉ា ត្រូវចរចាកែប្រែចំណុចខ្លះ។ ក៏ប៉ុន្តែ នៅថ្ងៃចន្ទ តំណាងភាគីចរចា របស់អឺរ៉ុប បានលើកឡើងថាសហភាពអឺរ៉ុបបានធ្វើសម្បទាន អស់ត្រឹមនេះហើយ មិនអាចធ្វើអ្វី ឲ្យលើសនេះបានទេ។ ដូច្នេះ ទទួលបានឬមិនបាន គឺអង់គ្លេស ជាអ្នកសម្រេចទៅចុះ!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់
ពេលវេលាដល់ហើយ ដែលសភាអង់គ្លេស ត្រូវបោះឆ្នោតសាជាថ្មី ដើម្បីទទួល ឬ បដិសេធ កិច្ចព្រមព្រៀងផ្តាច់ខ្លួនចេញពីសហភាពអឺរ៉ុប។ កាលពី២ខែមុន កិច្ចព្រមព្រៀងនេះ ត្រូវបានសភាអង់គ្លេស បោះឆ្នោតបដិសេធ ហើយបានបង្ខំ ឲ្យលោកស្រីតេរ៉េសា ម៉េ ត្រូវត្រលប់ទៅចរចា ជាមួយអឺរ៉ុប។
ចំណុចដែលខ្ទាស់ខ្លាំងបំផុតនោះ គឺទាក់ទិននឹងបញ្ហាព្រំដែន រវាងដែនដីអៀរឡង់ខាងជើង របស់អង់គ្លេស និងប្រទេសអៀរឡង់។ ព្រំដែននេះ នឹងក្លាយជាព្រំដែន រវាងសហភាពអឺរ៉ុប និងអង់គ្លេស បន្ទាប់ពីអង់គ្លេស ផ្តាច់ខ្លួនចេញជាស្ថាពរ។ ក៏ប៉ុន្តែ ដើម្បីបញ្ចៀសកុំឲ្យជម្លោះបែងចែកទឹកដីនៅអៀរឡង់ រើកំរើកឡើងវិញ ដោយសារតែព្រំដែននេះ ទើបសហភាពអឺរ៉ុប និងរដ្ឋាភិបាលអង់គ្លេស បានព្រមព្រៀងគ្នា បង្កើតជាបណ្តោះអាសន្ន នូវលក្ខខណ្ឌពិសេស ស្តីពីចរាចរមនុស្ស និងទំនិញ រវាងដែនដីអៀរឡង់ខាងជើង និងប្រទេសអៀរឡង់។ សម្រាប់សមាជិកសភាអង់គ្លេសជាតិនិយម លក្ខខណ្ឌនេះ គឺវាបំពាន ទៅនឹងបូរណភាពដែនដី និងអធិបតេយ្យភាព របស់អង់គ្លេសទាំងមូល។
ក៏ប៉ុន្តែឆ្លងកាត់២ខែមកនេះ គេសង្កេតឃើញថា ការចរចាសើរើចំណុចនេះ ហាក់គ្មានលទ្ធផលនោះទេ។ នៅថ្ងៃចន្ទ ទី១១មីនា លោក មីឈែល បានីញេ តំណាងសហភាពអឺរ៉ុប ទទួលបន្ទុកការចរចា បាននិយាយថា អឺរ៉ុបមិនអាចធ្វើសម្បទានអ្វី ឲ្យបានលើសពីនេះទេ។ អ្វីៗ ទុកឲ្យសភា និងរដ្ឋាភិបាលអង់គ្លេស សម្រេចទៅចុះ ថាទទួលយកបាន ឬមិនបាន។ តែយ៉ាងណា លោកឆ្លៀតបញ្ជាក់ថា សហភាពអឺរ៉ុប សុខចិត្តផ្តល់ជូន នូវតម្លៃគតិយុទ្ធចាប់បង្ខំ ទៅលើលិខិតសន្យា អះអាងស្តីពីភាពបណ្តោះអាសន្ន នៃបទវិធានពិសេស នៅព្រំដែនរវាងអៀរឡង់ទាំង២។
ជាការពិត គឺគេមិនរំពឹងថា សភាអង់គ្លេសនឹងបោះឆ្នោត ទទួលកិច្ចព្រមព្រៀងនេះទេ ព្រោះថាលោកស្រីតេរ៉េសា ម៉េ មិនបាននាំមកនូវការកែប្រែ ទៅតាមការចង់បានរបស់សភាឡើយ។ បណ្តាញសារពត៌មានBBC បានចុះផ្សាយថា កិច្ចព្រមព្រៀងនេះ ពិតជាស្ថិតក្នុងគ្រោះថ្នាក់ប្រាកដណាស់។
សូមរំលឹកថា នៅថ្ងៃទី២៩មីនា គឺជាឱសានុវាទចុងក្រោយ ដែលអង់គ្លេស ត្រូវផ្តាច់ខ្លួនជាស្ថាពរ ពីសហភាពអឺរ៉ុប។ បើគ្មានកិច្ចព្រមព្រៀង ដើម្បីរៀបចំចាត់ចែងពីការផ្តាច់ខ្លួនទេនោះ នោះភាពវឹកវរ ផ្នែកច្បាប់ ផ្នែកសេដ្ឋកិច្ច និងបញ្ហាជាច្រើនទៀត ប្រាកដជាកើតមាន។
តាមការលើកឡើង របស់អ្នកនាំពាក្យរដ្ឋាភិបាលអង់គ្លេស បើសិនជាថ្ងៃទី១២មីនា សភាមិនបោះឆ្នោតទទួលទេនោះ នោះនៅថ្ងៃទី១៣ មីនា លោកស្រីតេរ៉េសា ម៉េ នឹងស្នើឲ្យបោះឆ្នោតមួយទៀត ដើម្បីចាកចេញពីអឺរ៉ុប ដោយគ្មានកិច្ចព្រមព្រៀង។ បើសិនសភាអង់គ្លេសនៅតែបដិសេធ មិនព្រមផ្តាច់ខ្លួន ដោយគ្មានកិច្ចព្រមព្រៀង នោះនឹងមានការបោះឆ្នោតមួយទៀត នៅថ្ងៃទី១៤មីនា ដើម្បីសុំពន្យាការចាកចេញ។ តែយ៉ាងណាក៏ដោយ ការពន្យាពេលចាកចេញ គឺត្រូវតែសហភាពអឺរ៉ុបយល់ព្រមដែរ ហើយអឺរ៉ុបក៏មិនអាច ចេះតែពន្យាទុកពេលឲ្យអង់គ្លេស នៅរ៉ាំរ៉ៃស្ទាក់ស្ទើរបែបនេះរហូតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ