លោក ហ៊ុន សែន៖ គ្មានការលើកលែងទោស លោកមាជ សុវណ្ណារ៉ា
លោកនាយករដ្ឋមន្រ្តី ហ៊ុន សែន នៅព្រឹកនេះ បានប្រកាសថា គ្មានឡើយការលើកលែងទោស លោក មាជ សុណ្ណារ៉ា មន្រ្តីជាន់ខ្ពស់អតីតគណបក្សសង្រ្គោះជាតិ។ ក្រៅពីគ្មានការលើកលែងទោសហើយ លោក ហ៊ុន សែន ក៏បានបញ្ជាឱ្យប្រធានពន្ធនាគារដកហូតទូរស័ព្ទដៃពី លោក មាជ សុវណ្ណារ៉ា ដែលលោក ហ៊ុន សែន អះអាងថា បានប្រើបា្រស់ដើម្បីធ្វើសកម្មភាពនយោបាយពីពន្ធនាគារ។
ចុះផ្សាយនៅថ្ងៃ៖
ស្តាប់ - ០១:៣៧
ប្រមុខរដ្ឋាភិបាលកម្ពុជា ហ៊ុន សែន នៅព្រឹកថ្ងៃទី ២៧ ខែមីនា នេះ បានបញ្ជាក់ម្តងហើយម្តងទៀតថា គ្មានឡើយការលើកលែងទោស លោក មាជ សុវណ្ណរ៉ា អតីតសមាជិកគណៈកម្មការនាយកនៃគណបក្សសង្រ្គោះជាតិ។ ការថ្លែងយ៉ាងដូច្នេះធ្វើឡើង នាពិធីចែកសញ្ញាបត្រដល់និស្សិតសាកលវិទ្យាល័យអាស៊ីអឺរ៉ុប។
មិនត្រឹមតែប៉ុណ្ណោះ លោកនាយករដ្ឋមន្រ្តី ក៏បានបញ្ជាឲ្យដកហូតទូរស័ព្ទដៃរបស់លោក មាជ សុវណ្ណារ៉ា មន្រ្តីជាន់ខ្ពស់អតីតគណបក្សសង្រ្គោះជាតិ ដែលប្រមុខរដ្ឋាភិបាលអះអាងថា អ្នកជាប់ទោសរូបនេះ បានប្រើប្រាស់ ក្នុងការបម្រើសកម្មភាពនយោបាយចេញពីពន្ធនាគារ។
លោក ហ៊ុន សែន បានស្តីបន្ទោសប្រធានពន្ធនាគារដែលបណ្តោយឲ្យអតីតមន្ត្រីបក្សប្រឆាំងរូបនេះ និយាយសារនយោបាយប្រឆាំងរដ្ឋាភិបាល ដោយសេរី។ ដោយបន្ថែមថា លោក បានបញ្ជាឲ្យប្រធានពន្ធនាគារ ដកហូតទូរស័ព្ទ ពីលោក មាជ សុវណ្ណរ៉ា ពីរដងរួចទៅហើយ ក៏ប៉ុន្តែ គ្មានចំណាត់ការណាមួយទាល់តែសោះ។ ក្រៅពីព្រមានដកប្រធានពន្ធនាគារហើយ លោកនាយករដ្ឋមន្រ្តី ហ៊ុន សែន ក៏ថែមទាំងព្រមានដកតំណែង មេប៉ូលិស ដែលលោក ហ៊ុន សែន ទំនងជាសំដៅទៅលើអគ្គស្នងការនគរបាល បើករណីនេះ កើតឡើងជាថ្មីម្តងទៀត។
គួរជម្រាបថា មិនដល់មួយម៉ោងផង បន្ទាប់ពីបញ្ជារបស់លោកនាយករដ្ឋមន្រ្តី មន្រ្តីពន្ធនាគារ នៅព្រឹកថ្ងៃទី២៧ ខែមីនា ដដែលនេះ បានដកហូតដកទូរស័ព្ទរបស់ លោក មាជ សុវណ្ណារ៉ា រួចហើយ។ មិនត្រឹមតែដកហូតទូរសព្ទពីលោក មាជ សុវណ្ណារ៉ា ប៉ុណ្ណោះទេ លោក ហ៊ុន សែន ក៏បានបញ្ជាឱ្យមន្រ្តីជំនាញ ស៊ើបអង្កេតប្រព័ន្ធទាក់ទងរបស់លោក មាជ សុវណ្ណារ៉ា បន្ថែមទៀត។
សូមរំឮកជូនថា លោកមាជ សុវណ្ណារ៉ា ដែលមានសញ្ជាតិអាមេរិកាំងផងនោះ ត្រូវបានតុលាការកម្ពុជាកាត់ទោសឱ្យជាប់ពន្ធនាគារចំនួន២០ឆ្នាំពាក់ព័ន្ធនឹងការធ្វើបាតុកម្មនៅក្បែរទីលានប្រជាធិបតេយ្យកាលពីឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ