តួកគីប្រកាសអំពីជំនួបកំពូលត្រីភាគីជាមួយរុស្ស៊ី និងអ៊ីរ៉ង់ជុំវិញបញ្ហាស៊ីរី
ថ្ងៃព្រហស្បតិ៍ ទី៨ កុម្ភៈ តួកគី បានប្រកាសថា ខ្លួននឹងធ្វើជាម្ចាស់ផ្ទះ ទទួលជំនួបកំពូល ត្រីភាគី ជាមួយ រុស្ស៊ី និង អ៊ីរ៉ង់ ឧទ្ទិសដល់ ប្រទេសស៊ីរី ជាទីដែល នាពេលចុងក្រោយ ចេះតែបន្តកើនឡើង អំពើហិង្សា ដែលនាំឲ្យខូច ដល់ការខំប្រឹងប្រែងផងទាំងឡាយ ស្វែងរកសន្តិភាពសម្រាប់ប្រទេសនោះ ហែកហួរ ដោយជម្លោះតាំងពីឆ្នាំ ២០១១ មក លុះទាល់តែផ្តាច់ជីវិតមនុស្ស អស់ជាង ៣ សែន ៤ ម៉ឺន នាក់ ទៅហើយ។
ចុះផ្សាយនៅថ្ងៃ៖
ស្តាប់ - ០២:២៩
ការសម្រេចចិត្តនេះត្រូវបានអនុម័ត ក្នុងកិច្ចសន្ទនាតាមទូរសព្ទ ថ្ងៃព្រហស្បតិ៍ រវាង លោកប្រមុខរដ្ឋ តួកគី តៃយីព អ៊ែរដូហ្កាន់ និងលោកប្រធានាធិបតីរុស្ស៊ី វ៉្លាឌីមៀរ ពូទីន ដំណឹងនេះបញ្ជាក់ដោយ ក្រុមមន្ត្រី ជំនិតនឹងប្រមុខរដ្ឋតួកគី ដែលលំអិតថា កាលបរិច្ឆេទជំនួប នឹងត្រូវប្រកាសឲ្យដឹងនៅពេលក្រោយ។ ចំណែកអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ថ្លែងថា សាច់រឿង គឺអំពីជំនួបរវាងប្រធានាធិបតី ៣ ប្រទេស ប៉ុន្តែ ពេលវេលាជំនួបនេះ នៅមិនទាន់កំណត់ទេ។ រុស្ស៊ី និង អ៊ីរ៉ង់ ដែលគាំទ្ររបបលោកប្រធានាធិបតី បាស្ហារ អាល់-អាសាដ ព្រមទាំង តួកគី ដែលជាបង្អែក របស់ភាគីប្រឆាំងស៊ីរី ធ្លាប់បានធ្វើជំនួបកំពូលត្រីភាគីមួយលើកដំបូងទៅហើយ នៅឯ ក្រុងរុស្ស៊ី សូតឈិ កាលពី ខែវិច្ឆិកាឆ្នាំមុន។
ដំណឹងប្រកាសដោយតួកគី អំពីជំនួបកំពូលបែបនេះ ជាលើកទី២ ធ្លាយចេញមក គឺនៅចំពេលដែលក្នុង ប្រទេសស៊ីរី ហែកហួរដោយជម្លោះតាំងពីឆ្នាំ ២០១១ មក បណ្តាលឲ្យអ្នកស្រុកស្លាប់អស់ជាង ៣ សែន ៤ ម៉ឺន នាក់ទៅហើយ នាប៉ុន្មានសប្តាហ៍ចុងក្រោយ ស្រាប់តែលាប់ឡើងវិញ ដោយការផ្ទុះអាវុធ នៅលើ សមរភូមិផ្ទាល់។ របបស៊ីរី ដែលគាំទ្រដោយមូស្គូនិងក្រុងតេហេរ៉ង់ បានបញ្ឆេះប្រតិបត្តិការវាយលុកជាថ្មី ទៅលើខេត្តបះបោរ Idleb នៅប៉ែកពាយ័ព្យប្រទេស ហើយក្នុងសប្តាហ៍នេះ បានបង្កើនការទំលាក់គ្រាប់បែក ទៅលើតំបន់ Ghouta កាន់កាប់ដោយពួកឧទ្ទាម នៅខាងកើតពីរដ្ឋធានី ដាម៉ាស់។
រីឯ កងទ័ពតួកគី ក្នុងខែមុន បានវាតយុទ្ធនាការទៅលើ ក្រុង Afrine នៅប៉ែកពាយ័ព្យស៊ីរីដែរ ប្រឆាំងនឹង កងសេនាជនគួដឌីស្ថាន ហេតុដែលបើកសមរភូមិថ្មីមួយទៀត នៅក្នុងជម្លោះដែលស្មុគស្មាញស្រាប់ទៅហើយ។ រួចព័ត៌មានស្តីអំពីយុទ្ធនាការនេះឯង ដែលត្រូវបានលោក អ៊ែរដូហ្កាន ចែករំលែកជាមួយលោកពូទីន។ មេដឹកនាំតួកគី ក៏បានសំដែងការរួមមរណទុក្ខ មកកាន់មេដឹកនាំរុស្ស៊ី ដោយពីឡុតរុស្ស៊ី នៃយន្តហោះចំបាំង ពេលហោះល្បាតលើតំបន់សន្តិសុខក្នុងខេត្ត Idleb ត្រូវបានបាញ់ធ្លាក់ដោយក្រុមពួកជីហាត។ មូស្គូ បានសាទរ ចំពោះតួនាទី ដើរដោយក្រុង អង់ការ៉ា ក្នុងការយកបានមកវិញ សពនាយទាហានរុស្ស៊ីនោះ។ ពេលសន្ទនាតាមទូរស័ព្ទ លោកពូទីន និង លោក អ៊ែរដូហ្កាន បានឯកភាពគ្នា ពន្លឿន ការពង្រាយ ប៉ុស្តិ៍សង្កេតការណ៍ថ្មីៗទៀត នៅក្នុងខេត្តនោះ ក្នុងក្របខ័ណ្ឌនៃតំបន់សន្តិសុខខេត្ត Idleb ជាតំបន់សន្តិសុខមួយពីក្នុងចំណោមតំបន់សន្តិសុខ ៤ កន្លែងនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ