អង់គ្លេស៖សន្តិសុខត្រូវបានពង្រឹងកម្រិតខ្ពស់នៅក្នុងថ្ងៃរៀបចំការបោះឆ្នោតសភា
នៅថ្ងៃព្រហស្បតិ៍ ទី៨ មិថុនានេះ មានពលរដ្ឋអង់គ្លេសជាង ៤៧លាននាក់បានចូលរួមបោះឆ្នោតសភាមុនកាលកំណត់។ បេក្ខជនដែលនាំមុខប្រកៀកប្រកើយគ្នានៅក្នុងការបោះឆ្នោតនេះ គឺលោកស្រីនាយករដ្ឋមន្រ្តីផុតអាណត្តិ Theresa May មកពីគណបក្សអភិរក្សនិយម និងលោក Jeremy Corbyn មកពីគណបក្សពលករ។ វិធានការសន្តិសុខត្រូវបានរដ្ឋអំណាចពង្រឹងក្នុងកម្រិតខ្ពស់ដើម្បីប្រឈមទប់នឹងការវាយប្រហារភេរវកម្មជាយថាហេតុ។ ការិយាល័យបោះឆ្នោតបានបើកទ្វារនៅម៉ោង ៧ព្រឹក និងគ្រោងបិទទ្វារនៅម៉ោង ១០យប់នេះ។
ចុះផ្សាយនៅថ្ងៃ៖
ស្តាប់ - ០២:៣៧
ពិតជាមិនមែនចៃដន្យទេដែលរដ្ឋអំណាចអង់គ្លេសបានពង្រឹងសន្តិសុខដល់កម្រិតកំពូលនៅក្នុងថ្ងៃបោះឆ្នោតថ្ងៃនេះ។ មិនចៃដន្យ ព្រោះប្រទេសបាន និងកំពុងបន្តស្ថិតក្រោមការគំរាមកំហែងរបស់អង្គការរដ្ឋអ៊ីស្លាមជានិច្ច។ គ្រាន់តែអំពើភេរវកម្មចំនួន ៣ដង ក្នុងរយៈពេលមិនដល់ ៣ខែចុងក្រោយនេះបានផ្តាច់ជីវិតមនុស្ស ៣៥នាក់។ សន្តិសុខដែលត្រូវបានរដ្ឋអំណាចពង្រឹងខ្លាំងជាងគេ គឺនៅក្នុងទីក្រុងឡុងដ៏។ នេះក៏ដោយសារថា ពលរដ្ឋអង់គ្លេសភាគច្រើន ពិសេសអ្នករស់ក្នុងទីក្រុងឡុងដ៏ហាក់បន្តតក់ស្លុត និងមិនទាន់បាត់ភ័យខ្លាចលើអំពើភេរវកម្មកាលពីថ្ងៃទី៣ មិថុនាកន្លងទៅដែលបានបណ្តាលឲ្យស្លាប់មនុស្ស ៨នាក់ និងរបួស ៤៨នាក់។
សូមជម្រាបជូនថា អ្នកដែលបានកោះឲ្យមានការរៀបចំបោះឆ្នោតសភាមុនអាណត្តិដល់ទៅ ៣ឆ្នាំពេលនេះ គឺលោកស្រីនាយករដ្ឋមន្រ្តីផុតអាណត្តិ Theresa May។ លោកស្រី Theresa May បានចូលជំនួសកន្លែងលោក David Cameron ក្រោយពីលោក Cameron លាចុះពីតំណែងដោយសារតែពលរដ្ឋអង់គ្លេសបានបោះឆ្នោតឲ្យអង់គ្លេសដកខ្លួនចេញពីសហភាពអឺរ៉ុបដែលហៅថា Brexit។ តាមពិតទៅ លោកស្រី May មិនចាំបាច់កោះឲ្យមានការបោះឆ្នោតទេ ព្រោះគណបក្សអភិរក្សនិយមរបស់លោកស្រីមានសម្លេងភាគច្រើននៅក្នុងសភាដល់ទៅ ១៧សម្លេង។
តែសម្រាប់លោកស្រី May លើស ១៧សម្លេង គឺតិចតួចខ្លាំងណាស់ និងចង់ទទួលបានសម្លេងច្រើនជាងនេះដោយលោកស្រីបារម្ភខ្លាចមានតំណាងរាស្រ្តប្រឆាំងខ្លះចេញពីគណបក្សអភិរក្សនិយម ឬនិយាយឲ្យស្រួលយល់ គឺខ្លាចដង្កូវចេញពីសាច់ឯង។ ការដែលលោកស្រី May ចង់បានសម្លេងភាគច្រើនលើសលុបនៅក្នុងសភា គឺងាយស្រួលចរចាជាមួយសហភាពអឺរ៉ុបដើម្បីទទួលបានកិច្ចព្រមព្រៀងល្អឲ្យប្រទេសអង់គ្លេស។ តែជាដំបូង លោកស្រី May ត្រូវយកឈ្នះលើលោក Jeremy Corbyn បេក្ខជនមកពីគណបក្សប្រឆាំង គឺបក្សពលករជាមុនសិន។
លទ្ធផលស្ទង់មតិចុងក្រោយឲ្យដឹងថា លោកស្រី May នៅតែនាំមុខគេនៅក្នុងការបោះឆ្នោតនេះ តែគម្លាតរវាងលោកស្រី និងលោក Corbyn បានថយចុះខ្លាំងពី ២០ពិន្ទុមកនៅចន្លោះពី ៤ ទៅ ១០ពិន្ទុប៉ុណ្ណោះ។ ការហក់ស្ទុះឡើងរបស់លោក Corbyn ក៏ដោយសារតែមានការវាយប្រហារភេរវកម្មជាបន្តបន្ទាប់។ លោក Corbyn មិនញញើតនឹងដំឡើងសម្លេងដាក់លោកស្រី May ពីការមិនយកចិត្តទុកដាក់លើសន្តិសុខរបស់ប្រជាជនអង់គ្លេស និងចោទលោកស្រីពីបទបានលុបចោលការងារប៉ូលិសចំនួន ២០ ០០០ការងារក្នុងពេលដែលលោកស្រីកាន់តំណែងរដ្ឋមន្រ្តីមហាផ្ទៃពីឆ្នាំ ២០១០ ដល់ឆ្នាំ ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ