រដ្ឋាភិបាលបារាំងថ្មី កំពុងជួបរឿងអាស្រូវរដ្ឋមន្ត្រីមិនស្អាតស្អំ
ជាប្រធានាធិបតីថ្មី វ័យក្មេង លោក អេម៉ានុយអែល ម៉ាក្រុង បានបង្ហាញជាភាពស្វាហាប់ដឹកនាំប្រទេស និងបានបង្ហាញម៉ឺងម៉ាត់ ដាច់ខាត តាក់តែងបង្កើតរដ្ឋាភិបាលទាន់សម័យ មួយ ជាគំរូល្អ និងជាពិសេសស្អាតស្អំ គ្មានប្រលាក់ប្រលូសជីវិតឯកជននិងសាធារណៈទេ។ លោកម៉ាក្រុង បានចាត់ទុក “សីលធម៌ស្អាតស្អំ” ជាមេរៀនទីមួយរបស់រដ្ឋាភិបាល ដែលត្រូវអនុវត្តឱ្យបាន ប៉ុន្តែមិនទាន់អីផង ស្រាប់តែមានផ្ទុះរឿងអាស្រូវ ថាមាន រដ្ឋមន្ត្រីថ្មីថ្មោងរបស់លោកម៉ាក្រុង ពីររូប ជាប់សង្ស័យបានកេងលុយរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅក្នុងអំឡុងពេលឃោសនាបោះឆ្នោតប្រធានាធិបតីបារាំង បេក្ខជនបក្សសាធារណរដ្ឋដ៏ល្បីល្បាញដែលរួមរិតដោយរឿងអាស្រូវ កេងលុយរដ្ឋបានចាញ់ឆ្នោត។ លោក ម៉ាក្រុង បានក្លាយជាប្រធានាធិបតីថ្មី យល់ការ បានយកភាពស្អាតស្អំរបស់សមាជិករដ្ឋាភិបាល មកដាក់មុខ ដោយសង្ឃឹមថានឹងអាចទាក់ទាញចិត្តពលរដ្ឋបាន ឱ្យបន្តគាំទ្របក្សលោកទៀត នៅក្នុងសម័យបោះឆ្នោតសភា ថ្ងៃទី ១១និង១៨មិថុនាខាងមុខ។
ប៉ុន្តែម្សិលមិញ សារព័ត៌មានបារាំងទម្លាយរឿងអាស្រូវថា រដ្ឋមន្ត្រីក្រសួងទំនាក់ទំនងអឺរ៉ុប លោកស្រី Marielle de Sarnez ព្រមទាំងតំណាងសភាអឺរ៉ុប ១៨រូបផ្សេងទៀត កំពុងជាប់អង្កេតបឋម ពីបទកេងលុយរដ្ឋ តាមរយៈការប្រឌិតជួលសហការីប្រើ។ លោកស្រីបានបដិសេធ និងបានដាក់ពាក្យបណ្តឹងពីបទមួយបង្កាច់។
ការចោទប្រកាន់លើរូបលោកស្រីរដ្ឋមន្ត្រីនេះ ជាដំណឹងអាក្រក់ថ្មីបន្ថែមមួយទៀត ដែលមកជាន់ករដ្ឋាភិបាលលោកម៉ាក្រុង។ តាំងពីមួយសប្តាហ៍មកហើយ ដែលរដ្ឋមន្ត្រីក្រសួងដែនដី ជាមនុស្សជំនិតបំផុតរបស់លោកប្រធានាធិបតី ធ្លាក់ក្នុងអន្លង់នៃការចោទប្រកាន់។ លោក Richard Ferrand ត្រូវជាប់សង្ស័យថា បានកេងលុយរដ្ឋ តាមរយៈប្រើអំណាចទៅសម្រួលកិច្ចការដើម្បីផ្តល់ប្រយោជន៍សេដ្ឋកិច្ចដល់ក្រុមគ្រួសារ។ ដំណឹងដាក់បន្ទុកលើរូបលោករដ្ឋមន្ត្រីមានកាន់តែច្រើនឡើងៗ។
ប្រជាពលរដ្ឋបារាំងភាគច្រើន យល់ថារដ្ឋមន្ត្រីទាំងពីររូបនេះ គួរតែលាលែងចេញពីតំណែង។ លោកនាយករដ្ឋមន្ត្រីបារាំង អេដ័រ ហ្វីលីព នៅតែបន្តការគាំទ្រចំពោះរដ្ឋមន្ត្រីទាំងពីរទៀត ប៉ុន្តែលោកបានបញ្ជាក់ថា ប្រសិនបើរដ្ឋមន្ត្រីណាជាប់ចោទប្រកាន់ជាផ្លូវការ រដ្ឋមន្ត្រីនោះត្រូវតែលាលែងចេញពីតំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ