របាយការណ៍៖ ២៦ឆ្នាំនេះ បរទេសផ្តល់ជំនួយដោះមីននៅកម្ពុជា ជិត៥០០លានដុល្លារ
អាជ្ញាធរមីន បានឲ្យដឹងថា ក្នុងរយៈពេល ២៦ឆ្នាំ គិតពីឆ្នាំ ១៩៩២ ដល់ឆ្នាំ ២០១៨ សហគមន៍អន្តរជាតិ បានផ្តល់ជំនួយប្រមាណ ៤៦៤លានដុល្លារ ដើម្បីជួយក្នុងសកម្មភាពដោះមីន នៅកម្ពុជា។ ការឲ្យដឹងរបស់អាជ្ញាមីននេះ បានធ្វើឡើងក្នុងសន្និសីទត្រួតពិនិត្យឡើងវិញ លើកទី ៤ ក្នុងទីក្រុងអូស្លូ ប្រទេសន័រវេស នៅថ្ងៃទី ២៨ខែវិច្ឆិកាម្សិលមិញ។
ចុះផ្សាយនៅថ្ងៃ៖
ស្តាប់ - ០១:៤៩
តាមរបាយការណ៍ស្តីពីកិច្ចសហប្រត្តិបត្តិការ និងការផ្តល់ជំនួយ ដែលត្រូវបានបង្ហាញក្នុងសន្និសីទត្រួតពិនិត្យឡើងវិញ នៅប្រទេសន័រវេសនោះ អគ្គលេខាធិការអាជ្ញាធរមីនកម្ពុជា បានបញ្ជាក់បន្ថែមថា ក្រៅពីការផ្តល់ជំនួយជួយដល់សកម្មភាពមីនរបស់សហគមន៍អន្តរជាតិ ខាងរដ្ឋាភិបាលកម្ពុជា ក៏បានចំណាយថវិកាប្រមាណ ១៦០លានដុល្លារ ក្នុងរយៈពេល ២៦ឆ្នាំនេះ។
តាមរយៈការចំណាយថវិកាជិត ៧០០លានដុល្លារ ក្នុងរយៈពេលជាច្រើនឆ្នាំមកនេះ ជាលទ្ធផល កម្ពុជា បានបោសម្អាតមីន លើផ្ទៃដី ១.៨៨១គីឡូម៉ែត្រក្រឡា ដោយរកឃើញ និងបំផ្លាញចោលគ្រាប់មីនប្រឆាំងមនុស្ស ជាង ១លានគ្រាប់ គ្រាប់មីនប្រឆាំងយានយន្ត ប្រមាណ ២.៤៨៤០គ្រាប់ និងយុទ្ធភ័ណ្ឌមិនទាន់ផ្ទុះប្រមាណ ២,៧លានគ្រាប់។
តាមរបាយការណ៍ដដែល ថវិកាជំនួយនេះ បានចូលរួមធ្វើឲ្យមានសន្តិភាព ជួយដោះស្រាយបញ្ហាជនភៀសខ្លួន ផ្តល់ដីសម្រាប់បង្កបង្កើនផល កាត់បន្ថយគ្រោះថ្នាក់ ជួយសង្គ្រោះជនរងគ្រោះ កាត់បន្ថយភាពក្រីក្រ និងជួយដល់វិស័យផ្សេងៗជាច្រើនទៀត។
យ៉ាងណាមិញ កម្ពុជានៅតែត្រូវការថវិកា ប្រមាណ ៣៧៧លានដុល្លារទៀត ដើម្បីបោសសម្អាតផ្ទៃដីប្រមាណ ៨៩០គីឡូម៉ែត្រក្រឡា ដែលមានការគម្រាមដោយសារមីន ដើម្បីសម្រេចឲ្យបាននូវផែនការលុបបំបាត់ការគម្រាមដោយសារមីនឲ្យអស់ នៅឆ្នាំ ២០២៥ខាងមុខ។
ជុំវិញការផ្តល់ជំនួយបរទេស លើសកម្មភាពដោះមីននៅកម្ពុជានេះដែរ នៅក្នុងសប្តាហ៍នេះ ក្នុងដំណើរទស្សនកិច្ចរបស់រដ្ឋមន្ត្រីការបរទេសកម្ពុជា ទៅកាន់ប្រទេសកូរ៉េខាងត្បូង រដ្ឋាភិបាលកូរ៉េខាងត្បូង ក៏បានបញ្ជាក់ពីផ្តល់ជំនួយឥតសំណង ១០លានដុល្លារ គាំទ្រលើប្រតិបត្តិការដោះមីន នៅខេត្តបាត់ដំបង ប៉ៃលិន និងបន្ទាយមានជ័យ។ ចំណែកប្រទេសស៊ុយអែត តាមរយៈឯកអគ្គរដ្ឋទូតប្រចាំនៅកម្ពុជា ក៏បានសន្យាពិចារណាលើការផ្តល់ជំនួយឡើងវិញ ក្នុងសកម្មភាពមីននៅកម្ពុជានេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ