ប្រមុខការទូតអឺរ៉ុប៖ កតិកាសញ្ញាយោធាអឺរ៉ុបមិនមែនជាគ្រោះថ្នាក់សម្រាប់អង្គការអូតង់
សហភាពអឺរ៉ុបនៅថ្ងៃសុក្រម្សិលមិញ បានបដិសេធមិនធ្វើតាមការទាមទាររបស់អាមេរិក ដែលចង់ឲ្យសហភាពអឺរ៉ុបសរសេរធានាថា អង្គការអូតង់ជាតួអង្គតែមួយគត់ ដែលមានបេសកកម្មការពារអឺរ៉ុប។ អាមេរិក ក៏ដូចជាសមាជិកផ្សេងទៀតរបស់អូតង់បានចាប់កើតក្តីបារម្ភ នៅក្រោយឃើញសហភាពអឺរ៉ុប ប្រកាសបង្កើតកិច្ចព្រមព្រៀងយោធាអឺរ៉ុប ដែលជាស្ថាប័នដាច់ដោយឡែកមួយ ពីអង្គការអូតង់។
ចុះផ្សាយនៅថ្ងៃ៖
សហភាពអឺរ៉ុបបដិសេធមិនធ្វើតាមការចង់បានរបស់អាមេរិក ពីព្រោះ បើតាម ប្រមុខការបរទេសអឺរ៉ុប លោកស្រី Federica Mogherini តួនាទីរបស់អង្គការអូតង់ ដែលត្រូវការពារសម្ព័ន្ធមិត្តអឺរ៉ុបត្រូវបានសរសេរ ចែងយ៉ាងច្បាស់រួចហើយ នៅក្នុងសន្ធិសញ្ញាអឺរ៉ុប។
នៅថ្ងៃព្រហស្បតិ៍ នៅក្នុងកិច្ចប្រជុំថ្នាក់រដ្ឋមន្រ្តីការពារជាតិ របស់ប្រទេសសមាជិក អូតង់ នៅទីក្រុងព្រុចស៊ែល ប្រមុខការពារជាតិអាមេរិក លោកJames Mattis បានទាមទារឲ្យអឺរ៉ុប ត្រូវសរសេរ នៅក្នុងកិច្ចព្រមព្រៀងយោធាថ្មី របស់អឺរ៉ុប ថា ការការពារសន្តិសុខឲ្យអឺរ៉ុប គឺជាកាតព្វកិច្ច របស់អង្គការអូតង់ គឺអូតង់តែមួយគត់។ រដ្ឋមន្រ្តីការពារជាតិអាមេរិកចង់បានការធានាពីភាគីអឺរ៉ុបថា នឹងគ្មានស្ថាប័នណាមួយផ្សេង ដែលនឹងទៅគំរាមកំហែង ប្រកួតប្រជែង ដណ្តើមការងាររបស់សម្ព័ន្ធអាត្លង់ទិក អូតង់។
រដ្ឋមន្រ្តីការពារជាតិចង់សំដៅដល់កតិកាសញ្ញាការពារជាតិ ដែលសហភាពអឺរ៉ុប ដែលមានសមាជិក២៦ប្រទេស បានចុះហត្ថលេខាបង្កើត កាលពីខែធ្នូកន្លងទៅ។ ទៅតាមកិច្ចព្រមព្រៀង យោធា អឺរ៉ុប PESCO ប្រទេសសមាជិកអឺរ៉ុបបានសន្យាថា សហការគ្នាឲ្យជិតស្និទ្ធ ក្នុងផ្នែកយោធា និងបង្កើនការចំណាយយោធា ដើម្បីផលិតសព្វាវុធថ្មីៗ។ ជារួម កិច្ចព្រមព្រៀងយោធាអឺរ៉ុបមាននាទីជំរុញឲ្យការវិនិយោគទៅលើការអភិវឌ្ឍន៍លើសមត្ថភាពការពារជាតិអឺរ៉ុប មានតម្លៃ ៥ពាន់លានអឺរ៉ូ ចាប់ពីឆ្នាំ ២០២០។
នៅក្រោយសហភាពអឺរ៉ុបសម្រេចបង្កើតកិច្ចព្រមព្រៀងយោធាផ្ទាល់របស់អឺរ៉ុប អាមេរិក កាណាដា ន័រវែស អ៊ីស្លង់ អាល់បានី បារម្ភខ្លាចថា ។ មន្រ្តីការពារជាតិអាមេរិក ធ្លាប់បានព្រមានរួចហើយថា គំនិតផ្តួចផ្តើមអឺរ៉ុប មិនត្រូវធ្វើឲ្យប៉ះពាល់ដល់ដំណើរការ និងមធ្យោបាយហិរញ្ញវត្ថុរបស់អង្គការអូតង់។ សម្រាប់អគ្គលេខាធិការអង្គការអូតង់ ស្ថាប័នការពារជាតិអឺរ៉ុបមិនត្រូវធ្វើកិច្ចការអ្វី ដែលអូតង់កំពុងធ្វើ ហើយក៏មិនត្រូវបិទទីផ្សារអាវុធ មិនឲ្យអាមេរិក ឬក្រុមប្រទេសដែលមិនមែនជាសមាជិករបស់អឺរ៉ុប ចូលទិញនោះដែរ។ នៅថ្ងៃចន្ទ ឯកអគ្គរដ្ឋទូតអាមេរិក ប្រចាំអង្គការអូតង់បានព្រមានសហភាពអឺរ៉ុប កុំឲ្យប្រើកិច្ចព្រមព្រៀងយោធាអឺរ៉ុប ដើម្បីធ្វើជាឧបករណ៍ ការពារឧស្សហកម្មផលិតអាវុធរបស់អឺរ៉ុប ហើយដែលនឹងធ្វើឲ្យប៉ះពាល់ដល់ក្រុមហ៊ុនផលិតអាវុធអាមេរិក ដែលរហូតមកជាអ្នកផ្គត់ផ្គង់ ដល់គម្រោងយោធា របស់អូតង់ ដែលមានប្រទេសអឺរ៉ុប ជាសមាជិក។
ប្រមុខការបរទេសអឺរ៉ុប នៅថ្ងៃសុក្រ បានបញ្ជាក់ជាថ្មី កតិកាសញ្ញាយោធាអឺរ៉ុបនឹងមិនទៅដណ្តើមការងាររបស់អូតង់ ប៉ុន្តែ នឹងអាចជួយបំពេញបន្ថែម នៅផ្នែកនយោបាយសន្តិសុខតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ