ពលករខ្មែរមិនស្របច្បាប់នៅប្រទេសថៃ អាចចាប់ផ្តើមចុះឈ្មោះទទួលយកភាពស្របច្បាប់ពីថ្ងៃនេះទៅ
ប្រជាពលករដែលបម្រើការងារនៅប្រទេសថៃខុសនីតិវិធី អាចនឹងទទួលបានសិទ្ធិស្នាក់នៅ និង ធ្វើការស្របច្បាប់ ដោយអនុវត្តតាមដំណាក់កាលស្នើសុំឯកសារស្របច្បាប់ ដែលបានធ្វើឡើងចាប់ពីថ្ងៃទី២៤ កក្កដានេះតទៅ។ ក្រសួងការងារកម្ពុជាបានប្រកាសសេចក្តីជូនដំណឹងនេះ ក្រោយពីធ្វើការព្រមព្រៀងជាមួយភាគីថៃ ដើម្បីរកដំណោះស្រាយ និងផ្តល់អត្ថប្រយោជន៍ដល់ពលករខ្មែរទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
អត្ថបទដោយ៖ ប៊ុន សៅសុភនាថ
ជាដំណឹងល្អ សម្រាប់ប្រជាជនខ្មែរដែលឆ្លងដែនទៅធ្វើការនៅថៃដោយមិនស្របតាមនីតិវិធី មានឱកាសនឹងក្លាយជានិយោជិតតាមច្បាប់ត្រឹមត្រូវ តាមរយៈការអនុវត្ត ៣ដំណាក់កាលដែលភាគីកម្ពុជា និងថៃបានឯកភាពគ្នា។ ជាជំហានដំបូង និយោជិតត្រូវឲ្យចៅកែ ទៅធ្វើការប្រកាស និងចុះឈ្មោះឲ្យខ្លួន នៅការិយាល័យស្រង់ទិន្នន័យពលករបរទេស។ បើមិនដូច្នោះទេ ថៅកែនឹងរងនូវការផាកពិន័យយ៉ាងធ្ងន់ពីក្រសួងការងារថៃ។ នេះជាផ្សាយជូនដំណឹងតាមរយៈបណ្តាញសង្គមហ្វេកប៊ុក របស់លោក ហេង សួរ អ្នកនាំពាក្យក្រសួងការងារ កាលពីយប់ ថ្ងៃទី២៣ កក្កដា។
បន្ទាប់ពីធ្វើការចុះឈ្មោះហើយ ប្រជាពលករទាំងអស់ត្រូវមកបង្ហាញខ្លួនផ្ទាល់ នៅតាមការិយាល័យ ក្នុងអំឡុងពេលចាប់ពីថៃ្ងទី០៨ ខែសីហា ដល់ថ្ងៃទី០៩ ខែកញ្ញា ឆ្នាំ២០១៧។ និង ជាដំណាក់កាលចុងក្រោយ ចាប់ពីថ្ងៃ០៩ ខែកញ្ញា ដល់ថ្ងៃទី៣១ ខែធ្នូ ពួកគេនឹងអាចទទួលបានការអនុញ្ញាតឲ្យស្នាក់នៅ និង ធ្វើការ ពីមន្ត្រីអន្តោប្រវេសន៍ថៃ និងក្រសួងការងារថៃ។
លោកហេង សួរបានបន្តថា ភាពស្របច្បាប់នឹងធ្វើឲ្យពលករ ទទួលបានអត្ថប្រយោជន៍យ៉ាងច្រើន ដូចជា ទទួលបានប្រាក់បៀវត្សត្រឹមត្រូវ ធានារ៉ាប់រងសុខភាព ធានារ៉ាប់រងគ្រោះថ្នាក់ការងារ និង សំណងឬរបបបេឡាជាតិសន្តិសុខសង្គមពេលបញ្ចប់ការងារ។
ការិយាល័យស្រង់ទិន្នន័យពលករបរទេស មានចំនួន ៩៧ ទីតាំង និងមាននៅគ្រប់ខេត្តក្នុងប្រទេសថៃ។ ហើយបច្ចុប្បន្ន ពលករខ្មែរធ្វើការនៅថៃ ដែលមិនមានច្បាប់ មានចំនួនជាង ៣០ម៉ឺននាក់។
សូមរំលឹកថា ការសម្រួលឲ្យមានការផ្តល់ភាពស្របច្បាប់នេះ កើតមានបន្ទាប់ពីជំនួបចរចាររវាងលោកអ៊ិត សំហេង រដ្ឋមន្រ្តីក្រសួងការងារ ជាមួយរដ្ឋាភិបាលថៃ កាលពីថ្ងៃទី២០ កក្កដាកន្លងទៅនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ