អឺរ៉ុបបង្កើតអង្គភាពពិសេស ដើម្បីបន្តធ្វើជំនួញជាមួយអ៊ីរ៉ង់ គេចពីទណ្ឌកម្មរបស់អាមេរិក
ប្រទេសធំៗ៣នៅអឺរ៉ុប មានបារាំង អង់គ្លេស និងអាល្លឺម៉ង់ បានរួមគ្នាបង្កើតអង្គភាពពិសេសមួយ ដើម្បីជួយជ្រោមជ្រែងក្រុមហ៊ុនអឺរ៉ុប ដែលចង់បន្តរកស៊ីជាមួយអ៊ីរ៉ង់។ តាមការឲ្យដឹង អង្គភាពពិសេសនេះ នឹងមានទួនាទីជួយរកវិធី ធ្វើយ៉ាងណា កុំឲ្យក្រុមហ៊ុនទាំងនោះ ត្រូវជាប់ទណ្ឌកម្មរបស់សហរដ្ឋអាមេរិក ដែលបានដាក់បំរាមក្រុមហ៊ុនទាំងអស់ កុំឲ្យរកស៊ីជាមួយអ៊ីរ៉ង់។ មន្ត្រីការទូតអឺរ៉ុប បានលើកឡើងថា ធ្វើដូចនេះ គឺដើម្បីបន្តជួយជ្រោមជ្រែងអ៊ីរ៉ង់ ឲ្យបន្តគោរពកិច្ចព្រមព្រាងនុយក្លែអ៊ែរ បើទោះបីអាមេរិកដកខ្លួនចេញ ហើយដាក់ទណ្ឌកម្មលើអ៊ីរ៉ង់ក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
តាំងតែពីខែកញ្ញាឆ្នាំមុនម្លេះ ដែលសហភាពអឺរ៉ុប បានព្យាយាមរកផ្លូវដើរ ដើម្បីធ្វើយ៉ាងណាបន្តធ្វើជំនួញជាមួយអ៊ីរ៉ង់ ហើយគេចចេញពីការដាក់ទណ្ឌកម្ម របស់សហរដ្ឋអាមេរិក។ ទីបំផុត អង្គភាពពិសេសមួយ នឹងត្រូវប្រកាសជាផ្លូវការ នៅថ្ងៃព្រហស្បតិ៍ទី៣១មករានេះ។ អង្គភាពនេះ មានឈ្មោះថា Instex (Instrument In Support of Trade Exchanges)។
បើតាមប្រភពផ្លូវការ អង្គការភាពពិសេសនេះ គឺប្រៀបបីដូចជាប្រព័ន្ធពិសេសមួយ ដែលមានតួនាទីរៀបចំ ការដោះដូរពាណិជ្ជកម្ម ធ្វើយ៉ាងណា ចៀសមិនប្រើប្រាស់សាច់ប្រាក់ដុល្លារ ដើម្បីកុំឲ្យជាប់ទណ្ឌកម្មរបស់សហរដ្ឋអាមេរិក។ កម្មវត្ថុនៃការបង្កើតអង្គភាពពិសេសនេះ គឺដើម្បីលើកទឹកចិត្តភាគីអ៊ីរ៉ង់ ឲ្យបន្តគោរពកិច្ចព្រមព្រាងនុយក្លេអ៊ែរ ដែលបានចុះហត្ថលេខានៅខែកក្កដា ឆ្នាំ២០១៥។ តែយ៉ាងណា ភាគីអឺរ៉ុប បានអះអាងថា អឺរ៉ុប មិនភ្លេចទេក្នុងការបង្ហាញការព្រួយបារម្ភរបស់អឺរ៉ុប ទាក់ទិននឹងការផលិតមីស៊ីលបាលីស្ទីក ព្រមទាំងអន្តរាគមន៍យោធាអ៊ីរ៉ង់ ក្នុងតំបន់ដើមបូព៌ា។
សូមរំលឹកថា រដ្ឋាភិបាលលោកដូណាល់ ត្រាំ បានសម្រេចដកខ្លួនចេញពីកិច្ចព្រមព្រាងនេះ ហើយបានដាក់ទណ្ឌកម្មសេដ្ឋកិច្ចមកលើអ៊ីរ៉ង់ និងក្រុមហ៊ុនបរទេសទាំងអស់ ដែលហ៊ានរកស៊ីជាមួយអ៊ីរ៉ង់។ យ៉ាងណាមិញ ក្រោយបានដឹកដំណឹងថា ប្រទេសអឺរ៉ុបគ្រោងបង្កើតអង្គភាពពិសេស ដើម្បីគេចចេញពីទណ្ឌកម្មអាមេរិកនេះ អគ្គរដ្ឋទូតអាមេរិកប្រចាំទីក្រុងប៊ែរឡាំង បានគំរាមថា ប្រាកដជាមានផលវិបាកធ្ងន់ធ្ងរ បើក្រុមហ៊ុនអឺរ៉ុប នៅតែចចែសរកស៊ីជាមួយអ៊ីរ៉ង់។
គួរបញ្ជាក់ថា ទូរទស្សន៍អាល្លឺម៉ង់NDR បានផ្សាយថា ដើម្បីកុំឲ្យសហភាពអឺរ៉ុប ប្រឈមមុខដោយផ្ទាល់ជាមួយសហរដ្ឋអាមេរិក បារាំង និងអាល្លឺម៉ង់ បានសុខចិត្តចេញមុខចាត់ចែងអង្គភាពពិសេសនេះ។ អង្គភាពនេះ នឹងចុះបញ្ជីរនៅបារាំង ហើយដោយគ្រប់គ្រង ដោយស្ថាប័នជំនាញធនាគារហិរញ្ញវត្ថុរបស់អាល្លឺម៉ង់។ អង់គ្លេស ក៏បានសម្រេចចូលរួមក្នុងអង្គភាពនេះដែរ។
ទោះយ៉ាងណាក៏ដោយ មន្ត្រីទូតសហភាពអឺរ៉ុបម្នាក់ បានលើកឡើងថា អង្គភាពពិសេសនេះ នឹងមិនអាចមកជំរុញ ការដោះដូរពាណិជ្ជកម្មរវាងប្រទេសអឺរ៉ុប និងអ៊ីរ៉ង់ ឲ្យរីកចំរើនឡើងខ្លាំងក្លានោះទេ ព្រោះវាសំដៅតែទៅលើក្រុមហ៊ុនធនតូចនិងមធ្យមមួយចំនួនប៉ុណ្ណោះ។ ចំណែកកិច្ចសន្យាធំៗ ដូចជាកិច្ចសន្យាលក់ប្រេងជាដើម គឺមិនពាក់ព័ន្ធប៉ុន្មានទេ ហើយក៏ពិបាកក្នុងការគេចវៀង ចេញពីទណ្ឌកម្មរបស់អាមេរិកដែរ។ មួយវិញទៀត គេត្រូវរងចាំជាច្រើនខែទៀត ដើម្បីឲ្យអង្គភាពពិសេសនេះ អាចដំណើរការបានពេញលេញ ព្រោះត្រូវរងចាំសម្រេចយល់ព្រម ពីប្រទេសសមាជិកសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ