តុល្យាការនៃកិច្ចចរចាប្រមុខរដ្ឋាភិបាលអាល្លឺម៉ង់ នៅម៉ូស្គូ ក្នុងសប្តាហ៏នេះ
ចុះផ្សាយនៅថ្ងៃ៖
ស្តាប់ - ០៥:៤០
ដោយហេតុថា ក្រោយពីអាក់ខានអស់២ឆ្នាំទៅ លោកស្រីនាយករដ្ឋមន្ត្រីអាល្លឺម៉ង់ Angela Merkel បានដាច់ចិត្ត មកធ្វើទស្សនកិច្ចផ្លូវការនៅរុស្ស៊ី កាលពីថ្ងៃទី២ឧសភាកន្លងទៅ បានជាគេបន្ត ចាប់ អារម្មណ៍ ទៅលើព្រឹត្តិការណ៍នេះ។ ជាពិសេស មកពី លោកស្រីជាមេដឹកនាំប្រទេស-ក្បាលម៉ាស៊ីន សហភាពអឺរ៉ុប ធ្លាប់បានថ្លែងថា ដរាបណា ដែលវិបត្តិនៅអ៊ុយក្រែន មិនទាន់ដោះស្រាយរួច គាត់នឹងពុំមក ជាន់ទឹកដីរុស្ស៊ីឡើយ។ សាច់រឿងនៃកិច្ចចរចា គឺអំពី ទំនាក់ទំនងទ្វេភាគី , វិបត្តិនៅអ៊ុយក្រែន និង ស្ថានការណ៍នៅស៊ីរី។
ជាការកត់សម្គាល់ ពេលចរចាគ្នា លោកប្រធានាធិបតីរុស្ស៊ី វ៉្លាឌីមៀរ ពូទីន ដែលចេះភាសាអាល្លឺម៉ង់ តែងងាយយល់ពាក្យសំដីជាភាសាអាល្លឺម៉ង់ប្រើដោយ លោកស្រីនាយករដ្ឋមន្ត្រីអាល្លឺម៉ង់ Amgela Merkel ដែលពីចំណែកខ្លួន ដោយចេះភាសារុស្ស៊ី ក៏ងាយយល់ដែរ ឃ្លាឃ្លោងជាភាសារុស្ស៊ីប្រើដោយ ប្រមុខរដ្ឋរុស្ស៊ី។
មូលហេតុ មកពី លោកស្រី Merkel កាលនៅជានិស្សិត ដោយប្រឡងឈ្នះគេខាងភាសារុស្ស៊ី ថែមទាំងបាន ទទួលរង្វាន់ ឲ្យធ្វើដំណើរមកទស្សនាសហភាពសូវៀតទៅផង។ ចំណែកលោក ពូទីន ក្នុងឋានៈជាភ្នាក់ងារ សន្តិសុខសូវៀត KGB ធ្លាប់បានធ្វើការនៅ សាធារណរដ្ឋប្រជាធិបតេយ្យអាល្លឺម៉ង់ អស់៤ឆ្នាំ ហើយគាត់បាន ចាកចេញពីទីនោះនៅខែមករាឆ្នាំ១៩៩០ គឺពីរខែក្រោយពីជញ្ជាំងក្រុងប៊ែរឡាំង ត្រូវបានផ្ទួលឲ្យរលំទៅ។
មិនតែប៉ុណ្ណោះ ក្រោយពីគាត់ឡើងកាន់តំណែងជាប្រធានាធិបតីរុស្ស៊ីសម័យថ្មីបាន១ឆ្នាំកន្លះ នៅខែកញ្ញាឆ្នាំ ២០០១ គាត់ថែមទាំងត្រូវបានអញ្ជើញឲ្យទៅថ្លែងសុន្ទរកថាជាភាសាអាល្លឺម៉ង់ ក្នុងរដ្ឋសភាអាល្លឺម៉ង់ ញ៉ាំង ឲ្យមាន ការភ្ញាក់ផ្អើលយ៉ាងខ្លាំង។
លទ្ធផលនៃកិច្ចចរចា ត្រូវបានមេដឹកនាំប្រទេសទាំងពីរ ប្រកាសឲ្យដឹង ក្នុងសន្និសីទកាសែតរួមគ្នា ។
អំពីទំនាក់ទំនងទ្វេភាគី ៖
លោកប្រមុខដ្ឋរុស្ស៊ីពូទីន គូសបញ្ជាក់ថា ៖ អាល្លឺម៉ង់ បន្តស្ថិតនៅជា“ដៃគូសេដ្ឋកិច្ចនាំមុខគេរបស់រុស្ស៊ី នៅទ្វីបអឺរ៉ុប” ។ ដំណើរការនៅរុស្ស៊ី គឺសហគ្រាស ៥.០០០ កន្លែង ដែលមានដើមទុនអាល្លឺម៉ង់។ រុស្ស៊ី ប្រាថ្នា រៀបរយសហប្រតិបត្តិការ ជាមួយ អាល្លឺម៉ង់ ដោយឈរលើ គោលការណ៍ ទទួលស្គាល់ ផលប្រយោជន៍ម្ខាងៗ គោរពគ្នាទៅវីញទៅមក និង ស្មើភាព ។ អំពីស្ថានភាពក្នុងពាណិជ្ជកម្មទ្វេភាគី យើងសង្កេតឃើញដោយ សោមនស្សន៍ មានការកើនឡើងបាន ៤៣% ទំហំផ្តោះប្តូរទៅវិញទៅមក ក្នុងខែមករានិងកុម្ភៈឆ្នាំ ២០១៧ នេះ។
ខ្ញុំក៏សូម កត់សម្គាល់ថា អាល្លឺម៉ង់ ជាប្រទេសដែលទិញឧស្ម័នរុស្ស៊ី ច្រើនជាងគេ ដល់ទៅ ៣៥% នៃតម្រូវការទីផ្សារអាល្លឺម៉ង់ ខាងថាមពលនេះ។
គួរដកឃ្លានិយាយថា តាមតួលេខមជ្ឈដ្ឋាន Business អាល្លឺម៉ង់ ៖ បើក្នុងឆ្នាំ២០១២ គឺមុនព្រឹត្តិការណ៍ នៅអ៊ុយក្រែន ទំហំផ្តោះប្តូរពាណិជ្ជកម្ម រវាងរុស្ស៊ីនិងអាល្លឺម៉ង់ បានមានទឹកប្រាក់ដល់ ៨០.០០០ លាន អឺរ៉ូ នោះក្នុងឆ្នាំ ២០១៦ គឺ ក្រោយពី សហភាពអឺរ៉ុប បានដាក់ទណ្ឌកម្មរុស្ស៊ី តាំងពីឆ្នាំ២០១៤មក ទំហំផ្តោះប្តូរ នេះ បានធ្លាក់ចុះដល់ ៥០.០០០ លាន អឺរ៉ូ ។
លោកពូទីន សង្កត់ធ្ងន់ថា “ សហប្រតិបត្តិការ រុស្ស៊ី-អាល្លឺម៉ង់ ជាវិភាគទានធំបង្គួរ រួមទៅក្នុងការផ្តល់ ស្ថិរភាពដល់សេដ្ឋកិច្ចពិភពលោក ដ្បិតសហប្រតិបត្តិការនេះធានា នូវកន្លែងធ្វើការសម្រាប់មនុស្ស រាប់សែននាក់ និង វាសនា សហគ្រាសទាំងមូលៗ រាប់សិបកន្លែង។
លោកស្រី Merkel ពីចំណែកគាត់ថ្លែងថា ៖ កិច្ចចរចាជាមួយលោកពូទីន ប្រព្រឹត្តទៅដោយប្រពលលក្ខណៈ ហើយ គាត់ហៅរុស្ស៊ី ថាជា “ដៃគូស្ថាបនា” ។
តាមសំដីគាត់ ៖ រុស្ស៊ី និង អាល្លឺម៉ង់ ត្រូវតែសន្ទនានឹងគ្នា ទោះបី មានការខ្វែងគំនិតគ្នាក្តី។ កាលណាយើង និយាយគ្នា យើងចាប់យល់គ្នាកាន់តែច្បាស់ បើយោងទៅលើបទពិសោធន៍នៃប្រវត្តិសាស្ត្ររាប់សតវត្សរ៍។ ពីព្រោះ ការនិយាយគ្នាមួយលើកៗ តែងហុចមកជា មេរៀនអ្វីមួយពុំខាន។
អំពីវិបត្តិនៅ អ៊ុយក្រែន ៖
លោក ពូទីន ៖ស្ថានការណ៍នៅអ៊ុយក្រែន ជាក្តីកង្វល់របស់គូភាគី។ ក្នុងបញ្ហានេះ ខ្ញុំនិងលោកស្រី Merkel តែងភ្ជាប់ ខ្សែទូរសព្ទនឹងគ្នា ជានិច្ច។ ខ្ញុំយល់ថា ការងារក្នុងរូបភាពចតុភាគី Normandie គឺ អាល្លឺម៉ង់ បារាំង រុស្ស៊ី អ៊ុយក្រែន ត្រូវតែបន្តទៅ។ ព្រមជាមួយនេះ ក្រុង Berlin និង Moscou ប្រកាន់គោលជំហរ ដើម្បី ការបំពេញឥតខ្ចោះ តាមកិច្ចព្រមព្រៀងចុះនៅក្រុង Minsk ខាងរៀបរយវិបត្តិនៅអ៊ុយក្រែន។ គូភាគី បានឯកភាពគ្នាថា កិច្ចព្រមព្រៀងនេះ គឺ គ្រប់គ្រាន់ មិនចាំបាច់តាក់តែងឡើង ជាកិច្ចព្រមព្រៀងថ្មីណា សម្រាប់ ជំនួសវាឡើយ។
ប៉ុន្តែលោក ពូទីន សង្កត់ធ្ងន់ថា ៖ បើគ្មានកិច្ចចរចារត្រង់ផ្ទាល់ទេ រវាង ក្រុងគៀវ និង តំបន់បះបោរ នោះវិបត្តិនៅអ៊ុយក្រែន មិនអាច ដោះស្រាយទៅកើតឡើយ។
លោកស្រី Merkel ពីចំណែកគាត់ មានប្រសាសន៍ថា ៖ យុទ្ធសន្តិភាពនៅអ៊ុយក្រែន មានន័យដ៏ធំសម្រាប់ ដោះស្រាយជម្លោះក្នុងប្រទេសនេះ។ លោកស្រី ក៏បានបញ្ចេញយោបល់ អំពីការធ្លាក់ខ្លួនស្លាប់ នៅតំបន់បះបោរខាងកើតអ៊ុយក្រែន នៃសហការី ម្នាក់ ក្នុងក្រុមល្បាតរបស់ អង្គការដើម្បីសន្តិសុខនិងសហប្រតិបត្តិការនៅអឺរ៉ុប OSCE ៖ ការងារ OSCE គឺ សំខាន់ណាស់ ប៉ុន្តែគួរឲ្យក្រៀមក្រំ ដែលក្រុមអ្នកបំពេញមុខងារ ដើម្បីបន្ធូរបន្ថយភាពតានតឹងនៅតំបន់នោះ ស្រាប់តែរងគ្រោះដល់ស្លាប់។ យើងត្រូវតែធ្វើសព្វបែបយ៉ាង ដើម្បីដោះស្រាយបញ្ហានេះ។ គួរឲ្យស្តាយ គ្មាន ការចម្រើនទៅមុខសោះ។ ជាថ្មីម្តងទៀត យើងបង្ខំចិត្តនិយាយថា ត្រូវឲ្យមានការឈប់បាញ់ ដើម្បីអាច ឆ្លងទៅ កាន់ដំណោះស្រាយតាម ជំហាននយោបាយ។
អំពីស្ថានការណ៍នៅ ស៊ីរី
លោក ពូទីន ៖ រុស្ស៊ី ថ្កោលទោសប្តូរប្តេជ្ញ ដល់ការប្រើអាវុធគីមីណាក៏ដោយ ។ ត្រូវតែរកឲ្យឃើញ អ្នកដែល ជាប់ពិរុទ្ធក្នុងការប្រើអាវុធនេះ នៅខេត្តស៊ីរី Idleb កាលពីថ្ងៃ៤មេសា ហើយបន្ទាប់មក កាត់ទោស ពួកនោះ លុះណាក្រោយពីធ្វើអង្កេត ឲ្យបានគ្រប់ជ្រុងជ្រោយ ដោយកុំលំអៀងទៅខាងណាៗ។ ភារកិច្ចដែលចោទ គឺបង្កលក្ខណៈ សម្រាប់បញ្ឈប់ការបាញ់គ្នា គ្រាន់នឹងហុចលទ្ធភាពដល់រាល់សាមីភាគីបដិបក្ខស៊ីរី ឲ្យអាចរក ដំណោះស្រាយតាមផ្លូវនយោបាយ។ គឺក្នុងបរិបទនេះ ដែល នៅក្រុង Astana រដ្ឋធានីកាហ្សាក់ស្ថាន បន្ត ប្រព្រឹត្ត ទៅកិច្ចចរចា ដោយមាន ការចូលរួមនៃតំណាង រុស្ស៊ី តួកគី អ៊ីរ៉ង់។
លោកស្រី Merkel ពីចំណែកគាត់ថ្លែងថា ៖ គាត់គាំទ្រដល់ការឈប់បាញ់នៅស៊ីរី និង ត្រៀមសហការ ឲ្យកាន់តែដិតដល់ ជាមួយរុស្ស៊ី ក្នុងការប្រយុទ្ធទល់នឹង ភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ