មេឃុំគណបក្សសង្រ្គោះជាតិម្នាក់នៅខេត្តកំពង់ចាម ត្រូវបានចាប់ខ្លួន នៅក្នុងទំនាស់ពាក្យសំដី
មេឃុំគណបក្សសង្រ្គោះជាតិម្នាក់នៅក្នុងខេត្តកំពង់ចាម ត្រូវបានចាប់ខ្លួនភ្លាមៗ នៅក្នុងទំនាស់ពាក្យសំដី ជាមួយអ្នកជិតខាងម្នាក់។ លោក លីម ប្រុស មេឃុំគៀនជ្រៃ កំពុងស្ថិតនៅក្រោមការឃុំខ្លួនបណ្តោះអាសន្ននៅស្នងការដ្ឋាននគរបាលខេត្តកំពង់ចាម ក្រោមការចោទប្រកាន់ថា បានប្រើអំពើហិង្សា និងប្រមាថអាយុជីវិត កាលពីថ្ងៃទី ២១ កញ្ញា ។
ចុះផ្សាយនៅថ្ងៃ៖
ស្តាប់ - ០២:០១
ព្រះរាជអាជ្ញាខេត្តកំពង់ចាម កាលពីថ្ងៃទី ២១ កញ្ញា បានបញ្ជាឲ្យចាប់ខ្លួនភ្លាម លោក លីម ប្រុស មេឃុំគៀនជ្រៃ មកពីគណបក្សសង្គ្រោះជាតិ បន្ទាប់ពីមេឃុំដែលទើបនឹងជាប់ឆ្នោតថ្មីរូបនេះ បានប្រើអំពើហិង្សានិងប្រមាថអាយុជីវិតទៅលើអ្នកជិតខាងម្នាក់។ លោក លីម ប្រុស អាយុ៤៥ឆ្នាំ ត្រូវបានរងការចោទប្រកាន់ថា បានប្រើប្រាស់អំពើហិង្សាដោយចេតនា លើឈ្មោះ ទូច ផល្លា អាយុ ៣៨ ឆ្នាំ និងប្រពន្ធឈ្មោះ ប៉ិច ស្រី នៅក្នុងជម្លោះពាក្យសំដីដោយផ្តើមដំបូងពីករណីម៉ូតូខូចនៅកណ្តាលផ្លូវ។
ប៉ុន្តែបើតាមរបាយការណ៍ពីសមត្ថកិច្ចបានរៀបរាប់ថា លោកមេឃុំ លីម ប្រុស បានវាយមួយដៃចំកណ្តាលថ្ងាសទៅលើជនរងគ្រោះឈ្មោះ ទូច ផល្លា នៅក្នុងទំនាស់ពាក្យសំដីលើការសាងសង់រោងការកូន។ បន្ទាប់មកលោកមេឃុំដែលស្ថិតនៅក្នុងអាការៈស្រវឹងផងនោះ ក៏បានជេរប្រមាថគំរាមកំហែងលើឈ្មោះ ប៉ិច ស្រី មិនឲ្យលើករោងការកូនបាននោះទេ បើហ៊ានលើក គឺដាក់ទង់សហើយ។ ក្រោយពីទទួលបានពាក្យបណ្តឹងពីជនរងគ្រោះលើករណីនេះ ព្រះរាជអាជ្ញាអមសាលាដំបូងខេត្តកំពង់ចាម បានចេញដីកាឃាត់ខ្លួន លោក លីម ប្រុស ភ្លាមៗ នឹងបាននាំទៅឃុំខ្លួនជាបណ្តោះអាសន្ន នៅស្នងការដ្ឋាននគរបាលខេត្តកំពង់ចាម មុនពេលបញ្ជួនខ្លួនទៅកាន់តុលាការដើម្បីចោទប្រកាន់ជាផ្លូវការ។
សូមបញ្ជាក់ថា នេះគឺជាករណីទីមួយហើយ ដែលមានការចាប់ខ្លួនមេឃុំគណបក្សសង្រ្គោះជាតិ ស្ថិតនៅក្នុងតំណែង ក្រោយពីបានចូលបំពេញការងារ កាលពីខែកក្កដាមក ខណៈដែលមេឃុំ-ចៅសង្កាត់មួយចំនួនទៀត កំពុងស្ថិតនៅក្រោមការឃ្លាំមើលនិងការចាប់កំហុស។ សូមបញ្ជាក់ដែរថា នៅក្នុងការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី ៤ ឆ្នាំ២០១៧ កន្លងទៅនេះ គណបក្សសង្រ្គោះជាតិបានឈ្នះតំណែងមេឃុំ-ចៅសង្កាត់ប្រមាណជា៤៨៩ឃុំ-សង្កាត់ក្នុងចំណោម ១៦៤៦ ឃុំ-សង្កាត់ នៅទូទាំងប្រទេស។
ដោយឡែកទាក់ទងករណីខាងលើនេះវិញ មន្រ្តីគណបក្សសង្រ្គោះជាតិប្រចាំស្រុកកំពង់សៀម កំពុងពឹងពាក់មេធាវីនៅអង្គការអាដហុក ដើម្បីជួយការពារក្តីនេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ