កម្ពុជា-សេដ្ឋកិច្ច

IMF បានព្យាករណ៍ថា កំណើនសេដ្ឋកិច្ចកម្ពុជានឹងរក្សាអត្រាថេរ៧%នៅរយៈពេល២ឆ្នាំទៅមុខ

មូលនិធិរូបិយវត្ថុអន្តរជាតិ (IMF) បានចេញផ្សាយរបាយការណ៍ថ្មីមួយ ស្តីពីសន្ទស្សន៍សេដ្ឋកិច្ចរបស់ប្រទេសកម្ពុជារយៈពេលពីរឆ្នាំក្នុងរង្វង់៧%។ អត្រាកំណើន ៧%នេះ នឹងរក្សាភាពថេរក្នុងរយៈពេលពីរឆ្នាំទៅមុខ ប៉ុន្តែអ្នកជំនាញបានព្រមានថា អត្រានេះនឹងរងផលប៉ះពាល់ខ្លះ ពីភាពមិនប្រាកដប្រជានៃការបោះឆ្នោតជាតិនៅឆ្នាំ២០១៨។

ចុះផ្សាយនៅថ្ងៃ៖ 26/07/2017 - 12:40

លោក ចាន់ សុផល អ្នកវិភាគសេដ្ឋកិច្ចឯករាជ្យ © ណាវិន-RFI

ដោយ៖ វ៉ា សំណព្វ

ផ្សាយពាណិជ្ជកម្ម

ការវាយតម្លៃនេះ ដោយផ្អែកទៅលើមូលដ្ឋានគ្រឹះនៃវិស័យសំខាន់ៗនៃសេដ្ឋកិច្ចកម្ពុជា ក្នុងនោះរួមមាន ការចំណាយកាន់តែខ្ពស់លើវិស័យសាធារណៈ, ការវិនិយោគលើវិស័យសំណង់, សកម្មភាពទេសចរណ៍ និងកំណើនវិនិយោគពីបរទេសជាដើម។ ប៉ុន្តែជាមួយនឹងអត្រាកំណើន ៧% ក្នុងអត្រាថេរនៅរយៈពេលពីរឆ្នាំ គឺឆ្នាំ២០១៧ និងឆ្នាំ២០១៨នេះ អ្នកជំនាញបានព្រមានថា កម្ពុជាត្រូវតែខិតខំបន្ថែមទៀត ដើម្បីធ្វើកំណែទម្រង់ក្នុងវិស័យសេដ្ឋកិច្ចគន្លឹះៗរបស់ខ្លួន ដើម្បីរក្សាបាននូវកំណើនប្រកបដោយចីរភាព និងស្ថិរភាពនៃវិស័យសេដ្ឋកិច្ចរបស់កម្ពុជា។ នេះបើតាមការលើកឡើងរបស់ក្រុមអ្នកជំនាញនៃមូលនិធិរូបិយវត្ថុអន្តរជាតិ (IMF) ដែលបានចេញផ្សាយរបាយការណ៍ថ្មីមួយ កាលពីល្ងាចថ្ងៃទី ២៥ កក្កដា នេះ។

លោក Jarkko Turunen អនុប្រធានផ្នែកតំបន់អាស៊ីប៉ាស៊ីហ្វីកនៃអង្គការអន្តរជាតិផ្នែកហិរញ្ញវត្ថុនេះបានថ្លែងនៅក្នុងសេចក្ដីសន្និដ្ឋានដើម្បីបិទបញ្ចប់ “ការពិគ្រោះយោបល់មាត្រា៤” ដែលជាការសិក្សាវាយតម្លៃនិងឱ្យយោបល់ប្រចាំឆ្នាំទៅលើប្រទេសជាសមាជិកកាលពីថ្ងៃអង្គារម្សិលមិញថា សេដ្ឋកិច្ចកម្ពុជានឹងបន្តរក្សាភាពខ្លាំងនិងមាំទាំរបស់ខ្លួនបន្តទៅទៀត បើទោះជាមានការធ្លាក់ចុះនៃការវិនិយោគឯកជនក្ដី។

គួរជំរាបជូនថា ការព្យាករណ៍របស់ IMF នេះ គឺត្រូវគ្នានឹងការព្យាករណ៍ទុករបស់រដ្ឋាភិបាលកម្ពុជា ដែលរំពឹងថា កំណើនសេដ្ឋកិច្ចកម្ពុជានឹងបន្តស្ថិតក្នុងអត្រា៧%សម្រាប់ឆ្នាំ២០១៧ និងពីរឆ្នាំទៅខាងមុខ ខណៈដែលស្ថាប័នវាយតម្លៃកំណើនសេដ្ឋកិច្ចកម្ពុជាសំខាន់ៗមួយចំនួនទៀត រួមមានធនាគារអភិវឌ្ឍន៍អាស៊ី ADB និងធនាគារពិភពលោក World Bank ក៏បានព្យាករណ៍ពីអត្រាកំណើនសេដ្ឋកិច្ចកម្ពុជាក្នុងអត្រាដូចគ្នានេះដែរ។

លោក ចាន់ សុផល អ្នកជំនាញសេដ្ឋកិច្ចនៅកម្ពុជា មិនភ្ញាក់ផ្អើលចំពោះការវាយតម្លៃនេះទេប៉ុន្តែលោកបានឯកភាពចំពោះការព្រួយបារម្ភថា កត្តានយោបាយ នឹងធ្វើឲ្យប៉ះពាល់ដល់កំណើនសេដ្ឋកិច្ចកម្ពុជានៅឆ្នាំក្រោយនេះ៕